利世民：香港要更多蠢人
1 :
GS(14)@2012-03-26 22:33:19http://www.sharpdaily.hk/article/index/15307/20120326/71399
各位香港人，今次可以做嘅，我們都做盡。有人話，星期五、六嘅民間普選，並唔係真正嘅選舉，佢地講得好啱。我嘅問題係，點解香港無真正嘅普選；如果有真正嘅普選，我地根本唔需要有乜嘢民間普選。
但係明知呢個普選唔會影響小圈子選舉嘅結果，仍然有咁多香港人行出來，排隊、上網投票，點解？
港人理念：咪當我老襯
唔通香港人全部都係傻嘅？香港人出左名功利、計算，唔會做無謂嘅事。不過，香港人骨子裡，亦有一定嘅原則：千祈唔好當我地係老襯！
西環又好，北京又好，你地可能贏咗呢一場選舉。不過，你哋已經用事實說明，當年所謂港人治港，真係搵老襯。
香港人其實好簡單，除左馬照跑、舞照跳，就係一份基本嘅尊重。香港人，本來已經接受咗香港遲早會變，只不過，我地都希望，大陸嗰一套當人係傻嘅風氣，唔好傳染到香港。
聰明人，明哲保身；奴才，誠惶誠恐。兩種人，有好微妙嘅分別奴才，永遠都只識諗，點樣填滿人地定下嘅框框；聰明人，雖然唔會硬碰，但係都會暗瓦底去將個框框改寫。
一直以來，香港係聰明人嘅地方。不過，今次特首選舉，令人覺得呢度漸漸變成一個奴才當道嘅社會。一旦奴才取代聰明人，香港真係無希望。
相信奇蹟 助人者自助
我認，我係蠢人。星期日中午之前，我仍然信有奇蹟出現。有朋友問我：「奇蹟即係點解？」我話：「奇蹟，就係我地意想不到嘅恩典。」
我仍然相信奇蹟。奇蹟未必會響我地希望見到嘅時間同地點發生，但係，我哋始終要信有奇蹟。我地更加要信，奇蹟唔會無原無故出現，始終都要靠有血有肉嘅人去完成。
各位，呢個時候，我地更加要有信心。主祐香港，助人者自助。
利世民
專欄電郵：SharpHK.Simon＠gmail.com
Facebook專頁：
www.facebook.com/AppleSimon
利世民：中環友點解怕黨人治港？
1 :
GS(14)@2012-03-28 00:20:50http://www.sharpdaily.hk/article/index/15307/20120327/72081
噚日，陽光普照，大家如常生活。不過好多人明白，遊戲規則已改變緊。究竟變乜？好多「梁粉」起初都覺得，呢個人都幾有心，又有台型，值得支持。又有人覺得，呢隻狼夠吉士挑戰既得利益，應該力撐。但全部人都無諗到，去到最後，竟然搞到有你無我。
香港商界，不嬲都係有競爭，無敵人，見面握手，放假打波。我收到風，有低調梁粉，本來都唔介意加入新政府班底。但係o依家搞到咁，佢哋都好擔心，一旦加入新政府班子，會即刻少咗好多中環友好。
有冇咁嚴重呀？不如大家又諗吓，究竟點解有285人，明知輸，都要投票畀唐英年？「你睇吓唐英年，佢究竟做錯咗啲乜？佢唔聽話咩？如果一早無心畀佢做特首，好心就唔好叫佢去選。如果大家都係可以接受嘅人選，就無謂去到咁盡。我都信，梁振英未必掌握所有事嘅發展，不過，咁仲得人驚。究竟家陣邊個話事？畀我哋得個『知』字，至少可以自己睇緊少少，唔好捉錯路。但o依家我哋根本唔知，究竟邊個人諗緊乜，你叫我哋可以點樣？」一個中環友嘅心聲。
呢位中環友，未必係嗰285個選委其中之一，不過，佢嘅憂慮，應該都係嗰班選委嘅憂慮。講到尾，大家都知道，今次係西環操盤，想佔領中環。西環嘅特點，就係唔信外人。但係點先算係自己人呢？中環價值，信任建基於大家要互相依賴。呢一代嘅西環價值，信任就建基於大家控制幾多對方嘅材料。材料未必係醜聞，但係一定要可以令人貼貼服服，聽聽話話。
