ZKIZ Archives


中環在線:方卓如唔撈CEO選議員 李華華

2008-07-25  AppleDaily



財 經專欄作家、以筆名方卓如行走江湖嘅龔耀輝(Ronald),由於要競逐今年立法會選舉會計界功能界別議席,噚日辭去中國金融租賃集團(2312)行政總 裁兼執行董事,專心為嚟緊立法會選舉拉票,公司通告指佢嘅職務仲未搵到人接手,暫時由執董陳志鴻做住署理行政總裁先。Ronald辭職唔難理解,事關04 年佢亦有參選會計界功能界別議席,對手同樣係今年有參選嘅譚香文同陳茂波,當年Ronald輸個馬鼻得第三,今次捲土重來,不容有失,佢出書自揭方卓如身 份都係為咗提高知名度。

棄15.3萬月薪

會計出身嘅Ronald舊年先放棄做咗十幾年嘅老本行,辭去均富會計職務,轉去中國 金融租賃做CEO,華華記得當時佢出席公司記者會時,對新工作雄心勃勃,將公司轉名(前稱金豐21投資),業務亦由證券投資,轉型主攻中國金融租賃市場, 估唔到家陣做唔夠1年就唔撈。華華睇番中國金融租賃07年年報,由於Ronald 10月先過檔,做得3個月,以月薪計袍金連薪津,1個月約15.3萬銀,同立法會出年嘅6.5萬蚊人工相比,真係差一大截,雖然話立法會議員有153.4 萬銀實報實銷津貼,但都只係用嚟畀議員請助理同租辦事處,今次Ronald放棄一切擁抱立法會,仲未必得緊,佢都算好大勇氣,睇嚟政治真係有莫大嘅魔力。 電郵:LiWaWa@AppleDaily.com
中環 在線 方卓 卓如 如唔 唔撈 CEO 議員 華華
PermaLink: https://articles.zkiz.com/?id=1490

化身龔耀輝╳方卓如

2008-4-3  NM




方卓如,香港金融圈「奇拿」,沒人知悉真正身份,靠辛辣文字寸盡上市公司,深得民心。一句「同林太,我講感情;同李生,我講錢。」毅然離開易手的《信報》。

龔耀輝,會計師,現轉行做市值只有三億元的上市公司行政總裁。他的公司,常在十大升幅或跌幅榜內出現,要發「股價不明升(跌)幅原因」的通告來解畫。

私人閒時在《信報》寫沒稿費的專欄增加知名度。

表面上,方卓如及龔耀輝南轅北轍,但原來卻出自同一軀體。

「算唔算精神分裂?」記者大膽假設,小心求證。

他想也不想:「中等程度啦。」龔耀輝檔案

38歲,已婚,沒兒女

91年 城市理工會計系畢業,均富會計師樓打工

95年 轉職證監會,並在科大兼讀MBA

96年 轉工畢馬威

99年 創辦http://Foodeasy.com,任行政總裁

01年 回巢均富

05年 化名方卓如,在《信報》寫專欄

07年 轉工,在中國金融租賃做行政總裁

08年 自爆方卓如身份,部署選立法會

 

記者跟龔耀輝訪問,其間他多番請記者「高抬貴手,手下留情」,惟記者跟他素未謀面,哪裡有情?於是反問他既擔驚受怕,何解仍肯接受《壹週刊》訪問?

他直認不諱,「你哋多人睇囉。」數口精,不愧為會計師。

方卓如的身份,他足足守密三年,儘管有些朋友已猜到是他,但他仍死口不認。今次突然自行引爆,當然經過一輪精心計算。目的明顯不過,借勢九月進軍立法會。

他的如意算盤,是會計界有兩萬名選民,其中逾半是年輕人,估計有不少是他筆名方卓如的粉絲,再加自己是會計師公會理事及「三十會」的中堅分子,「如今二合為一,應該有啲叫座力。」龔耀輝笑笑口說。

希臘變巴西

上屆他從會計界出選立法會,當年他是無名小卒,仍取得一千八百多票,九個候選人之中,他屈居第三,敗給同樣得三千三百幾票的譚香文及陳茂波。

今次他挾着方卓如身份捲土重來,自比是巴西隊,信心十足,「仲要係無病無痛,有齊前中後同隊醫嘅巴西隊。」四年前,他曾以爆大冷贏歐洲國家盃的希臘隊來形容自己。

多年前,他已用真名,替任職的均富會計師行,在報章教人如何看年報及財務報表,他以「平鋪直敍,好低檔次」來形容這些舊作。

突 然蛻變,他說全靠筆名原復生的蔡東豪賞識,「我喺佢離開商台後才認識,嗰時佢構思復出寫《信報》,想搵多啲唔同嘅人試寫,問我有冇興趣。題材不限,字數不 限。」學生時代視《號外》創辦人丘世文為偶像的他,早已戀上文字,惟工作卻要與數字為伍,難得這自由度極高的機會,便膽粗粗應承。

譚嗣同鬥梁啟超

第一步,是找個具分量的筆名,「佢姓原(圓),我就姓方;佢借清朝名人譚嗣同的字『復生』,我咪用梁啟超的字『卓如』,襯到絕。」

醞釀方卓如出世,他才發現蔡東豪今回易名「孔少林」,更是多人共用筆名輪流寫,只有他一人孤軍作戰,「感覺好似一揪六咁難打。」為此,他決定自創風格,閒時加添幾分中環辦公室戀事滲入文章;又專門批評上市公司,和黃、電盈及聯想等大藍籌,亦先後成為他的批評對象,他坦言作品「得罪人多,稱呼人少」。

由於正職要朝九晚十一應付收購合併等工作,龔耀輝惟有善用晚飯時間來寫稿,「題材唔難搵,就好似街市買餸,搵最新鮮嘅事嚟批評。」他自評最滿意之作,是揶揄沈嘉偉靠財技搞上市;而寫得最戰戰兢兢,則是批評蔡東豪掌舵的精電國際由盈轉虧,標題名為「釘蝨乸」。

由於身份神秘,批評一針見血,令方卓如漸受注目,網友紛紛追尋他的真正身份,「有時朋友食飯講到方卓如,真係幾開心,證明有人捧場,虛榮感同成功感湧晒出嚟。」但他始終沒爆出自己身份。

收錢轉義工

如是者,方卓如在《信報》寫了一年多,卻遇上報紙賣盤給李澤楷,於是趕在易主前,與蔡東豪齊齊停筆,更誇口說「同林太,我講感情;同李生,我講錢。」

但過了不久,他又按捺不住,去年底回頭在《信報》寫專欄,但今次是打真軍以龔耀輝名義,稿費更是欠奉,完全與當日離開時說得牙斬斬背道而馳。他直認此舉無非為了選舉,「龔耀輝需要曝光,方卓如唔使。」

球證轉球員

去年底,龔耀輝毅然辭掉會計師樓的董事職位,步蔡東豪後塵,由評論員寫而優則做,轉行擔任上市公司行政總裁。

蔡東豪做行政總裁的精電,在江湖有一定地位,但他現職的「中國金融租賃」,前身是「金豐21」,只屬三四線的細價股,最近轉型搞內地金融租賃業務,例如汽車或飛機引擎的融資。惟股價相當反覆,常在十大升幅或跌幅榜內出現,實在與他昔日以方卓如身份,批評靠玩易容財技的劣質公司類近。

