利世民：豬和狼的經濟觀
1 :
GS(14)@2012-02-18 10:52:18http://www.sharpdaily.hk/article/index/15307/20120217/55465
過去幾星期，我試過從泡沫，即係貨幣理論去睇：
一，男女關係：「巨額交配」（1月20日）
二，新發財文化：「有錢人學做有錢人」（2月7日）
三，紀念品炒賣：「炒供求？」（2月9日）、「鬱金香味紀念鈔」（2月15日）
今日，點都應該講下特首選舉啦！正所謂，政不離經嘛。
首先，近年全世界都有資金泛濫嘅現象，香港只不過係呢個泡沫當中，炒得最熱鬧嘅市場之一。其次，香港嘅特點，就係聯繫滙率。港紙跟隨美元疲弱，連續幾年累積咗一個規模甚為可觀嘅資產泡沫。
泡沫中的成王敗寇
身在泡沫其中嘅人，好多都唔會察覺，原來問題出自貨幣政策。好多人都會將生活艱難，講成資本家剝削。另一方面，又有一班人，因為呢個泡沫得到一筆橫財。政治矛盾，就係源自呢兩類利益。雖然香港未有得普選特首，但係政治議題仍然離唔開呢個宏觀經濟大氣候。
豬營，代表嘅係泡沫之下嘅得益者。所以，豬營主張大量興建公屋，免得直接同私人市場競爭；與此同時，解決咗居住問題，自然可為樓市運轉炒賣呢個經濟模式減少政治壓力。
狼營，代表嘅就係泡沫之下，未能得益嘅一班人。狼營主張復建居屋，並非要解決住屋問題，而係要用居屋來進行泡沫下嘅財富再分配。所以，大家從支持狼營嘅人，就可以睇得出佢地對顛覆現有秩序嘅渴望同追求。
其實，從其他政策主張，都睇得出兩派參選人嘅信念。撐豬營嘅有銀行家，甚至金管局前總裁白頭任都幫到出聲。至於狼營，不但無乜金融界支持者，甚至連官僚都唔撐佢。何解？
香港獨有經濟規律
政府最重要收入，乃係通脹之下嘅泡沫特別稅，例如土地收入、股票印花稅等。破壞呢個模式，等於要政府失去方便之財。一直以來，香港政府無論點大使，都有盈餘，硬係通縮個幾年，偏偏就有財赤。貨幣供應鬆緊同政府收入多少，相輔相成，就算香港無獨立貨幣政策，呢個經濟規律仍然成立。
好似老總沙膽虹話齋，對呢兩個參選人，我地應該兩不相幫。
我唔認為泡沫經濟係健康，亦都好驚人用政府權威去再分配財富。我淨係想香港政府畀條生路大家自己去行。阿彌陀佛。
利世民
專欄電郵：SharpHK.Simon＠gmail.com
Facebook專頁：
www.facebook.com/AppleSimon
利世民：呢鋪一定打沉佢！
1 :
GS(14)@2012-02-23 23:37:11http://www.sharpdaily.hk/article/index/15307/20120223/57944
數碼通（315）公佈中期業績，成績理想，不過，當中記者最關心嘅，仍然係無線上網計劃嘅走勢。
講到對手，數碼通CEO黎大鈞（DL）話：「呢個品牌好Desperate，衰咗幾年，靠吹，一路流失緊好客……我哋銀行有錢，咁咪打過囉！我想打沉佢！」
好嘢！我哋做消費者嘅，最開心嘅就係睇到生意人以本傷人，個個都咁諗嘅話，呢個世界就自然價廉物美啦！
唔知點解，DL嗰句：「Desperate，衰咗幾年，靠吹。」我覺得呢句好似形容緊香港政客。可惜，財經邏輯，並唔可以套用政治上面。當香港政客當庫房係銀行，鬥開政策期票，最尾埋單嘅，永遠都係香港人。
治港有道 市民政治冷感
