智取大市：一月要買地產股
1 :
GS(14)@2017-01-05 08:06:15喺12月收爐之前，本欄曾經講過1月份息口敏感股將有唔錯反彈，踏入2017第一個交易日即發威，1月尾地產股嘅股價，相信會高過周二收市價，即係類似大摩嗰種「預測地產股未來20個交易日將錄得上升」嘅唱好報告。點解預期息口敏感股可以反彈，之前講過恕不詳述，結論係2月初聯儲局議息，加嘅話，可以演繹為「今年餘下時間最多加兩次息」，其餘11個月地產股壓力減低；唔加嘅話，固然唔會係壞事，2月初加定唔加息，對地產股對冇壞影響，咁難得遇上蜜月期，股價又盡反映加息因素，後市自然有條件反彈。至於加息對地產股嘅基本因素影響，當然視乎樓盤賣得好唔好，牌面睇實在冇乜影響，因加辣加息都遠遠未搞掂樓市，新樓劏房永遠有一班好爸爸同好媽媽幫手撐住。再者，本港發展商財政相當健全，除長和（001）旗下業務較高槓桿外，其餘發展商唔會因為美國加息而令財務開支大增，相對一眾孭重美元債嘅中資股嚟講，目前環境下，地產股絕對有被基金增持嘅優勢。選股當然買主流嗰啲，務求食應地產股反彈浪，新地（016）、新世界（017）、信置（083）之類，make it simple！晉佳
http://www.fb.com/advanceguy1本欄逢周一、三、五刊出
來源:
http://hk.apple.nextmedia.com/financeestate/art/20170104/19885441
智取大市：1月進攻好日子 究竟點玩法？
1 :
GS(14)@2017-01-06 02:06:31港股周三升跌比例只係參半，跑出股份有蘋果概念股、鋼鐵股、建築設備股、電訊設備股等等。自從騰訊（700）由180蚊起步反彈之後，每日人氣sector都唔同，資金輪流博反彈，一個sector炒完一兩日就會轉移目標，所以見突破、大陽燭就衝入，預咗要唞氣一兩日先能夠再上。不停追大陽燭，一嚟買唔晒，二嚟次次一追即回，容易感氣餒。呢一轉，持股要丁點耐性，等佢慢慢升，買齊就等佢自由發揮。最好嘅做法，係每日檢視自己個倉，望見中短線走勢轉弱、跑出機會最低嘅一兩隻股，可以率先沽出，換入當日最有潛質股份，不斷改善持股嘅攻守能力。周三最強除咗中通信（552）之外，建築設備股肯定係最勁，中國龍工（3339）單日旗形突破急升8%，一支大陽燭已經足夠收復三個星期嘅調整浪，動力夠，睇周線圖走勢亦幾吸引，潛伏底醞釀四年，阻力位喺2元至2.1元附近。不過，以近期pattern，大陽燭過後多數唞氣，加上周三破旗成交大增至4,530萬元，的確花費了一點兒力氣，以目前市況未至於咁容易一條氣炒上，但可候低吸。同樣係旗形突破有高鑫（6808），呢間經營大潤發嘅零售股，周三升2%，只需成交微微增加就破旗，企穩7元再上難度不高。晉佳
http://fb.com/advanceguy1
來源:
http://hk.apple.nextmedia.com/financeestate/art/20170105/19886514
智取大市：升得急又完得快
1 :