呢套遊戲規則，要加入政府，你可以唔做「自己人」咩？「梁振英無錯係香港市長，而呢位市長一定係『自己人』。佢係唔係同時係市長兼市委書記呢？市委書記有人事決定權。如市委書記另有其人，咁可能新政府要向更高一層嘅問責。」高人提點，任何人加入新政府團隊等於向西環交心，試問一個只係想搵錢飲茶灌水嘅中環友，你想唔想同一個隨時套你料嘅人做朋友？
利世民
專欄電郵：SharpHK.Simon＠gmail.com
Facebook專頁：
www.facebook.com/AppleSimon
利世民：思歪的經濟政策
1 :
GS(14)@2012-03-28 23:40:03http://www.sharpdaily.hk/article/index/15307/20120328/72574
究竟下屆政府，會有點樣嘅經濟政策？分析每件事，我都鍾意從目的着手。明白到一個人嘅最終目的，就好容易推理出佢會做乜。
下屆政府，如果根據某啲口痕友嘅理解，首要任務就係確保香港要更加依賴中國，其次就係要確保市民要依賴政府。
點樣令市民更依賴政府？如今年施政報告，新一屆政府宣告向每個市民派一萬蚊，絕對唔奇。「紓解民困」呢四個字，幾時都啱聽。同時間，如果新政府又話，因有大筆盈餘，所以可以研究減稅，我一樣唔覺得奇怪。甚至乎，我同一班朋友，一時間都諗唔到點樣反駁。
中小企經營艱難？唔緊要，政府雖然唔可以直接派錢，但絕對可以用擔保形式，鼓勵銀行批出貸款。銀行無道理做蝕本生意？唔緊要，如果政府淨係做擔保都唔夠筍，不如政府搞個主權基金，一邊發人民幣債，另一邊用低息拆錢畀銀行。發展債市同人幣國際化嘛！新嘅金融發展局搞新思維，好應該嘅。
連串政策皆大歡喜，好唔好？最緊要市民要靠政府越好。有期望，就有支持。反正有大把盈餘啱唔啱？新政府要爭取民望嘛！順應民意嘛！喺北京眼中，最大潛在風險，就係香港有龐大嘅財政盈餘。全世界，無一個地方比香港更有條件行政獨立。
布魯塞爾派個前歐央行副總，去做希臘總理，都竟然無人出聲。講到尾，捍衛港人治港，第一件事，就係捍衛政府財政。可惜，香港班「飯民」，竟蠢到自堀民主嘅墳墓，我都無話可說。其實過去幾年，公務員先係最保護香港財政。
如果遇到一次金融風暴，美元升到香港出現通縮，貨幣基礎縮都不特止，到時呢個政府，要將港元貶值重掛濫發鈔票，就到主權基金發嘅人幣債輸到死。唔貶，就到外面死。呢個時候，香港人仲唔跪求中國放水？
利世民
利世民：敗晒儲備北京歡迎你
1 :
GS(14)@2012-03-30 23:57:35http://www.sharpdaily.hk/article/index/15307/20120329/73212
「政府咁多錢，買東西隧，解決交通問題。」但就算係最支持嘅朋友，如《每日一膠》嘅博客林忌，都唔可以唔承認，就算將東、西同紅隧理論上可承受嘅流量加埋，都唔足以應付香港每日過海車輛數目。所以林忌兄提出要起第四條海底隧道。
有人覺得，起第四條海底隧道嘅建議天馬行空。但香港正係最需要諗吓啲睇落無可能嘅事。畢竟，事情未發生前，將一切可諗得到嘅可能性都思考吓，始終唔係壞事。
事實上，政府過去二十幾年，尤其是有咗鐵路之後，幾乎所有主要交通規劃，都用鐵路做最主幹，甚至係唯一嘅假設。結果，政府雖主觀願望人人用鐵路，但現實係車輛數目增速並無減少。政府唯一對應，就係用盡一切手段去限制私家車增長。
「鼓勵市民使用公共交通工具」目標正確唔正確。我想講呢種以為社會好似電腦一樣，用政策改變人嘅行為，往往會帶來意想不到嘅後果。