「股價我控制唔到,何況財技好似膽固醇一樣,都有分好與壞,我哋仲未夠資格玩財技。」龔耀輝不慌不忙,嘗試向記者解說。

記者不收貨,要他再一次分裂,以方卓如思維來評價,他呆了兩三秒後,回答「有排執,百廢待興」。

人格分裂外,他個人的投資風格亦愛左右互搏,既投資穩陣的藍籌股,同時亦熱炒細價股只爭朝夕,「今年股市雖然麻麻,但我的回報都算唔錯,跑贏大市有突。」記者想再問下去,他欲言又止,笑說:「手下留情吧。」

 

碩士畢業後,他與一班同學共同創立網站http://foodeasy.com,後來賣掉股份,賺了一筆。(《蘋果日報》圖片)


化身 龔耀 耀輝 方卓 卓如
PermaLink: https://articles.zkiz.com/?id=24626

方卓如的難題 朱泙漫屠龍記

http://johnchrysostom.blogspot.hk/2014/05/blog-post_29.html
外號「方如玉帥」的財經名筆方卓如先生鴻文『死做爛做死梗』以狼和綿羊分別比喻強國人和港燦。文中曰:「…內地人眼中,他們是一群狼,而你是一隻綿羊,一隻諗住在制度之下乖乖做好本份的綿羊。而狼,是要在制度並不禁止之下,千方百計咬死這批羊,然後踩住上。…」現實中職場行的是森林法則,筆者在職業中遇過有洋鬼子狼、強國狼、南亞狼、目不識丁的麻甩狼甚至綠林好狼,可見現實中狼是沒有國籍和背景的區分。
筆者舊舖有個老板曾經講過:「每一個人都有其生存的辦法。」在森林中自命醒目的灰太狼和胸無大志的喜羊羊依然可以有生存的空間。筆者雖然出身奸商管理系,但亦曾經認真考慮過執教鞭做人之患。當年筆者亦套用投資角度去剖析一生人事業的策略,其中一個想法便是把患長期大腦便秘症的政府工和教書當作無風險政府債券(Risk Free Bonds)。若果閣下自命係Wolf of Wyndham Street或宇宙最強的Donny Yen,便應該好似玉帥叔出去做金融老千,否則應該乖乖地揾份政府工做喜羊羊,因為本質上大家都係呃飯食。如果出嚟做Wolf of Wyndham Street揾得少過一個小學老師,這條灰太狼應該做深刻反醒而不是患上長期大腦便秘症的喜羊羊。
在學究金融工程學領域中有個叫夏普比率(Sharpe Ratio),是以一個資產的回報(Return)相對風險(Risk,一般以波幅(Volatility)來量度)的比率去量度一個資產或基金回報是否理想。夏普比率是由於1990年度諾貝爾經濟學獎得主威廉·夏普(William Sharpe)以資本資產定價模式(Capital Asset Pricing Model,簡稱CAPM)為基礎開發出來。其重點是回報和風險必須相稱,倘若兩項資產回報是均等,則選擇較低風險。在選擇包括高風險高回報和低風險低回報資產組合,則視乎投資者對回報和風險胃口。選擇高風險和低回報資產的灰太狼,基本上係自殺。
以近十年香港股票市場為例,電能實業(00006:HK)和會德豐(00020:HK)可謂分別代表喜羊羊和灰太狼最佳例子。截至2014年5月27日止,恒生指數、電能實業(00006:HK)和會德豐(00020:HK)年均複合回報分別是7.23%、9.55%和11.67%,期內30天歷史波幅分別是22.39%、17.62%和34.37%,而他們的夏普比率分別是32.29%、54.19%和33.95%。這十年來會德豐(00020:HK) 年均複合回報僅跑贏電能實業(00006:HK)2.12%,而其夏普比率則更高,可見由投資角度看電能實業(00006:HK)這一隻喜羊羊更勝灰太狼會德豐(00020:HK)。以風險或波幅進行資產配置(Assets Allocation)其實有一定可靠性,君不見歷史會德豐(00020:HK)走勢大上大落但實際上回報並非跑贏電能實業(00006:HK)很多,在高低位驚濤駭浪中持有較高風險或波幅資產者未見家鄉前可能已經葬身股海!
在干諾道中天橋上,金融老千、Wolf of Wyndham Street和其他自信心爆棚的港燦熙來攘往。難得玉帥叔犠牲自己在金融領域捍衛公義力挑強國狼和洋老千,身居香港的小綿羊小飛俠有幸得其保護是一種福氣!
方卓 卓如 如的 難題 朱泙 泙漫 屠龍
PermaLink: https://articles.zkiz.com/?id=100915

千祈唔好自甘墮落 方卓如

1 : GS(14)@2017-02-11 23:32:52

2016-01-16 HJ
今年係iPhone面世十周年,睇番Steve Jobs十年前响台上介紹產品,仍然覺得劃時代。當年佢示範嘅創新功能,而家3歲細路仔都識用,仲覺得係理所當然,冇乜特別。iPhone十年間每年進化一次,科技十年間可以發展咁快,未來十年一定比你而家可以想像更加嘆為觀止,一係電子產品勁到你唔信,一係因為打仗令你見識軍用科技。十年後見真章。

特首選戰,林鄭對財爺應該係今屆戲碼。呢套戲,如果你相信梁特係後期俾人吩咐唔好連任,即係表示不得不重新考慮嗰個其實係替補,目的係唔好俾一早諗住出閘嗰個自動當選。假如吩咐唔好連任同叫人出閘嘅係同一幫人,咁你就應該推論出,替補嗰個其實係出嚟執死雞,學上屆一樣,博欽點靈童一時大意,做錯事失去上帝支持(上帝應該係講普通話)。

好打得鬥好hea得

兩位司長開波唔係鬥政綱,係鬥人品作風。你睇而家傳媒口誅筆伐,邊有政綱,全部都係佢兩位過往做事風格。由好打得鬥好hea得,香港人係用印象嚟評分。

林鄭傳聞中嘅選舉班底係四正啲嘅建制中人, 騎呢左派只限於外圍叫囂。不過,班底唔見得係選舉高手,唔似可以有好橋做啲省鏡嘅事情,除非佢哋手握黑材料。

財爺hea到而家都未見班底,一係俾人撬得七七八八,一係就講出嚟就嚇死人。其實,過去4年香港人嘅遭遇已經幫財爺助選。林鄭接收梁粉班底, 左報力撐,西環發功,等於話畀人知佢係梁特替身。香港人過去4年受太多梁特病毒感染,自身產生抗體,對任何梁特借屍還魂甚有戒心。

原本林鄭可以反駁外界將佢抹黑,打成梁特二號。但係佢嘅競選工程咁多梁特影子,水洗都唔清,香港人好不容易換走個梁特之後,點夠膽送佢嘅替身入局?從林鄭看見梁振英影子,這感覺太過恐怖;咁難得逃離火坑諗住重新做人,如果仲走去識個古惑仔諗住有好日子過,咁白癡同自甘墮落,真係幫你唔到。

我希望有血性嘅香港人,千祈唔好自甘墮落。

#方卓如 #港股分析 #方如玉帥 - 千祈唔好自甘墮落
千祈 祈唔 唔好 自甘 墮落 方卓 卓如
PermaLink: https://articles.zkiz.com/?id=326422