講開香港政治，之前幾日，我都分享過自己嘅感想。喺facebook上面，讀者「Bor Goh」話：「（政治）o依家喺茶餐廳，啲阿伯講得最多嘅話題，就係點解有人講集體回憶、香港的核心價值係政治冷感嘅？」
另一個讀者Tommy Tsang答得妙：「我覺得，當政府管治得井井有條，市民只須着眼於經濟發展，所以對政治漠不（不需）關心，是謂政治冷感。相反地，政府政策混亂，損害市民利益，市民不得不關心政治了，全民關心政治，只表示政府治港無能。」
睇完，真係教人唏噓。
我知道，香港有唔少無樓揸手嘅後生仔，都好希望梁振英做到香港特首，可以打倒o依家嘅地產霸權。不過，其實我好想話畀大家知道一個事實，要打殘香港樓市嘅話，根本唔需要等梁振英做特首。
香港今次（由2006年起），同上次（1996年之前）嘅資產價格泡沫，都係因為一個重要嘅原因所引致：美元對其他貨幣貶值；當港元不由自主地跟隨美元貶值，香港嘅物價，尤其是樓價都會上升。呢個係經濟學嘅課程，應該唔難明白。
美滙越強 97年市況重現
2012年3月20日，即係香港特首選舉之前嘅5日，希臘假如仍然都係過唔到關嘅話，傳統上，資金嘅走向，第一件事就係流向美元。
其實，呢幾個星期裏面，市場周圍已經隱隱約約有迹象咁顯示，美滙確實越來越強。如果嚟緊嘅下半年，美元都係一直咁強落去，大家好快就會見到，當年1997年嗰一幕可能會再次重現。如果，到時喺電視裏面，又係日日見到梁振英嗰個嘜頭嘅話。阿彌陀佛……我可以向大家大膽保證，佢好快就會感到腳痛。就算香港庫房有幾多錢，都係咁話。
利世民
專欄電郵：SharpHK.Simon＠gmail.com
Facebook專頁：
www.facebook.com/AppleSimon
利世民：2012大冒險
1 :
GS(14)@2012-02-24 22:19:31http://www.sharpdaily.hk/article/index/15307/20120224/58363
美滙一升，港幣資產無運行。
自從有聯繫滙率，香港資產價格周期，基本上完全受美元上落左右。美元低，香港就乜都可以炒一大餐：96年前、06年後。但係，當美元強，基本上香港就百業蕭條。最舒服嘅情況，係美滙平穩，可惜，呢啲日子唔多，可見將來亦唔見得可能出現。
世界上另外兩大貨幣：歐元同日元，好有可能會繼續弱。
日本罕有出現貿赤，如果趨勢維持落去，根據最基礎嘅經濟學102，日本央行就只有再加大量化寬鬆，日元兌美元就可能打破之前一年幾以來嘅強勢，掉頭回落。
至於歐洲，老實講，我真係唔識睇。但我肯定希臘問題比主流媒體講得更嚴重。歐盟批出所謂救助，最終可能一毫子都唔過希臘政府手，就轉到債權持有人手上。而且歐盟財長要95%私人債權持有人都接受削債以及換債，呢點已超難做到。再者，就算債權持有人願意輸，都唔代表佢哋可以捱落去，尤其是希臘本土銀行，經過呢一次，資產負債表大縮水，一定要資產重組，但又何來資金？國有化？邊個去做？實在太多問題，但按常理推測，最大可能仍係希臘脫歐，然後用新貨幣。結果對歐元區有乜影響，我真係敢100%肯定。
賺錢並非必然
另外，有QE3，都唔代表美元會弱。
好多人又話：「你嚇鬼咩！伯南克都話咗2014年前都唔會加息。而且，如果世界經濟有乜嘢事，聯儲局自然會印銀紙。你話美元會強？搵鬼信呀？」