GS(14)@2017-01-07 00:28:02近期有個怪現象，2017年首個交易日，氣氛仍然非常頹，突然青姐發4萬點偉論，跟住曾教授再預言港股可能升到你唔信，市場突然間由萬念俱灰，一兩日間變到希望在人間，變臉快到估唔到。日本漫畫《Liar Game》有段情節，主角同對手玩「多數服從少數」遊戲，參與者設法令自己成為遊戲嘅少數贏家，不惜講大話、諗盡辦法令其他人成為多數者。芸芸股市參與者裏面，喺imperfect information下，估多數者企喺邊一邊，然後令自己成為少數，講就容易，完美做到幾乎冇可能。只不過，當股市由低位開始升，好友原本係少數者，慢慢就會成為多數者，從投資心理方面，要學懂如何掌握接火棒嘅時間，不妨search番隔籬鄰舍八十後投機客喺本報以《賭徒在左，炒家在右》為題嘅好文。至於今次，好友由少數變成多數嘅速度會比想像中快，所以港股升嘅速度亦會比想像中急，短線升浪會比想像中完得更早。維持原先預期，23000點係舊年8月延伸到?家嘅平台阻力位，因此升近23000點，寧願減倉去觀察指數有冇能力突破，見到23000點突破再企得穩，先再建倉，策略改為短炒二三線股。太航（2343）噚日醞釀旗形突破，少少成交已推得郁第一棍，現跟進仲未遲。晉佳
http://www.fb.com/advanceguy1本欄逢周一、三、五刊出
來源:
http://hk.apple.nextmedia.com/financeestate/art/20170106/19887630
智取大市：食住糊等新強勢股
1 :
GS(14)@2017-01-12 08:07:27港股話咁快升近23000點，1月目標價提早達成，有貨可考慮減持食糊（除非少貨喺手），雖然之後升嘅機會仍然大過跌，但對後市把握已冇舊年年尾低位時咁大，呢一刻建議減持亦合理不過吧。升嘅理由係坊間股評都話「23000點可能有阻力」，小弟竟然同主流睇法企埋一齊，感覺不安，加上散戶入場取態仍然審慎，購買力似未耗盡，相反理論下，直覺似未到頂。同時又有跌嘅理由，唔少藍籌股開始技術超買，本地地產股新地（016）、新世界（017）9日RSI已去到80，未來確實難睇到好強勢嘅理由，所以開始有調整風險。減持，唔代表一面倒睇淡，只係轉趨觀望。假如突破23000點之後整體氣氛升溫，恒指又企得穩，而非即時派貨轉升為跌，到時先重新建倉短炒二三線股都未遲。不過，主流股份走向，睇嚟會由輪流升，變成有啲升、有啲跌。除咗地產股超買之外，江銅（358）12蚊正正係舊年侵侵當選後爆升嘅平台阻力，要一時三刻破位有難度。至於零售好股高鑫（6808）都見腳軟終止連升，可見食糊盤湧現。強股始終要有唞氣嘅時間，至於嚟緊有冇板塊會取而代之變成新強股？要再觀察吓。今日轉為觀望，暫不推介。晉佳
http://fb.com/advanceguy1
來源:
http://hk.apple.nextmedia.com/financeestate/art/20170112/19893795
智取大市：公司點解唱衰自己
1 :
GS(14)@2017-01-19 08:06:57話說2009年初有隻新股，叫做興業太陽能（750），新股記者會之上，班管理層不停唱衰自己前景，其後股價上市初期曾經跌穿招股價1.05元，但唔夠五個月，最高升到4.1元樓上，2014年創高峯，曾經升到15元。上市公司高層倒自己米，象徵住兩件事：第一，間公司衰到盡頭，趕晒所有冇信心嘅投資者落車，可能快見曙光；第二，上市公司高層點會益街外人，唱衰公司係為咗唔想你買，證明股價夠平。直至去年10月25日，竟發現相似劇本，百麗國際（1880）高層喺中期業績發佈會上，連環唱衰自己公司，點唱法？（1）話內地鞋類銷售比百貨公司情況更嚴重，甚至比化妝品類更差；（2）公司要預留現金過冬，因為鞋類業務「最寒冷的冬天還未過」；（3）首席執行官盛百椒講到自己過往「不知道甚麼是O2O」，2016年先開始嘗試做；（4）未來會減省門店數目，仲話「人手變動一定會有，而且是痛苦事」。夠衰未！10月25日，百麗股價曾急挫一成，而且再跌到去年年尾4.21元先見底，今個星期三反彈到4.87元，係10月27日以嚟高位，股價已轉強。跟住會點？好大機會升越百麗唱淡自己之前嘅股價5.58元（未計除淨），再長線啲當然更高更遠。代《利字當頭》一天晉佳