上帝早有預備 方卓如

1 : GS(14)@2017-02-11 23:34:28

2017-01-17 HJ

調查顯示全世界最有錢的8個人,財富等於地球一半人總和,咪話唔誇張。相信同類調查放在香港,結果都係相似,最有錢嘅8個人,財富總和多過一半香港人。點解咁肯定?香港入息中位數係萬五蚊左右,一個月萬五蚊,你供唔起樓。過去十年如果冇樓喺手,好難累積財富,冇可能同頭8名有錢人鬥。

全世界最富有8個人當中,有一半都係拜科技所賜而帶來財富,從事科技有關嘅事業。香港頭8名有錢人,必定係同地產有關,冇地在手嘅唔會做到有錢人。從事科技嘅靠腦,從事地產嘅靠資本運作,借到賺到還到。一句講晒,要成為全世界最有錢嘅人,蠢啲都唔掂;但要喺香港做有錢人,蠢啲仲好,只要默默地借錢、使錢、賺錢、還錢,餘此類推,大環境就會迫使你成為香港有錢人,冇乜特別技巧。

聰明啲會點?如果聰明到好似講普通話嘅上帝咁,佢會點做?首先佢梗係知道地球對佢有乜作用,香港呢處咁細嘅地方自然都唔例外。佢明白香港有乜用處,搵邊個僕人去看管呢處地方佢梗係心中有數(叫得上帝,必定有好多凡人侍奉佢)。早前侍奉開佢嘅僕人,個個都估佢一個坐定粒六繼續冧莊,凡間個個初四咁嘅面口,食飯都嗌少碟餸。點知上帝唔知幾時發功,令僕人自己走出嚟話唔撈,令凡間十分驚喜。凡間以為,僕人唔撈,一定上帝覺得佢唔夠票。但事實係,夠膽唔畀面上帝嘅,唔會超過三分之一。上帝未必控制晒全部投票嘅人,但可以控制想攞票嘅人。只要上帝唔畀人同僕人爭,佢點會唔夠票?況且僕人揸住支雞毛掃,有點似方丈,唔係咁多人夠膽得罪佢,有5年時間慢慢玩殘你。所以話,僕人唔撈,只係上帝另有想法,同凡間有冇票無關。

僕人唔撈,僕人嘅奶媽想頂上,侍奉上帝。如果你係上帝,你會點諗?僕人都得罪了上帝,奶媽跟從僕人的足跡但求博取歡心,點解唔乾脆留用僕人,要用奶媽?上帝咁令人意想不到,令僕人自己唔撈,全城歡?,會唔會再顯神蹟,連自我製造欽點假象嘅奶媽都剿滅埋,令香港驚喜一浪接一浪?到時候,以往香港人捱嘅所有悶棍,證明完全唔關上帝事,只係僕人團隊自把自為搞出嚟,咁香港人拜服上帝嘅心更加濃厚,呢樣會唔會先係上帝真正意旨?如果屬實,上帝玩政治嘅手段真係出神入化,凡人除咗疊埋心水搵錢超越入息中位數,我諗唔到仲可以有乜嘢其他路數。

#方卓如 #港股分析 #方如玉帥 - 上帝早有預備
上帝 早有 預備 方卓 卓如
PermaLink: https://articles.zkiz.com/?id=326423

撤辣等於推冧市 方卓如

1 : GS(14)@2017-02-11 23:35:34

2017-01-19 HJ

恒生指數收報23098點,升257點,成交684億元。而家股市,升冇人肯買,跌冇人敢買,大量等住投資嘅資金積壓銀行。香港從來投資工具只係得股票同買樓,債券係富戶私人銀行嘅專利,唔係普通人可以參與。

點解樓價不斷「加辣」後都係不斷咁升?好大程度上係差唔多成年幾都冇人肯買股票,惟有用啲錢嚟買樓。

「加辣」唔係抑壓需求,其實係打擊二手樓供應。先賣後買嘅,會驚自己買唔番。先買後賣嘅,又怕限期前賣唔走要畀重稅。二手供應因為辣招而減少已經係事實,二手供應減少,造就發展商賣一手樓有定價權。每呎發展成本愈嚟愈貴,如果發展商冇定價權,要跟隨二手市價開售,唔一定有錢賺。如果二手供應充足,而家嘅劏房樓同無火煮食盤點有可能賣得出?

股票唔敢買 睇穿辣招係托市

辣招同汽車首次登記稅唔可以相提並論,辣招係唔會假以時日令人習慣唔怕辣。汽車首次登記稅,你問十個買車人士,九個都答唔出,第十個都要諗一諗,因為稅項已經完全地融入車價之內,冇人分得出車價同稅款。買樓唔同,樓價還樓價,印花稅自行負責,而且印花稅同其他使費,正常地不能夠計入按揭借埋一份。呢條實牙實齒要畀嘅使費,永遠會影響買家購買能力,唔存在有如汽車登記稅,時間會令你麻木。

換言之,辣招就好似創業板全配售嘅操作一樣,貨疏,冇人想沽,價錢自然天咁高,成交薄弱。假如撤辣,猶如創業板股票突然批股出街,市面多了一批想沽嘅貨,一定推冧個價。到時一手樓冇咗定價權,二手樓又爭相踐踏搶奪購買力,樓價就會有如創業板股票直線下跌,愈跌愈冇人接。辣招,唔係用嚟遏抑樓價,係用嚟托市。點解最近嘅新盤推出市場畀人瘋狂搶購?因為市民睇穿政府托市,股票又唔敢買,除咗買樓,仲有乜嘢選擇?

梁特最後一份《施政報告》,佢話所有競選承諾已經實踐。有幾多係講咗等於做咗,做咗但未做足,唔係太多人關心。反而佢競選承諾冇講,任內做突做得過火嘅,就令人印象深刻。從政人士唔好標榜自己有幾勤力,有幾擔當,政治首先就係講觀感,講印象,同揀女婿差唔多。後梁特時代,公眾唔係先睇政治人物能力高低,否則立法會議員起碼有一半係選唔到。

公眾首先留意嘅,係對政治人物嘅印象,印象行先,印象決定,全世界都係。政治人物嘅選舉工程,其實係形象工程。你包裝好打得嘅形象得,好有擔當又得,好親民都得。大家鬥形象出眾,能力反而其次。尤其是後梁特時代,有能力唔代表會益你,隨時害你。目前幾個未來特首候選人,形象完全唔同,今屆花生指數最高。

#方卓如 #港股分析 #方如玉帥 - 撤辣等於推冧市
撤辣 等於 方卓 卓如
PermaLink: https://articles.zkiz.com/?id=326424

要唔要移民睇呢鋪 方卓如

1 : GS(14)@2017-02-11 23:36:14

2016-01-20 HJK
薯片終於等到今日,可以正式宣布佢點解要辭職。睇佢篇演辭,就知佢班底仲有能人,未俾人撬走晒。佢嘅班底夠貼地,知道而家香港最大問題,唔係冇地起樓,唔係老人家嘅長生津,都唔係強積金有冇對沖,而係連中年人都頂唔順要諗住去移民。移民代表咗市民心死,對未來生活冇信心,係經濟、社會、教育、政治問題嘅總和,簡單講呢處地方要衰無可衰,住咗幾十年嘅人先會諗到要移民。薯片參選嘅主旨,就係唔想香港人要走,概括晒下任特首第一任務指標。呢篇演辭夠晒貼地,薯片嘅團隊寫得出,佢自己又覺得對辦敢用,喺一場最講形象嘅選舉工程,佢贏晒其他3個參選人。