QE3規模點都唔似QE1同QE2。再者滙率強弱係睇相對。美元只要相對其他貨幣強，美滙就升。過去幾年全世界央行都有寬鬆，只不過聯儲局出手重啲。但呢次聯儲局未必係主打。
聯儲局唔加息，即係美國嘅銀行同業拆息會繼續零息。長息只要升，按揭息就有壓力。當美國形成通脹預期，不但長息有上升壓力，而且當大家都覺得美國終脫離金融海嘯嘅陰影，美元一強，雙重夾擊下，今日嘅泡沫，可以一次過夾爆。
唔係叫大家賣樓賣股等市跌。只係想話畀一班嘈住話要上車嘅人知，賺錢嘅人一直冒緊好大風險，賺錢唔係必然。
利世民
利世民：阿爺唔出手 中間人有水抽
1 :
GS(14)@2012-03-07 22:28:04http://www.sharpdaily.hk/article/index/15307/20120307/63555
假如你係北京領導人，而你又確實掌握經濟環境，你會知道下面幾件事實：
第一，銀行體系唔可以再大郁動，尤其是存款準備金率；加，結果只會令資金流入地下，更難管理風險；減，人家就以為放鬆銀根，令到之前控制地產泡沫風險嘅工作，前功盡廢。
第二，通脹問題仍然嚴重；4%嘅CPI升幅，絕對唔係一個可持續嘅水平。
第三，出口放緩，內需疲弱，入口嘅原材料價格越來越高。
從政府角度，住、食、能源仍是和諧重點。所以政府工作重點一定要搞定房屋供應、食物同能源價格。房屋，大陸點都會搞保障房，呢點我覺得無乜投機意義。但食物同能源，基本上係半自由市場狀態，政府要干預一定搵到位入。
好耐之前，大陸干預食物市場，係由供應鏈最上游開始。呢個模式嘅弊病，就係對零售價影響唔夠明顯。故當價格失控，政府大多一刀切，直接定零售價上限。所以通脹壓力一日存在，凡係日用家品零售嘅企業都有一定政策風險。再者之前補貼人民購物嘅政策，北京已錯過一次，應唔會再犯同樣錯誤。
油礦國企 未必最着數
至於能源市場，由於上中下游都係大資本企業，且絕大多數同國家關係密切。要呢類大國企為國家捱一陣義氣，無問題，但一定要畀機會佢哋搵得番。究竟點做至可以好好睇睇呢？最緊要係，要從最上游確保各原材料供應同價錢。換言之，出去買嘢，對內紓緩資金無出路嘅問題，對外就解決資源嘅爭霸。
2005年中海油（883）收購尤尼科係一次沉重教訓。如你問過去幾年北京有無心思思想出去買嘢，我絕對相信時時刻刻都有。但嗰次教訓係，平嘢好嘢唔到你買，貴又無用嘅偏偏送上門。若你係北京領導人，你要點樣先可確保國家利益不受損呢？
世界上一直都有樣嘢叫中間人，點解要有呢？因為有中間人，多咗一重資訊不對稱，賣方估唔到你底價，更唔可以用政治理由Say No。私募基金，尤其大件嗰幾間，一直同中投有合作，固然有商機。有的本身不務正業嘅巨無霸，識窿路，亦可從中抽水。
太陽之下無新事，呢類故事以前都發生過，只不過今次做得更高招。反而本身做石油或礦產嘅國企，未必係最早揩到着數嘅嗰班人。
利世民
利世民：又講中國澳洲
1 :
GS(14)@2012-03-08 22:45:45http://www.sharpdaily.hk/article/index/15307/20120308/64136
噚日，澳洲公佈去年第四季GDP。結果，增長差過預期，係經濟分析師預計嘅一半。有睇開呢個欄嘅讀者都知道，我一向對呢一類預測，甚至乎統計數字，都抱住「姑且聽之」嘅態度。不過，由於呢幾日撞正兩會，溫總公佈政府工作報告，又講到今年GDP增長目標放棄保八，兩件事一併起來，天衣無縫，結論就係：中國經濟正在放慢步伐。