http://www.fb.com/advanceguy1
來源:
http://hk.apple.nextmedia.com/financeestate/art/20170119/19901270
智取大市：攻勢去到下月初
1 :
GS(14)@2017-01-21 03:34:54港股能夠喺低成交之下，成功企喺二萬三關口樓上，反映沽壓不大，短線繼續升機會較高。港美股市近期走背馳得嚟，大家喺唔同時間大漲小回，其中港股近期升、美股橫行，拉勻都係向上，咁係好現象。相信要炒到見頂，徵兆好大機會係港美股一齊升，目前睇嚟未有耐去到呢個位，預料恒指至少有幾百點升，距離2月初聯儲局議息前後，只剩八個交易日嘅蜜月期，睇吓短期內有冇機會一鼓作氣衝上接近二萬四。不過，上星期領教過氣氛一高漲就冚檔，相信稍後接近升浪見頂時，氣氛高漲嗰一刻同樣係稍瞬即逝，見頂食糊時間要拿捏得準確。之前講過霧霾概念有得炒，同時具備通脹概念嘅鋼鐵股更加強到冇人有。如只有單一概念、質地唔差嘅股份，仲未起動的話，都有機會追落後。光伏同樣受惠霧霾概念，比較優質要數近期被遺忘嘅信義光能（968），佢舊年12月發過盈喜，估計盈利升50%至65%，保守計只增長50%，市盈率只得10倍。公司旗下太陽能發電場業務增長比較高速兼穩定，可以抵銷光伏玻璃業務波動性，估值唔高，霧霾概念開始反映，所以股價似慢慢擺脫弱勢，炒上難度不高。晉佳
http://www.fb.com/advanceguy1本欄逢周一、三、五刊出
來源:
http://hk.apple.nextmedia.com/financeestate/art/20170120/19902469
智取大市：低位買樓有氣質
1 :
GS(14)@2017-01-24 02:00:31當大家質疑買新樓嘅杭州女仔有冇氣質時，另一位年輕買家以一臉勝利者姿態接受傳媒訪問，一星期前更有人發表「買樓要識投胎」怪論。好明顯，買家都覺得，自己上到車就贏晒。買幾百呎嘅樓，同買日用品或名牌產品好唔同，所附帶嘅奢侈品效應會隨時日而轉變。經濟低谷時，落街買厠紙係唔會俾人笑，買Hermés袋一樣能引人葡萄，但樓市低潮買樓，會俾朋友質疑：「話你硬膠驚你嬲，係我就出年嘅出年先買，到時會再平啲。」買樓會變成自貶身份地位嘅一種行為，畀錢消費卻有一種輸嘅感覺，所以呢個時候，樓賣得特別平。買樓當作奢侈品呢種風光，係屬於所謂有能力、有意或無意的炫富者，呢班往往係高位入貨的豪爽好友。真正嘅勝利，其實係屬於低買、高賣嘅沉默一群人。經濟低迷、樓市谷底時消費、買樓，等於為經濟雪中送炭，甚至提升就業，功德無量，古語有云「救人一命，勝造七級浮屠」，今有「低位買樓，勝造七級浮屠」。喺樓市瘋狂時上車，一句「自住需要」振振有詞，便能為高追護航，但同時為樓市推波助瀾、火上加油。由此睇嚟，低買嘅人，比起高追遠遠值得表揚。晉佳
http://www.fb.com/advanceguy1本欄逢周一、三、五刊出
來源:
http://hk.apple.nextmedia.com/financeestate/art/20170123/19905589