薯片同奶媽最大分別,薯片真正睇得到香港嘅現況,奶媽仲係迷戀緊長官意志。薯片話而家香港最重要休養生息,奶媽就話自己有為、主動、唔怕向前衝。香港過去4年正正係內鬥到遍體鱗傷,未來就係要唞唞打少陣交,重建番失去咗4年嘅信任。講就好似好廢話,但係香港人已經怕咗自以為是、一味要快,做一啲香港人唔想要嘅事情。網上一面倒讚薯片演辭好,背後有人,但最重要係薯片真係知道香港人要乜。

奶媽嗰邊嘅人都唔係儍,見到薯片後發先至,令人眼前一亮,民望大升,好快就會轉打感情牌,減少有為形象,仲會急速同梁特梁粉切割。以往幫過梁特助選嘅梁粉,唔會再企得太前。要知道,而家奶媽嘅「梁特二號」形象係由佢一手造成,由西環同梁粉為呢個形象加固,再給薯片高格調香港人嘅形象比下去,奶媽民望好難超越薯片,除非後者有醜聞。上屆嘅教訓,唐唐係被欽點嗰個,梁特係靠民望同唐唐自己拙劣嘅表現得到最後勝利,民望係重要因素,雖然可以投票嘅不足千二人。

民主派如果出選,就等於幫奶媽助選。300票嘅民主派,未必足夠造王,但有如廿一點守尾門,有機會連累全部人輸畀莊家。

仲有兩個月,香港人要唔要移民,睇呢鋪。

#方卓如 #港股分析 #方如玉帥 - 要唔要移民睇呢鋪
要唔 唔要 移民 睇呢 呢鋪 方卓 卓如
PermaLink: https://articles.zkiz.com/?id=326425

世界變成你死我活 方卓如

1 : GS(14)@2017-02-11 23:37:29

2017-01-23 HJ

傳聞中被欽點嘅參選人,唔敢開Facebook,唔識用八達通,同人講參選就係唔想選中個中央唔會任命嘅人,個人氣質封閉兼離地。佢而家正正步緊上屆唐唐嘅後塵,成為一個面目可憎嘅「疑似」欽點人士。

歷史經常重複自己,只係演員角色有所不同。有人唔介意代入上屆唐唐嘅角色,希望今屆千祈唔好再出現個呃到民望上位嘅參選人。

特朗普第一篇總統演說,重複佢以前競選時候嘅演說。佢全靠講啲美國人啱聽嘅說話上場,所以呢篇總統演說都係最易明嘅一篇,毫無深奧嘅政治理念,劈頭第一句就係鬧啲華盛頓政客。可憐一班坐喺佢後面嘅黨友,一律要笑笑口陪佢拍手掌。要美國再強大其實唔難,只要唔理別國死活就得。打貿易戰、保護主義,逼企業回流美國,就係要整窮人哋、富有自己。

望發達 唔好望樓價跌

特朗普要大興土木,必須要發債借錢。要美國強大,首先就係繼續先使未來錢,唔諗住還錢。全世界資源就係得咁多,你今日要用,若非明天慳啲使,就係要叫其他人放棄佢哋手上資源畀你霸佔使用。

特朗普政府就係奉行呢種強盜思維,不理世界死活,總之美國大晒。佢嘅治下,世界唔會比今日活得好,美國亦唔一定可以得益,世界將會變成你死我活,我哋市民要懂得靈活自求多福。

荃灣新盤開售,有剛拿到身份證的內地人入市。辣招可以對付外地買家,但外來融入香港的買家,並不受辣招影響。外來融入香港嘅購買力,先至係未來無懼樓價新高直闖入市嘅最強動力。香港樓價點高,都唔夠內地樓價嚇人,二手市場活躍,幾乎係一攞到身份證,第一時間就去買樓。

一日股票冇得炒,買樓就成為香港唯一投資工具。2003年沙士,香港百業蕭條,失業率接近百分之十,樓價係跌剩九七高位四成。未來仲有冇沙士呢類死亡危機?失業率會否升至百分之十?是否繼續有新香港人入市買樓?地心吸力適用於升空火箭,但係人造衞星係長期喺天空橫行,唔一定跌番落地球。但記住,如果有日人造衞星跌落地球,就會造成大災難。

前輩話你最好望自己發達都唔好望樓價跌,而家你最好望有個有錢老竇,咁就樓市升跌都唔關你事。

#方卓如 #港股分析 #方如玉帥 - 世界變成你死我活
世界 變成 你死 死我 我活 方卓 卓如
PermaLink: https://articles.zkiz.com/?id=326426

房地產猶如債券 方卓如

1 : GS(14)@2017-02-11 23:38:48

2017-01-24 HJ
特首選舉話題圍繞在一卷廁紙,層次似乎低到無可再低。但留心,就算做得官太耐,變得離地天真,佢身邊嘅團隊唔會無知到發現唔到為咗廁紙返官邸會俾人笑到面黃。好明顯,廁紙係用嚟轉移視線,等市民唔記得咗佢咁囂張,參選就係為咗唔會選出一個中央不能任命嘅候選人。佢比摩連奴更寸,意思係除咗佢老細同佢自己之外,中央唔想見到其他人做特首,宣示欽點命令到直情露骨。佢就算再離地,都冇理由唔了解香港人對欽點、操控、內定恨之入骨。奶媽選舉唔用Facebook,只係用黃袍加身一招,逼香港人同選委硬食,如此選舉,目中無人。

股市點都要回一回氣

美金自特朗普上場之後強得恐怖,但喺「美國優先」嘅政策下,美金太強唔符合美國利益。工廠開始回流美國,連鴻海都話計劃去美國設廠造iPhone,強美元之下,邊個會幫襯買iPhone?強美元之下,美國跨國企業嘅海外盈利縮水,好難支持到道指二萬點。換言之,特朗普當選後的美元升值,假以時日就會俾佢用威嚇手段壓番落去。

美股自11月開始,兩個月升咗2000點,超過10%。美股基本因素要改變到值得升2000點,要特朗普重手減稅,大幅借貸狂灑金錢,還要全世界學似特朗普要求只買美國貨。所有事情就算的確會發生,到真正見效都唔係一時三刻。換言之,炒預期嘅股價好快到位,不過見真章嘅時間就會超過大家嘅忍耐能力。特朗普上場幾日,當佢宣布萬眾期待嘅「美國優先」實際政策,一係符合預期,一係差過預期,兩者都會令美股頂唔順回落。除非佢公布嘅政策,勁到連市場都嚇一跳,咁就可以再直衝上去,一浪高於一浪。美股跌,市場氣氛唔好,港股會跌;美股升,原因係要殺低晒其他國家,港股都冇乜運行。結論係,股市興奮升咗一陣,點都要回一回氣,重歸一個可以彈升嘅起點,先有下一次炒股票嘅良機。