記得大半年之前，歐洲出事，好多人除咗寄望德國會願意出手救窮親戚，更有一個天方夜譚，就係話中國會增持歐債。講咁耐，講到大陸都經濟步伐放慢。另一邊廂，歐洲經濟亦都正式進入寒冬。除咗出晒事嘅歐豬，就連一路以來跑贏嘅幾個國家，例如德國荷蘭，都已經出現若干程度滯脹。我真係好懷疑，究竟大家一直期望歐洲問題可以透過處理好內部矛盾，最終得解決，係唔係有少少超乎現實。
QE3無着落 金價即插
講番澳洲。前日，澳洲聯邦儲備銀行決定維持利率不變，不過，個別成員銀行就輕微上調利率。我個人解讀，就係澳洲一樣有個別地區，通脹情況仍然嚴重。有個剛剛從澳洲Working Holiday返來嘅朋友講，當地物價貴到嚇死人，簡簡單單一條香蕉都可以賣成廿幾蚊港紙。當然，除咗香蕉之外，其他嘢一樣貴到無朋友。
但最詭異係，Bloomberg做咗個即時調查，問一班經濟師，結果係有四分一人預期下個月澳洲聯邦儲備銀行會減息。尤其是當上年第四季GDP數字出來之後，減息預期即時增加，澳元亦都即時弱勢。
呢兩晚，另一個好明顯嘅現象，就係金價繼續落。記得上星期伯南克話通脹預期上升，QE3無着落，金價即晚插咗過百美金。其中一個好多人信嘅神話，就係澳洲出產黃金，澳紙升，因為市場對黃金需求升。當然，同樣道理亦通用於掉轉頭嘅情況。
順帶一提，金甲蟲話係央行使橫手沽期金，目的就係要掩飾紙幣失信嘅現象。我就比較接受簡單嘅講法，黃金有一班投機者，見QE3無着落，即刻笠水。黃金現貨價，已經唔單止係通脹預期咁簡單。
其實我一直有個問題：歷史上，黃金同白銀價格，都有個比例，但今次明顯黃金價格遠拋離白銀。究竟係白銀價格真係為被操控？定係黃金價格有泡沫？
利世民
專欄電郵：SharpHK.Simon＠gmail.com
Facebook專頁：
www.facebook.com/AppleSimon
利世民：特首選舉廢青化
1 :
GS(14)@2012-03-12 22:36:38http://www.sharpdaily.hk/article/index/15307/20120312/65354
一直以來我都認為，無論邊個做特首，未來幾年，都會畀人鬧爆。所以，我亦都好唔明白，點解為咗一個會畀人鬧爆嘅位，竟然都會爭餐飽，甚至連身邊嘅家人、朋友，個個都要出賣，認真痴線。
「傻仔！做特首，有好多利益架！」呢個講法，就更加令我覺得唔安落。究竟香港幾時變得咁道德淪亡？大有大嘅搶，細有細嘅搶；一個二個，日日就諗住佔人家便宜。
香港有咁多廢青，皆因上面有一班人，以為選個特首出來，就可以有得分。既然有錢佬財主都係咁，廢青當然有樣學樣啦。講到尾，成個香港管治嘅潛台詞係：「只要擁護中華人民共和國主權神聖不可侵犯，你地想要乜嘢着數，請隨便開聲。」
行政霸道 「中間人」得益
政府，係唔會創造任何價值。當政府用左手派着數，右手就一定要攞得更多。當一個地方，所有人都以為可以佔其他人便宜，反映呢個地方除咗集體低智，最重要係我地永遠都係益咗一班中間人。無錯，呢班中間人嘅名字，叫做政客。
Lord Acton話：「權力腐化。」真係中到入心入肺。立法會得少少權，所以議員可以貪嘅，就係小恩小惠。好似之前立法會議員話要加人工1倍，即刻畀全城圍摷。香港政制設計，好聽就叫行政主導，實情就係行政霸道；行政長官集大權於一身，有幾霸道，可想而知。