講番國有化東西隧，講呢番話嘅人本身反而無揸車。當然，我唔可以一竹篙打一船人，不過，我諗站在駕駛者角度，三隧分流，如結果係三隧齊塞，亦未必係好事。從經濟學上，隧道收費加價，唔一定會賺多咗；甚麼需求彈性，我相信這個欄的讀者都好清楚，唔使我多解釋。再講，如林忌嘅講法正確，真正治本方法要起第四條過海隧道，政府咁做，敢問第四條過海隧道嘅融資同Business Model又會係點？政府全資擁有？以今日香港民情，我估都會係咁。
噚日篇《思歪的經濟政策》，得一個核心思想：如果大家想捍衛香港自主，第一件事就係捍衛香港財政獨立。有人話我睇得太過悲觀。但事實上，香港政治情緒，偏偏就係有好多人主張將政府嘅錢用乾用淨。對唔住，就當我係悲觀嘅人。不過如果香港無財政獨立，仲憑乜嘢同北京講港人治港？
利世民
專欄電郵：SharpHK.Simon＠gmail.com
Facebook專頁：
www.facebook.com/AppleSimon
利世民：唔怕一萬
1 :
GS(14)@2012-03-31 00:01:56http://www.sharpdaily.hk/article/index/15307/20120330/73911
「有冇咁悲呀？點解你只係識得話呢樣嗰樣唔啱，全無建議，咁同細路有乜分別？」讀者Kinney Turtle留言，提醒我做人要積極。
唔怕一萬，至怕萬一。我只係將未來可能發生嘅事講出嚟。有睇開我專欄嘅朋友都知，我唔信人可絕對預測未來。所以我將可能性講出嚟，拋磚引玉，提出命題，畀大家去證偽。
講到證偽，唔可唔提一個人：哲學家卡爾波普（Karl Popper）。讀哲學嘅朋友應對佢唔陌生，不過真係明白佢嘅人唔係咁多。簡單講，卡爾波普認為，我哋最多只可發現乜嘢係錯，但永遠無法搵到絕對正確。所以做學問，方法係不斷查找不足；知道乜嘢命題與事實不符，一係修正之前命題，一係完全推翻。人類對世界嘅認知就可以推進。
講財經點解會搞到哲學？財經，只反映社會現實嘅一個面向。要了解財經問題，可唔可以唔識哲學？可以。不過認識哲學，可幫到大家了解財經。卡爾波普學生當中，最出名嘅其中一位，就係索羅斯。其實，好多對冲基金操盤人同創業家，本身都係熱愛哲學，有豐富嘅想像力同好奇心。當然，佢哋有一份毅力去將自己嘅觀點凝聚成事實；得個講字嗰班，惟有好似我咁寫稿教書吹水。
講番投機。呢種證偽嘅精神，其實就係Contrarian嘅精神。Contrarian，有人譯做「逆向思維」，不過唔夠精確。Contrarian唔係話要包拗頸，但會挑戰大家都唔去質疑嘅事，例如：點解聯儲局一定會維持低息直到2014年？講過就係呀？你唔畀佢哋轉軚？
問題衍生各種可能性，然後就係投機概念。Contrarian都會有錯。不過，正正有錯嘅可能，所以唔會瞓身。Contrarian可以好保守，經常摸唔到頂，但好多時都可以避過大災難。見個市升跟大隊無難度。最難係可以心安理得咁出貨，袋袋平安，等下一個機會。
利世民
專欄電郵：SharpHK.Simon＠gmail.com
Facebook專頁：
www.facebook.com/AppleSimon
利世民：邊個先至係真正大鱷？
1 :
GS(14)@2012-04-02 23:06:21http://www.sharpdaily.hk/article/index/15307/20120402/74548
呢個世界，有一種人，只要見到同錢有關嘅事物，就會即刻將所有問題賴落自由市場、資本主義。不過，佢哋就從來都無問過，究竟事情點樣發生、點解發生。
貨幣政策就係一個好例子。滙率波動，一定係炒家輕波作浪。物價大上大落，梗係奸商囤積壟斷。點解呢類解釋有市場？因為只要有一個共同敵人，從政者就唔需要面對現實，唔可以靠慷他人之慨，幫自己換取權力。做官，又唔諗點樣解決問題，唔使擔心出錯，搞到要畀人鬧。