香港只有股票同房地產兩樣平民百姓投資工具,股票冇得炒,資金只有走去買樓。喺香港買樓,你唔只應該用房地產角度睇呢樣投資,其實係另類債券市場。分別只係債券買咗之後,票息率就固定,就算價錢下跌,收嘅票息係唔會改變。收租會多會少,價錢升,收租更多;價錢跌,收租更少,賺就賺盡,輸就輸凸。但係債券可以default,收唔番本,房地產永遠唔會變零,點跌仲有渣剩。缺乏投資渠道嘅香港,唔買樓仲有乜選擇?所以買樓嘅「剛性需求」,在於香港沒有投資選擇,有錢冇碇使。要樓價跌,先要香港人冇閒錢,冇錢投資。去到咁嘅地步,你都冇運行。所以前輩講得啱,望自己發達都唔好望樓價跌,雖然今日要發達好難。

#方卓如 #港股分析 #方如玉帥 - 房地產猶如債券
房地產 房地 猶如 債券 方卓 卓如
PermaLink: https://articles.zkiz.com/?id=326427

逃避雖可恥但有用 方卓如

1 : GS(14)@2017-02-11 23:40:51

2017-01-25 HJ

猴年仲有3日就完結,返多3日工就過年。老咗自然覺得時間過得快,不過今年每個人都話係特別快。猴年令你目瞪口呆嘅事情接二連三,雞年就係呢啲令你目瞪口呆事情見效嘅一年。

市場對於意外事件,第一個反應係嚇驚,爭相離場逃命。第二個反應係定一定神,回頭望望,睇吓自己逃跑得啱唔啱,是否正確。第三個反應,就係修正自己第二個反應。如果逃跑係啱,可能要嗱嗱聲再跑遠啲;萬一逃跑係錯,分分鐘你要走番轉頭,返番入去。猴年係馬騮仔態度,要靈活多變。逃避雖然可恥,但避過風頭之後,發覺自己錯誤,要勇於認錯做番轉頭。雞年含有宰割意味,唔係你劏人,就係人劏你。

世界權力大挪移

特朗普上場,三扒兩撥,就行政命令,立新項廢舊法。佢選舉時候講到天花龍鳳,而家佢就話你聽嚟真。雞年撞正呢個仇視傳統政客、不依政治傳統、無跡可尋嘅總統,肯定令你遇上許多你劏人或者人劏你嘅機會。佢係生意人,喜歡明買明賣,任何你以為無法改變嘅事物,佢都可以用嚟交換。中國睇到特朗普係會搞亂世界秩序同勢力平衡,所以習大大都要去達沃斯,取代美國要成為世界互惠社會嘅領袖。未來幾年,美國愈嚟愈多敵人,中國嘗試招攬多啲朋友,剝花生唔止淨係睇特首選舉,地球勢力乾坤大挪移都係雞年將會發生嘅事。

漢能(00566)收到復牌條件,除咗要找咗條應收賬,仲要你詳細交代盤生意係啲乜嘢嚟。叫人中伏可以有好多方法,但係開宗明義得咁純真就好少見。如果條應收賬收得到,盤生意可以講得清楚,點使停牌?盤生意就係唔清唔楚,條街數遲早有日會唔見咗,股價先可以有支持地直線上升。記住,佢唔係普通嘅炒股票,係炒到超越本地富豪嘅境界。人造衞星唔肯跌落地球都未算誇張,直指太陽就預咗遲早會被消滅。

最重要係,還清條數,交代清楚盤生意,都話唔一定復牌。咁如果一個人可以有一剎那成為首富,會唔會蠢到擺個頭畀你剁而幻想復牌?

答案係,呢隻股票正步向除牌方向。

#方卓如 #港股分析 #方如玉帥 - 逃避雖可恥但有用
逃避 可恥 有用 方卓 卓如
PermaLink: https://articles.zkiz.com/?id=326428

道指破二萬唔值得開心 方卓如

1 : GS(14)@2017-02-11 23:42:30

2016-01-26 HJ
昨日嘅大新聞,係道指首次突破二萬點。好可能在今年之內,道指就會超越恒指,情形就似當年恒指超越日經指數一樣。以前世界股票市場嘅互動性好高,大家都係齊升齊跌,全球整體朝去一個方向邁進。2017年好明顯唔再係齊升齊跌,將會係你升我跌嘅零和遊戲。2009年開始,世界股票上升係由資金泛濫帶動,全世界印銀紙,借貸成本極低,公司容易借錢回購股份,令股價上升。低息環境,令公司派息毋須太慷慨都可以吸引資金入市,令全球股市易升難跌。2016年,印錢印到盡頭,大家擔心無以為繼。特朗普當選,美股找到繼續上升嘅原因,就係政府代替私人公司借貸,繼續讓上市公司有新嘅資金來源。增加政府開支,減少企業稅率,令上市公司多做生意,交稅卻減少,變相增強企業手上現金,回購又得,投資又得。開大水喉同時又減稅,美國政府惟有大量發債應付財赤。政府借錢補貼企業,解釋咗點解加息反而令美股上升,因為負擔加重嘅唔係私人企業,係美國政府。

企業得到美國政府補貼,下一步就係要進軍世界。強美元不利做生意,但係對收購資產就非常有利。滙水已經令美企有買平貨嘅便利,要再進一步執筍貨,就要推冧其他市場嘅資產價格,咁就可以上下其手,予取予攜。有理由相信,特朗普政府有計劃地殺低其他國家嘅資產市場,甚至唔介意製造一次金融危機。

要知道,每一次金融危機,都係資產轉移嘅良機。而家美國最有實力應付任何金融問題,道指跌夠兩成都仲有萬六點,而且金融危機之下,最受歡迎嘅資產就係美債;又有人肯借錢畀你,又有機會出外執平貨,金融危機直情係特朗普手上最強武器。道指升破二萬點,美國以外嘅國家,其實唔值得開心。

上屆唐唐要到提名過後,選舉後期先至成為人見人憎,選唔落手嘅候選人。今屆奶媽已經超越唐唐,由考慮參選就令人生厭,更在宣布參選後將厭惡程度推上高峰。佢嘅新聞特別多,但離奇在全部都係負面新聞。新近就有據報某選委話唔撐奶媽就係反中央。由奶媽自己講怕中央唔任命當選人,再到奶粉出口術恐嚇選委,所有香港人近年討厭嘅惡行,都可以在奶媽團隊找到。

對手毋須發掘黑材料,奶媽自己團隊大量提供, 令人大開眼界。都話咗,選舉其實同玩廿一點差唔多,唔使自己贏,可以等對手爆煲。奶媽而家呢鋪牌,係莊家16點焗要,成枱人等緊睇佢爆煲。

#方卓如 #港股分析 #方如玉帥 - 道指破二萬唔值得開心
道指 破二 二萬 萬唔 值得 開心 方卓 卓如
PermaLink: https://articles.zkiz.com/?id=326429

新年好過舊年 方卓如

1 : GS(14)@2017-02-11 23:43:43

2017-01-27 HJ

「方帥,恭喜發財。好少見你留港度歲,唔係最近手緊啩?」

「草蜢仔,適逢亂世,你仲去得邊?日本有輻射,曼谷泰王駕崩,歐洲有難民兼恐襲,睇北極光嫌凍,非洲睇動物唔啱時間,南美洲有寨卡,美國太貴。諗嚟諗去,已經年三十,無謂畀咁貴,過年後先飛,你可以嚟逗利是。」