究竟香港仲有無得救呢？集權嘅問題一日唔解決，政治就只會越來越肉酸。以前，話香港人政治冷感，大家都唔覺得係一件壞事，因為當時嘅政治冷感，乃係建基於香港人寧願自求多福，等政府救濟不如自己搞。今時今日，政治冷感嘅朋友，係覺越搞越亂，無眼睇。
過去20、30年，好多香港人講到乜都好似人家欠咗佢，大條道理要人家「幫」。呢個「幫」字，其實又係政治化妝。如果你見到有人跌到，走埋去問有無事，要唔要幫手，呢種叫做關心，係出於自發。香港人，其實好鬼熱心，經常幫人。又如果有個人，不但止有能力自己企起身，其實係佢懶，唔想郁，人家問佢點解唔起身，佢反而鬧人無良心，唔幫人。
特首候選人，個個都扮晒嘢，大大聲講，佢地諗左N個辦法去「幫」人。唔該啦！睇返呢篇文嘅開頭：「傻仔！做特首，有好多利益架！」。
利世民
專欄電郵：SharpHK.Simon＠gmail.com
Facebook專頁：
www.facebook.com/AppleSimon
利世民：霸氣傳媒老闆粗中有細
1 :
GS(14)@2012-03-13 23:03:28http://www.sharpdaily.hk/article/index/15307/20120313/65934
霸氣傳媒老闆話：「寧願投畀何俊仁，都唔會投畀梁振英！」讀者問我，可唔可以分析下。米飯班主叫到，我當然要盡力而為啦。
如果ABC嘅目的係要梁振英做唔到特首，其實並唔困難。不過，要令到某個候選人贏出，就非常之難。所以，佢地先至會用直線思維去諗，以為威脅投白票，就可以團結到ABC嘅票，做到流選。只要流選，佢地就可以大條道理，循不同途徑向北京講：「本來眾望所歸嘅唐少被抹黑而下馬，呢個犯眾憎嘅梁振英又未夠班，不如洗牌重來，兩個都唔好要！」
梁營當然唔會坐以待斃。所以，近來梁營主力放風：1，梁振英會低票當選，你地唔使亂諗野；2，流選，阿爺會唔高興；3，就算流選，梁振英都一定會再參選。
首先，梁振英如果有100%把握當選，就唔需要講呢一句話。講得呢句話，就代表佢未有100%信心。再者，如果梁營真係要去到透過中間人，拉籠鄉事票，從表面證據睇來，佢地仍然計緊數。
梁營專業 流選兵行險着
博弈嘅另外一方，即係唐營，亦都計緊數。究竟最終係得一輪，抑或兩輪，仍然係未知之數。正路計，大家都預期，第一輪鐵頭會出局。之後，第二輪，民主派會拉隊走，然後唐梁得票都係唔過半數，結果就流局。
所以，梁營放風，就係要話呢個博弈會驚動上面，所以無支持梁營嘅選委要為呢件事負責。而且，梁營再選，最終ABC仍然要面對佢，如果無更好人選，到時又點算？
老實講，我都要由衷講一句，從博弈論睇，梁營嘅策略，非常專業。另邊廂真係比較業餘。如果流選，梁振英究竟會唔會再入閘？另一個問題係，ABC有乜嘢人選先？
除非ABC已經有呢一手準備，我覺得流選呢條路，仍然係兵行險着。好多人一廂情願以為，如果流選，ABC可以押注落曾鈺成。不過，邊個話佢一定會選？除咗曾鈺成之外，ABC又有乜野選擇呢？
當然，ABC要保護呢一張牌，唔可以響現階段畀佢曝光，同時間又要令到所有人都明白，ABC呢個陣營好包容，甚至連何俊仁都收貨。霸氣傳媒老闆粗中有細，可見一班。
利世民
專欄電郵：SharpHK.Simon＠gmail.com
Facebook專頁：