「炒家同生意人，又點解自己唔出來辯護？」首先，炒家係一個好概括嘅講法。好多時，我哋都唔知道，原來自己本身都係炒家。
「我有買少少股票外滙，但係我唔會好似大戶咁，輕波作浪。」究竟大戶點樣輕波作浪呢？
「大戶錢多，可以將個市先炒上。然後喺高位派貨。派晒貨，就喺高位沽落嚟。趁低又吸過。」如果係咁，點解你又唔跟大鱷嘅步伐，硬係要自己攞嚟衰？
「大戶每次都會搵人唱好個市，其實自己就慢慢派貨。當真正值得入市，又會講到個世界鬼咁淡。」大家要明白，所謂大戶都係有血有肉嘅人，久唔久都會睇錯。好似對冲基金經理Barton Biggs，過去一年對經濟同股市嘅睇法，一次又一次咁轉軚再轉軚。
「大戶如果唔係有蠱惑招，又點會搵咁多錢？」其實，所謂大戶，都有唔少輸到渣到無得淨。不過，我又會贊成，大家見到嘅投資銀行，佢哋嘅成功之道，又唔係我哋一般老散可以模仿得來。
正如我之前寫《搵OPM老襯的行業》，投行有好多客，本身都只不過係管理人家嘅錢，例如退休基金、強迫金等。呢一班投行客唔係蠢，只不過佢哋但求交差，又使乜做到咁好？另外，投行可以做槓桿，贏咗固然開心，輸咗大不了TBTF，等政府諗吓係咪「攬炒」。市場有無人為操控呢？我嘅答案係肯定。尤其是呢幾年，實在有太多人上咗癮，央行唔印銀紙唔得，就算無病無痛，都日日吹風想要QE3。尤其是呢幾個禮拜，已經去一個不可理喻嘅地步。如果話人有操控市場，將價錢舞高弄低，我會話：只有央行同政府，先至有呢個能力。咁，邊個先至係實至名歸嘅市場大鱷？
利世民
專欄電郵：SharpHK.Simon＠gmail.com
Facebook專頁：
www.facebook.com/AppleSimon
利世民：渴市的暑期見習
1 :
GS(14)@2012-04-10 22:36:56http://www.sharpdaily.hk/article/index/15307/20120410/76160
過去幾個星期，每日都收到好幾份email，話要到我哋獅子山學會做summer intern。
回想幾年前，一年最多只係收一百幾十封email。當中，又有七、八成係賊佬試沙煲，亂咁撞。所以，要揀三、四個叻仔叻女，唔算好難。不過，到咗今年，我一日閒閒哋都收到幾封email，仲要好似好有誠意，個個都話自己係古典自由派，搞到我都要諗諗，係唔係要倒返轉叫班intern交學費。
老實講，就算真係要畀學費，我估都會有唔少人肯制。文憑量化寬鬆嘛。不過，大家千祈唔好以為，搵summer intern做嘅學生，讀埋啲唔三唔四嘅大學。至少，敝會收到嘅email，絕大多數唔係Ivy league，就係有返咁上下嘅學府。屋企唔係有個錢，都好難負擔。偏偏就係佢哋呢類背景，先至明白除咗一張見得人嘅沙紙，人生經驗都好重要。
可惜，過去十幾年，尤其是經濟差嘅日子，好多剛剛畢業嘅學生，都唔理三七廿一，就走去讀多過Master。香港如是，美國就更加離晒大譜。結果，好多人因此負債累累。美國人欠落嘅學費貸款，已經過萬億美元。之前，佔領華爾街班乜青，其中一個訴求，就係政府將呢條數一筆勾消。
歐洲嘅教育一樣咁失敗。以西班牙為例，青年人失業率，高達五成；但係大學生又有過半drop out。其他國家諸如英國、法國、意大利等，情況大同小異。
究竟點解會搞成咁？大學成為職業先修，固然好大問題。要學做嘢，點解唔出去闖？更大問題係，大學淪為唔想做嘢嘅後生仔逃避現實嘅集中營。大家千祈唔好以為我反學術。相反，我慨嘆大學已經唔再係畀精英去推進人類知識界限嘅場所。好在，大隱隱於市，大學破落，仲有好多企業同私人機構搞R ﹠D，人類文明先至可以繼續進步落去。