「好喎方帥,你今年賺咁多,封利是一定好大封!」

「仲好講,年頭賺埋,年尾賠番,計落唔知有冇輸凸。最慘係,唔關你事都要你賠,講起都有啲想喊。不過,草蜢仔,做得你呢行,身家升升跌跌好平常,有時上啲,有時落啲,唔好日日計住,心情就可以舒泰啲。你食飯交租,一年都係嗰個數,應該餓你唔死。

「十二生肖,總有幾年旺,有幾年犯太歲,同市場一樣,唔會一支箭向上飆,必定起起伏伏。聽到你咁樣安慰我,當堂開心番晒。」

「我冇講嘢喎方帥,你自己一輪嘴,問吓你封利是啫,咁我嚟唔嚟拜年好?」

「好問題。以前我?仔年代,真係拜年拜足兩日,由朝到晚,搭地鐵轉的士,見晒啲一年見一次嘅親戚。而家?拜WhatsApp微信所賜,隔空拜年,我而家都唔知啲親戚住喺邊。連利是都可以手機過數,將來再冇避年呢支歌仔唱。你走到去西伯利亞,只要有Wi-Fi,你都要封利是。」

「咦,好喎,連盒餅都慳番。方帥你咁先進,咁我唔使舟車勞頓,當拜咗年,等你封利是,祝你新年快上,身體健康。」

「快上就一定喇,雞年一定快上快落。你盡快擸啲資產喺手,乜都好,總之雞年年頭可以炒到飛起。紙上富貴係冇用嘅,年中就要開始走,因為所有刺激市場已經麻木,而且陸續有人覺得賺夠,貪心被恐懼取代。丁酉雞年,係一隻扎扎跳嘅雞,甚至係一隻癲雞,會嚇親好多人。周四恒指彈升,唔止係響應道指破二萬,更加係特朗普驚喜一浪接一浪。市場反應係即時亢奮,轉頭冷靜,繼而修正。趁亢奮時代,嗱嗱聲搶錢。

「身體健康就梗係要啦,最近有啲帶挈細佬嘅前輩,轉眼間話走就走。錢係帶唔走,最緊要同身邊人開心,唔好後悔。即係開頭嗰句,賺過轉眼要賠,係就係肉痛,但最緊要行得走得,總有機會賺番轉頭。

「草蜢仔,祝你新年好過舊年。」

#方卓如 #港股分析 #方如玉帥 - 新年好過舊年
新年 好過 舊年 方卓 卓如
PermaLink: https://articles.zkiz.com/?id=326430

世界變成零和遊戲 方卓如

1 : GS(14)@2017-02-11 23:45:23

2017-02-01 HJ

恭喜發財,出入平安,身體健康。過年前聽新聞有個富豪中風入院,又有個富豪正在國外就醫,就知道過年對人最大嘅祝福,就係祝各位自己及家人身體健康,無災無禍。今個新年最大驚喜,就係可以下午時分喺電視睇拿度對費達拿嘅網球決賽。今屆可以親身入場睇澳網決賽嘅人,賺晒!呢場係會列入史冊嘅經典,睇怕以後都唔會再有同級數嘅比賽。望住電視機,明白何謂不許人間見白頭。以往一頭野性長髮嘅拿度,而家梳咗個九一分界;費達拿就額前一執河童薄髮,佢兩個只係一個30、一個35咋, 令我不禁趁廣告時間照一照鏡。頭髮可能保唔住,但球味依然,其他球手係絕無佢哋兩個嘅明星魅力,所以你已經好耐冇睇過網球比賽。運動係娛樂事業,需要明星撐場,再要搵番「雙拿」級數嘅網球明星,難。你唔出街睇煙花都要留喺屋企睇電視,選對了,以後你將會有長時間提唔起興趣睇網球。

港保護牆已消失

內地富商肖建華據報被帶回內地,然後自行發聲明指自己正在國外養病,身經百戰的香港人已經知道是什麼一回事。有冇睇過美劇《權力遊戲》(Game of Thrones)?北方極寒之地有道城牆,用來阻隔野外妖魔鬼怪來襲;本來深圳河就係一道保護牆,香港可以保障內地人自身同財富安全,所以咁多人千方百計要張香港身份證是有原因。但係李波同肖建華事件,證明呢道保護牆已經唔存在,明知自己身犯險境嘅,要走唔該走遠啲,唔會再畀你又安全、又可以近距離繼續搵錢咁着數。用什麼方法令你離開香港已經唔重要,你身處嘅香港唔係安全地方先係重點。

特朗普行政命令,禁止7個「伊斯蘭國」國民入境,有簽證同有移民批准嘅都要遣返,唔止觸發示威,仲令道指跌穿二萬。以一個選舉當選人來說,佢實踐競選承諾嘅速度可以話係破晒紀錄,未夠半個月已經話你知佢講過嘅狂言原來唔係吹水。當選前有大量人懷疑佢只係學梁特一樣,講咗當做咗,必定走數,美國始終會行番咁多年嘅舊路,唔到佢惡得出樣。事實證明,佢真係相信佢講過嘅狂言,嚟真,而且要盡快完成,唔等。

美國要整窮鄰居

道指跌穿二萬可能係驚一驚,到佢大興土木嘅政策出籠,又會掉頭升番。但美國以外嘅地方尤其中國就要驚,因為競選時候,佢口中最大敵人就係中國。佢唔守規矩嘅癲狂,起墨西哥圍牆已經盡顯一斑,將來同中國開拖只係時間問題。全世界都排隊約見同致電特朗普,唯獨是中國冇,即係是但一方唔想咁早接觸,睇定啲先。

美國優先嘅政策,令特朗普有恃無恐,因為美國優先,說穿了就係整窮鄰居,beggar thy neighbour嘅意思。如果咁易就可以令道指上升2000點,奧巴馬一早就行咗,使鬼等你特朗普當選後俾你攞彩?就係因為左派有憐憫之心,唔想自己食晒,總會留番啲餸頭餸尾畀隔離鄰舍。特朗普不理別國死活,環保唔理、移民團聚唔理、別國經濟唔理,要盡收天下資源據為己用,自私自利自然帶動股市上升。但真正落實,全世界就對付你,而家已經陸續浮現。世界並冇免費午餐,美國都冇。當選後突然間就一片繁榮,耶倫愁咗咁多年,換一個人做總統就問題全消?講你都唔信,只係張單由邊個找數。世界發展到今日已經係零和遊戲,唔再係戰後世界一齊重建繁榮。美國要享福,總有國家要受罪。雞年會發展成點,唔知,畢竟只係過咗4日咁大把咋。

#方卓如 #港股分析 #方如玉帥 - 世界變成零和遊戲
世界 變成 零和 遊戲 方卓 卓如
PermaLink: https://articles.zkiz.com/?id=326431

香港人生活東京化 方卓如

1 : GS(14)@2017-02-11 23:46:29

2017-02-02 HJ  

恒生指數收市微跌42點,雞年唔可以紅盤高收開局,完全係因為美國總統特朗普,佢兌現競選承諾令猴年最後一日狂升,自然令雞年第一日容易下跌。命理運程我相信,只係唔相信現世還有高人真正掌握計算方法,上帝代言人亂講唔代表冇上帝。

特朗普如果掉轉競選承諾兌現嘅次序,就會影響雞年紅盤高開定低開,甚有風水命理意味。一如過往所說,特朗普美國優先政策,就係不理別國利益,整窮鄰國。美國愈好,世界愈衰,千祈唔好望道指再創新高。