www.facebook.com/AppleSimon
利世民：施永青的兩次分配
1 :
GS(14)@2012-03-19 22:42:40http://www.sharpdaily.hk/article/index/15307/20120319/68358
上星期有線Money Cafe，同施老闆討論分配嘅問題。
簡單講，一次分配，就係做生意，創造價值之後，將成果分配。二次分配，就係有人認為一次分配唔公道，有人唔夠食用，所以就要「再」分配。分配都係政治哲學公共政策老生常談，施老闆攞呢個話題出來講，皆因今時今日越來越多人要政府出手，即係要做二次分配。
施老闆覺得，二次分配唔會創造價值，但就會衍生出一班靠二次分配生存嘅官僚，所以會造成浪費，反而令社會資源得唔到最佳應用。一次分配就唔同。創造價值過程當中，勞力者得到應有回報，會更落力，結果對大家都好。所以施老闆就主張企業老闆，一次分配時要公平地分畀前線出過力嘅員工。
可以肯定，我同施老闆，都唔認為透過政府進行二次分配有效。不過，我就認為二次分配未必行唔通，重點係唔應該要靠政府「幫」。自從60年代， 殖民地政府將社福機構修編，整個慈善事業，統統變成政府附庸。至今，香港真正獨立又有創造力嘅民間慈善活動，一隻手數晒，而且幾乎都係服務香港以外嘅地方。殖民地管治，陰柔地將反叛同創造嘅基因從香港人身上移除，認真厲害。
鼓勵創業 打破框框
講返一次分配。施老闆嘅主張好動聽，不過老闆又點知道邊個員工出咗幾多力？同埋，究竟點樣分先算公道？節目入面，我都有問施老闆：「如果一個員工真係有能力、有貢獻，公司待薄佢，大不了東家唔打打西家，係唔係？」將「破壞性創造」呢個概念發揚光大嘅經濟學家熊比德（Joseph Schumpeter）提出，當資本主義一路發展，就會出現一班管理人，將事情機械式制度化。好處係，可撇除人為武斷，凡事有程序有規矩。另一角度睇，呢種機械式制度下，任何人都係可以替換嘅零件，試問呢個框架下，又點可能發生施老闆理想中嘅一次分配模式呢？其實，越係大公司，文化環境就越似社會主義極權國家。想打破一次分配嘅不公，唯有主張資本主義嘅起義：鼓勵創業。如果唔係，根本無可能打破個框框。
利世民
專欄電郵：SharpHK.Simon＠gmail.com
acebook專頁：
www.facebook.com/AppleSimon
利世民：搵OPM老襯的行業
1 :
GS(14)@2012-03-20 23:32:48http://www.sharpdaily.hk/article/index/15307/20120320/68872
每當社會出現問題，求其搵市場做代罪羔羊，真係易過借火。上星期有個叫Greg Smith嘅高盛員工，離職前寫咗封「點解我離開高盛」嘅公開信。呢封信，寄咗去一向「左左哋」嘅《New York Times》。好自然，輿論即時起哄。對於一向想搵理由去話資本主義自由市場呢樣唔啱，嗰樣唔着嘅人，呢封信就係最好嘅證據。
事實又係咪咁簡單呢？有睇過Greg Smith封信嘅人都記得，佢話o依家高盛嘅文化，將啲客當做老襯（Muppets），話高盛已經無誠信可言。不過，大家又有無諗過，乜嘢人先至係高盛嘅客戶？