話說回頭，如果你有興趣申請做獅子山學會summer intern。歡迎你在四月十二日之前，將履歷email去
[email protected]。另外，請回答以下兩條問題：
1.五十字之內，解釋你嘅價值觀同信仰
2.列出三本對你影響最大的書
利世民
專欄電郵：SharpHK.Simon＠gmail.com
Facebook專頁：
www.facebook.com/AppleSimon
利世民：未登天子位 先置殺人刀
1 :
GS(14)@2012-04-12 01:17:13http://www.sharpdaily.hk/article/index/15307/20120411/76717
一年前，阿信屋曾經以被迫害者身份，大做文章控訴超市霸權。一年之後，某份自詡「一遞信公」嘅報紙，竟然用「阿信屋霸權」去形容佢，唔通，左左哋嘅人，就係永遠都睇唔過眼人哋成功？
睇真，成篇頭條報道，原來想係借位曲線話：就算第日有競爭法，呢種「低價壟斷者」唔會有問題；但係供應商如果要設置最低零售價，就可能犯法。
明晒！一來，政府要為競爭法最後做勢，當然會搵友好傳媒幫手。二來，「一遞信公」作為思歪忠實粉絲，要支持新特首鐵腕統治香港，無理由唔撐「營商廿三條」。
正所謂：未登天子位，先置殺人刀。
「嘩！你咁講，即係話呢條法例，淨係針對當日唔支持思歪嘅大財團啫！邊有咁得人驚呀？」
製造壟斷 肉肉酸酸
話說，呢條法例就係講到明，專門針對大財團。當然，好多人覺得：「大財團死不足惜，最好將所有大財團趕盡殺絕，香港無晒大財團，就一天光晒！」
我只係想提醒大家，過去幾個星期，西環公然介入特區事務，違反基本法，好似「一遞信公」報仝人就帶晒紅領巾夾道歡迎，反而係廢青公敵嘅大財團企出來捍衛港人治港。
「嘿！班有錢佬為咗自己嘅利益之嘛！」
無錯，班有錢佬係為咗自己嘅利益。不過，港人治港又係唔係你嘅利益呢？定係為咗無產階級革命，我哋寧願叫正義女神除咗條遮眼布，淨係去追住嗰幾姓有錢佬，當眾劈到佢哋流血不止先至開心？
「有無咁嚴重呀？政府都放風話為咗順利通過立法，草案已經『剝咗牙』啦！」
政府放風就信到十足，我覺得呢一樣嘢先至得人驚。第日，政府要通過廿三條，都可以話：「剝咗牙，唔使驚。95%嘅人都會無事㗎！」咁樣嘅「廿三條」，唔知各大傳媒老總又收唔收貨呢？
當然，我覺得最諷刺嘅係，香港最明目張膽、最肉酸嘅壟斷性霸權，例如各大公營機構，竟然絕大多數得到豁免；由政府政策傾斜製造嘅壟斷，政府就真係剝咗牙嘞！
換言之，以後想搵大錢，就要聽政府話，同政府合作。多謝飯民支持特區政府，令香港大陸化。
利世民
專欄電郵：SharpHK.Simon＠gmail.com
Facebook專頁：
www.facebook.com/AppleSimon
利世民：領匯股東心聲
1 :
GS(14)@2012-04-14 21:08:08http://www.sharpdaily.hk/article/index/15307/20120413/77954
我好想問領匯管理層，作為香港最大嘅商場業主，有無諗過自己有乜嘢「企業社會責任」？
「利世民都講企業社會責任？」有乜唔妥？我不但講企業社會責任，仲要跟到足主流輿論觀點，認為領匯做得好，可令消費者同打工仔得益。唯一分別，係我信消費者、打工仔及領匯股東利益冇根本衝突。
甚至應該話，三者相輔相成。領匯無可能靠干犯消費者同打工仔得益，可長遠賺錢。如你先入為主認為賺錢要靠剝削，對唔住，你已被馬克斯洗咗腦。不過唔緊要，你有呢個諗法，唔係你錯；你信馬克斯主義，就會將問題都賴成社會嘅錯。
入正題，究竟，領匯點先可令消費者、打工仔、租戶……所有人都得益呢？係咪搞吓紀曉華同小儀尋找美味呢？定係將商場不計成本賤價出租，咁就有良心呢？領匯唯一責任，就係要令旗下商場租金自然上升得比其他場更快。