香港政府過去4年,致力令房地產唔再係投資工具,純粹自用,貫徹國家政策,房子用來住並非用來炒。用意正確,但過去4年嘅大環境,反而令香港房地產更加唔係人住。錢多息平固之然係罪魁禍首,但香港缺乏投資工具先至係最大原因。自從大時代來得快去得快,中央政府暴力救市,債轉股處理不良資產,再加上香港股市監管步向A股化,普遍市民對港股嘅投資意欲跌至近乎零,只有職業投資者先有動力買股票。

兩代合力供一層樓

香港市民,就算未至於坐擁大量現金,都要為手上剩餘銀紙找尋出路。房地產在香港人眼中,其實等於債券,保證有回報,絕對唔會債務違約,冇可能停牌。股市不濟,造成樓市獨旺。再加上辣招減少二手供應,令發展商可以睇住嚟食,度身訂造「納米樓」,榨乾市場最下層的購買力。辣招已經成為托市嘅支柱,情形就似量化寬鬆,一旦開始,易放難收。

香港開始東京化。你睇日劇,日本人住嘅單位係開放式,冇廚房。對日本人影響甚微,佢哋煮食冇乜鑊氣,油煙唔大。香港人又煎又炒,屋內製造霧霾,開放廚房即係叫港人廚藝失傳,只可以買外賣「叮」番熱嚟食。日本人朝行晚拆,床都冇張,香港人唔慣瞓地,但可以買張梳化床,實行早坐晚卧。

自細我哋已經聽過,東京買樓要三代人合力,實情是否依然如此,唔知。但香港人買樓一定係兩代人努力,已經係鐵一般事實。父母一輩自己層樓供滿,再按或者用老本為子女提供首期,甚至用子女名字買多層樓,由下一代供款。兩代人負責一層樓,成為了香港現實,實現了當年東京嘅傳聞情況。

除咗樓房東京化,生活都係東京化。東京人住市中心外,搭公共交通工具往市內上班。你早上到東京地鐵站觀察,看見的是一班營營役役,雙目無神嘅行屍走肉打工仔。在食肆,你見到一個個獨自吃飯嘅東京人,吃碗麵、食碗飯,似足汽車排隊入電油。香港接近,早上地鐵你開始要等幾班車先可以成功逼入,你住得比你童年居所遠得多,是你10歲前學校旅行才會到的地方。

用膳如排隊入電油

午飯時間如果你冇帶飯,你吃車仔麵或茶餐廳, 價錢愈嚟愈貴。東京仲可以有少許活力,小店老店特色店仍然可以生存,香港只剩下大集團連鎖店,香港人其實比東京人更似排隊入電油。

香港人生活東京化之後,香港命運會否步東京後塵,房地產爆破然後踏入衰退漩渦?我唔識算國運,唔知,但特朗普上場兩個星期後,我相信大家唔需要諗得太長遠,過年前後變化已經可以極大。見步行步,唔好想得太遠,成為雞年最真心嘅祝福語。

#方卓如 #港股分析 #方如玉帥 - 香港人生活東京化
香港 生活 東京 方卓 卓如
PermaLink: https://articles.zkiz.com/?id=326432

買樓用嚟教仔 方卓如

1 : GS(14)@2017-02-11 23:47:28

2017-02-13 HJ
「方帥,恭喜發財,祝你今年精神爽利,早啲搵番主好人家埋街食井水,唔好再幾十歲仲要人哋派利是畀你。」

「草蜢仔,我上年準備好嘅利是,今年都仲响櫃桶度,攞番出嚟又派得。只要利是長期keep住廿蚊公價,睇怕我仲有幾年唔使去銀行換新銀紙。」

「過完年你應該好唔得閒喎方帥,有乜大計?」

「大計?見步行步啦梗係,世界唔到你點去計。呢幾年住喺香港好似特別令人心煩,淨係冇個幫你畀到首期嘅老豆,冇父幹,已經令好多後生仔好煩,唔好講話邊個做特首,香港將來點搞。

有債在身冇議價能力

「其實,多啲留意世界事情,甚至毋須出外走走, 都可以令你紓緩心情,唔會俾啲小事頂心頂肺。例如特朗普要通過最高法院大法官提名,見共和黨唔夠60票,諗住叫參議院領袖改議事規則,降低到50票搞掂;要通過官員任命,必須要有個民主黨人參與委員會表決,避免民主黨人杯葛阻礙提名,改例,共和黨人自己搞掂算數;署理司法部長阻頭阻勢?炒,換個聽話嘅,搞掂。美國係民主社會嘅典範,都正在步向唔要受民主束縛嘅方向。你生存喺極權社會下最自由嘅城市,諗諗吓你應該開心番晒,因為你享受緊本來應該冇嘅嘢之同時,地球另一邊有啲人本來享受緊嘅嘢正在慢慢消失。」

「美國咁遠關我鬼事,但係冇父幹又的確幾煩, 睇怕我都冇機會上車買樓。」

「草蜢仔,我都知你只係睇錢份上,其他生活質素嘅嘢都唔會點理,正正係一個順民嘅最佳條件。有乜嘢好過全部人乖乖地上班下班,搵錢供樓?有債在身嘅人,最冇議價能力,最冇野心,亦唔敢有夢想。你老豆嗰輩冇人講夢想,只係講搵食。而家豐衣足食年代,要呢一輩人營役,惟有要佢孭一層樓,否則個個後生仔只會諗自己想做乜,日日匿响屋企打機都可以係發掘未來事業路向,所以連家長亦唔介意出首期,用子女個名買樓,等佢哋搵錢供樓。買樓嘅剛性需求,除咗係住或者投資,近期仲有教仔功能。」

「嘩,方帥,點解我冇個咁嘅老豆教吓我?」

#方卓如 #港股分析 #方如玉帥 - 買樓用嚟教仔
買樓 樓用 用嚟 嚟教 教仔 方卓 卓如
PermaLink: https://articles.zkiz.com/?id=326433

假戲真做都要做得漂亮 方卓如

1 : GS(14)@2017-02-11 23:48:39

2016-02-07 HJ

選舉可以係假,但質素高低係真。特首選舉就算係假戲真做,你都睇得出邊個做得投入、做得漂亮。好多嘢未必係參選人自己嘅主意,但最後拍板嘅一定係參選人自己。

物以類聚,什麼參選人就引來什麼競選團隊,品味個性唔係淨係用錢可以搞掂。當然,香港人5年前被騙過一次,競選漂亮,執政可以醜陋。講過嘅說話可以唔算數,競選時候嘅笑樣,當選後可以變成惡相。

特朗普應該係破紀錄最遵守競選承諾嘅候選人,當選之後每星期(若非每日)都有行政命令,落實佢競選時候講過嘅說話。政綱?唔使一定係寫幾版紙、長篇大論先叫做政綱,集會講得興起、台下拍爛手掌嘅,都可以係政綱。

乜嘢係政綱?只不過係總結所有講過嘅承諾。而家4個特首參選人,都喺唔同場合講過某些承諾, 有實有虛。唔可以話參選人政綱未出,只可以話等緊佢哋白紙黑字寫晒出嚟,方便比較同未來追數。