Greg Smith曾服侍過嘅大客包括：世上最大兩家對冲基金、五間最大資產管理公司、三個亞洲最大嘅主權投資基金。夾埋管理嘅資產，過萬億。問題係，點解呢啲咁大條嘅深海水魚，都會畀高盛當魚生咁劏？
講到高盛咁奸，但係大家又有無諗過，高盛嘅客仔，原來根本唔係好在意自己畀人搵老襯？講到尾，涉及到Other People's Money（又簡稱OPM），同樣問題就會發生。高盛，只不過係將最叻嘅人都羅致門下，成為搵OPM最厲害嘅公司。
資本主義核心，係每個人為自己負責，而OPM肯定唔係資本主義嘅核心。可惜，對於迷信政府萬能嘅「左左哋」，一切問題都可靠監管去解決。佢哋永遠無諗過，點解咁多人，唔可以直接參與市場，其中一個原因，就係政府話投機太危險，要發牌。散戶要參與市場，一定要搵持牌人去提供意見。結果專門以搵OPM嘅行業應運而生。政府又搞主權基金、「強迫金」等，都係將人民嘅錢，變成人哋嘅OPM。究竟o依家係市場失衡，定係政府令市場失衡呢？
利世民
專欄電郵：SharpHK.Simon＠gmail.com
Facebook專頁：
www.facebook.com/AppleSimon
利世民：當西環進佔中環
1 :
GS(14)@2012-03-24 15:02:14http://www.sharpdaily.hk/article/index/15307/20120323/70817
呢篇係所謂特首選舉前嘅最後一篇。過咗星期日，《爽報》繼續係《爽報》，壹傳媒繼續係壹傳媒，香港繼續係香港，股市繼續開市，天唔會跌下來。咁究竟一年、五年、甚至十年之後嘅香港，會變成點樣。
香港嘅變並非一時三刻。2008年，我仍係壹傳媒員工，有位朋友電郵份舊聞畀我，原來係中聯辦曹二寶提出嘅「兩個管治團隊」論。記得當時已有人覺得好唔妥，好似李柱銘先生、練乙錚前輩、程翔先生等都曾經撰文，解釋點解件事唔係好妥。
習近平訪港，提出「三權合作論」。好，就當佢吹水唔抹嘴，唔好當真。2009年，中聯辦黎桂康爆料，話已經同特區政府傾好十點協議，畀港區政協參與特區事務。大家又點睇？特區政府之後否認，大家惟有信啦！再到舊年區議會選舉，點解氣氛咁詭異？既有中聯辦前職員（黨員）當選區議員，又有種票疑雲。起初，好彩有《蘋果》踢爆，可惜，之後政府放軟手腳，大家只好無奈接受遊戲規則變咗呢個事實。
呢場所謂特首選舉，令人覺得唔對路，皆因呢一條不歸路已行咗好多年，只不過大家唔知。就連唐英年都唔知，甚至曾蔭權都唔知，雖然佢哋一直以為自己係北京嘅代言人，但原來人家從來無當過佢兩位係自己友。
香港可以點算呢？政治呢一條柱一搖擺，經濟同社會呢兩條柱唔會放得正。曾幾何時，我信香港市場底子夠厚，除填鴨式教育嘅中五生都識講嘅法治同合約精神，最緊要係香港有貿易文化，簡單啲就係「信」字。大陸同香港最大分別，亦在於呢一個「信」。如同我做生意嘅對手係甚麼政協，我哋信唔信個政府會公平執法？如果甚麼國企要特區政府提供特別待遇，又或者我哋信唔信下一屆政府會Say No？如果香港出現通縮，我哋信唔信金管局會死守聯繫滙率？
如梁振英做特首，你信唔信佢？定你信佢根本話唔到事？我希望大家明白，點解過去我同朋友叫大家唔好畀政府權力擴大。因為我哋永遠唔知，權力最終落喺乜嘢人手上。
利世民
專欄電郵：SharpHK.Simon＠gmail.com
Facebook專頁：
www.facebook.com/AppleSimon
Next Page