「不如將租金加到太古廣場咁貴！」廢青咁問，唔奇。「加價一定賺多咗。」多得馬克斯洗腦，好多傳媒人覺得，價格可以亂開，令呢個低級經濟學錯誤，陰魂不散。
東西兩隧加價到每程一千，咪發過畢菲特？報紙一份賣六百，咪好過印銀紙？或者，最低工資加到每小時一萬，所有香港人咪可以好似公民黨班大狀咁住山頂？醒吓啦！價格，唔係話你想加幾多都有人要。
瘋狂加租就會有人走，可能得不償失。領匯要旗下商場加租比人哋快，方法就係令到租戶盈利增加得比人哋更快。零售業，盈利絕大多數時間同營業額掛鈎。正如之前所講，增加營業額，唔一定係加價；好多時，薄利多銷更加有效。結果，生意做得大，甚至引入集團式經營，要請更多人，打工仔一機樣有着數。
領匯真係想做公關，唔該從呢個方向諗吓。左仔反發展就話去玩回憶，你又去照跟；作為股東，真係替呢間公司擔心。
利世民
專欄電郵：SharpHK.Simon＠gmail.com
Facebook專頁：
www.facebook.com/AppleSimon
利世民：索羅斯又出招
1 :
GS(14)@2012-04-16 23:09:39http://www.sharpdaily.hk/article/fin/20120416/78613
索羅斯喺《金融時報》撰文，建議歐洲央行將發行貨幣嘅權力，注入一個「殼」（Special Purpose Vehicle，簡稱SPV），然後用個「殼」集資兩萬至三萬億，用來解決歐債危機。呢個破天荒嘅構想，究竟行唔行得通呢？
簡單嘅答案係：「行唔通。」
好多填鴨式教育嘅人，第一個諗法，一定係乜嘢國家權威民族尊嚴。不過，歐元嘅出現，代表17個歐洲主權國，已經將國家權威民族尊嚴放低。所以，呢個講法唔成立。
我話行唔通，其中原因係：「邏輯謬誤。」搵人用歐元去買發行歐元嘅權，就好似叫一個企喺個大木桶入面嘅人，唔行出個木桶，但又要舉起個木桶。
持有歐元發行權嘅「殼」究竟有乜用？派息？索羅斯引述花旗同高盛嘅研究，指歐洲央行每年賺250億歐元，用1厘計，呢個SPV嘅市值，就係25000億。不過，無論250億，抑或25000億，最大嘅問題係，呢間SPV發行歐元嘅數量，又會影響番佢本身嘅價值。
一個銀碼，究竟背後代表咗乜嘢？呢個係最基本嘅經濟學問題，偏偏又係最難答嘅一個問題。
「貨幣嘅價值，取決於一個單位，可以換取到幾多貨物。」我希望，大家以後會記住，銀紙，唔一定要多，但係一定要見使。用貨幣理論嘅術語去講，就係要有穩定嘅購買力。
原則上，中央銀行其中一個功能，係要確保貨幣嘅購買力。換句話講，中央銀行唔係要來賺錢。所以，索羅斯第一樣搞錯嘅，就係呢一點。
不過，都唔可以怪佢。因為一直以來，政府為咗掩飾央行嘅缺失，久不久就會用「其實央行賺咗錢」來愚弄大眾。兩個星期前，美國都有數字話，其實自2008年金融海嘯，聯儲局其實已經賺番TARP同部份救AIG嘅本金。
講到呢度，大家又要明白第二個概念：「法定貨幣」（Legal Tender）。 原則上，如果有人欠咗錢，債主收到法定貨幣，條數就一筆勾銷；債主亦唔可以拒絕債仔用法定貨幣還債，否則，條數亦當唔存在。所以，當社會上最大嘅債仔係政府嘅話，發行貨幣既係政府控制之下嘅中央銀行，可以想像得到，結局一定係印銀紙。
由EFSF到ESM，再到呢個央行SPV概念，歐洲睇嚟真係無出路。所以，我哋一定要記住，無論點都好，千祈唔好畀政府有赤字同負債。
利世民
專欄電郵：SharpHK.Simon＠gmail.com
Facebook專頁：
www.facebook.com/AppleSimon
Next Page