金融市場 零和遊戲

最新嘅特朗普命令就係要檢視金融規管,包括Dodd-Frank法案。金融海嘯之後嘅Dodd-Frank改革,就係要避免金融危機再次發生,減低金融機構炒得太勁而令市場崩潰,要政府負責。特朗普上場,息口上升,金融鬆綁,大利銀行券商再發大財,同時亦都埋下另一次爆發金融危機嘅炸彈。

金融市場係零和遊戲,你輸我贏,但呢個零和遊戲係喺升降機入面進行。可以大家嘅資產價格一齊升到上天嚟財富轉移,亦可以大家跌到落地底先嚟資產大挪移。每次金融危機都係資產轉移嘅大機會,但同時間全部人都會經歷身家縮水。

3個月前全世界都牙痛咁聲,無晒計,唔知點樣先可以帶領世界走出經濟不景氣,同埋拆解人人掛在口邊嘅潛伏大爆煲。

3個月後嘅今日,突然間全世界都開心得跳起,殺到雙眼通紅,迎接經濟強勁嘅勢頭重臨。原來解決經濟問題,就係要有個人夠膽不理世界同下一代死活,再借再使,以呢一代美國人開心為目標,隊冧別國亦在所不辭。好難令人相信纏擾咁多聰明人嘅難題,一個生意人上場就可以迎刃而解。

可以肯定,以往你成日聽見嘅問題並無消失,只係掃咗落地氈底。但唔緊要,一如以往所講,未爆嘅危機就等於冇,太早估中比估錯輸得更慘烈。

千祈唔好智者千慮,諗住世界搖搖欲墜而去保守行事,反而應該投入不理性亢奮,走入去賺埋一份。因為你要賺到夠,先可以捱到下一次全世界身家大縮水,同埋避免財富被轉移。

#方卓如 #港股分析 #方如玉帥 - 假戲真做都要做得漂亮
假戲 戲真 真做 做都 都要 要做 做得 漂亮 方卓 卓如
PermaLink: https://articles.zkiz.com/?id=326434

政治就係要睇人 方卓如

1 : GS(14)@2017-02-11 23:50:23

2016-02-07 HJ

薯片出咗政綱,唔同人總可以搵到一兩項措施去攻擊。政綱係選舉承諾,講咗要做,唔做會俾人算賬,唔可以立亂開空頭支票。如何討好所有人而又唔會做唔到俾人鬧?美國總統特朗普其實做咗一個政綱最好嘅示範,唔使討好所有人,集中討好buy你嘅人,任由憎你嘅人繼續憎你。只要buy你嘅人多過憎你嘅人,咁你就贏。

政綱比併只係紙上較勁,將來會唔會走數冇人知,做唔做得足又冇人知。政綱唔可以冇,至少要俾人睇到你係乜嘢人,同埋白紙黑字將來可以搵你找數。但係5年之後嘅今天,香港人領教過,原來政綱講得如何天花龍鳳,邊個去實行政綱先最攞命。

擁有自由意志嘅人,响呢場唔太真嘅選舉,唯一應該依靠嘅選人準則,只可以係呢個人會唔會有好多政治債要還,係唔係某勢力嘅扯線公仔,有沒有往績同惡人對抗而仍然能夠屹立不倒。好坦白,有點對人唔對事,因為過去4年幾我們發覺,壞人可以搞喎好事,對事不對人是書呆子行為,政治就係要睇人。

近距離接觸過4名參選人,各有長短,無人完美。你可以稱為lesser evil,但沒有完美化身之下,次完美還是lesser evil,虛名啫,無意思。要比較,只可以拿最重要嘅一樣來比較,否則你永遠覺得十五十六,揀唔落手。最重要係乜?係下屆政府唔可以同今屆政府作風一樣,以強為剛,以鬥為樂。強人政府,唔一定為你開山劈石,掉轉頭可以令你頭破血流。4年幾以來大家打得性起,而家要唞唞,要hea吓,要休養,好事。

從良心出發,唔理追魂call,唔去西瓜靠大邊,我選擇薯片。有什麼承諾要他應承?好簡單,要佢承諾千祈唔好表裏不一,選舉前後兩個樣。上屆經驗,選舉工程可以呃人,但選舉完就現形。一個有跡可尋嘅人,一個可以擁有基本智慧嘅競選班底嘅人,一個可以俾眾人真金白銀支持嘅人,我相信自己唔會揀錯。

如果他日香港重蹈覆轍,又出現個騙子,我當然要為自己缺乏眼光負責,隱居求去不再獻世,同時哀嘆香港運數如此,接連受害。但到目前為止,我相信是最好、最合理、最對得住支持者嘅選擇。

#方卓如 #港股分析 #方如玉帥 - 政治就係要睇人
政治 就係 係要 要睇 睇人 方卓 卓如
PermaLink: https://articles.zkiz.com/?id=326435

但求皇恩浩蕩 方卓如

1 : GS(14)@2017-02-11 23:51:26

2016-02-08 HJ  

「方帥做乜走得咁急,飛去邊?」

「草蜢仔,唔好問,總之就要行開吓,行李都執唔切呀。我去試吓入境令暫緩後,仲係咪可以入境。特朗普落實政綱滾水淥腳,話咁快就差唔多做晒人哋4年都完成唔到嘅事。

「而家你見選特首嘅攞出嚟份政綱,件件辣手, 單單都拗餐死,點學得似特朗普,簽個名就搞掂。有啲仲好笑,提名入閘後先慢慢搞,體現一個假到無可再假嘅選舉。有民主,選個癲狂嘅;冇民主,揀個聽話嘅。不過有民主嘅,每隔幾年,總可以扭轉錯誤。冇民主嘅,只可以但求皇恩浩蕩,換走個奸嘅之後,仲唔好搵個接班人。」

中間嗰層最慘

「證明世界冇樂土啦,未見過有邊個地方啲人民載歌載舞,攬住個政府嚟錫。」

「同日常生活一樣,總係中間嗰層最慘,最頂同最底嘅,冇乜feel。最頂嗰層,接近權力核心,可能佢就係剝削其他人嗰個,邊個選到選唔到,佢哋都繼續有影響力,只係打交道嘅對象唔同咗。最底嗰層,每日都係水深火熱,選到邊個都唔會令佢哋生活大幅改善。

「往時仁君同昏君分別只在於會唔會濫殺同荒淫無道,而家兩樣都冇得你做,仁君昏君好難分辨,同樣唔使旨意能夠福澤社群。反而中間嗰層,書又讀過兩本,每日想改善生活,但無權無勢,又唔敢豁出去開山劈石,通常呢啲就係抑鬱症嘅大熱門,十個有九個都失眠。佢哋成日先會講點樣揀個好嘅領導人,又話呢個唔得,嗰個唔好。中間呢層愈多人,社會就對選舉愈多牢騷。弊在有選舉嘅地方,通常就係最多中間嗰層,所以你聽到咁多選舉紛爭,就係咁解。」

「明喇方帥,一係我就躋身最頂層,玩晒;一係就打自己落最底層,日日掛住搵食,唔理得咁多。如果不幸係中間嗰層,逼自己當乜都睇唔到,千祈唔好動氣傷身。」

「草蜢仔你真醒目,學得真快,抵你做選委。」

編按:方卓如明天離港10日,專欄將於周四起停刊,至本月20日復刊。

#方卓如 #港股分析 #方如玉帥 - 但求皇恩浩蕩
但求 皇恩 浩蕩 方卓 卓如
PermaLink: https://articles.zkiz.com/?id=326436

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019