智取大市：通脹的十字路口
1 :
GS(14)@2017-01-26 07:42:51軍工、汽車，以至商品及糧油等通脹概念股跑出，仲要升到破晒頂。究竟資金湧入通脹概念股嘅趨勢，係開始還是終結？通脹概念股可以得升幾遠，視乎業績能否實實在在地交到數。單睇中糧油（606）中期業績同埋月初發表嘅盈喜公告，就能發現今次基本因素突變，來得突然。回帶番去中糧油舊年中期業績報告，講起下半年展望，生化業務方面曾經表示「市場需求低迷局面預計仍將持續」；小麥加工業務亦提到「在產能過剩未有明顯改觀背景下，行業盈利能力全面改善仍將受到制約」。去到今年初盈喜公告，講法大為轉變：「通過持續的市場開拓、區域深耕及營銷協同，有效應對行業需求增速放緩格局，本集團米麵油、麥芽、飼料原料等主要產品銷量顯著增長，綜合開工率大幅提升」。口徑有咁大改變，似乎因為下半年行情好到高層始料不及。上游原料價格上漲嘅趨勢已經實現，下一步關鍵，係原料加價能唔能夠成功轉嫁至最終消費者？得嘅話，通脹概念股呢股升浪，仲有得玩落去。撇除難以解開嘅基本因素，只談走勢，中糧油盈喜之後，周一股價再度破頂，反映投資者重視盈喜所發出嘅利好訊息，而成交踏入今個月先剛剛活躍起嚟，似乎強勢未完，可待調整吸納。晉佳
http://fb.com/advanceguy1
來源:
http://hk.apple.nextmedia.com/financeestate/art/20170124/19906636
智取大市：TVB準備翠如化
1 :
GS(14)@2017-01-26 18:06:46當大家講緊翠如BB股聯旺（8217）市值成309億元，差唔多買得起三間TVB（511）嘅時候，呢個現象反映兩個訊息。第一，?家啲殼股有幾貴得幾貴，因為A股一隻殼閒閒哋幾百億元市值，300億元翠如股so what？第二，反映TVB股價有幾殘，講緊壟斷香港免費電視市場，以前收市價26.6元計，市值竟然得116.5億元。
TVB同翠如股嘅分別，就係翠如股上市時街貨等如零，?家不見得多人揸手，鍾意點舞都得；至於TVB係傳統企業，仲要做過吓藍籌，於是吸引一味貪平、耐性十足嘅基金股東坐貨，一於等到佢升為止，偏偏TVB大股東包括殼王陳國強，最擅長搵街外人錢，殼王嘅利益，同班基金股東某程度形成對立關係。
TVB回購股份一嚟想用偏平而有溢價嘅價錢作妥協，希望基金股東有少少甜頭就願意畀貨TVB，換來一隻貨源歸邊嘅股，實行將TVB「翠如化」。劇本顯而易見，同TVB嘅師奶劇簡直係相映成趣，事實有冇咁簡單？你先睇睇佢哋嘅神劇吧，天台齊齊BBQ嘅大團圓結局之前，總有19集要演落去，中間梗係加插啲懶緊張嘅佈局。買唔買得過？如果佢裂口高開到30.5元左右或樓下，仲玩得過。晉佳
http://www.fb.com/advanceguy1本欄逢周一、三、五刊出
來源:
http://hk.apple.nextmedia.com/financeestate/art/20170125/19907477
智取大市：新春升市博得過
1 :
GS(14)@2017-01-26 18:18:29市場信心的確增加，如果只睇住恒指喺23000點關口上落，仲以為係上落市、方向未定，實情係周二資源商品股爆升已證明整體港股向強方進發，呢一刻升勢傾斜去少數股份度，證明升市尚未全面擴散，係好事。玖紙（2689）發盈喜，繼而有江銅（358）盈喜、美鋁公佈業績勝預期，仲有兗煤（1171）190億元買力拓澳洲資產，商品資源股好消息一次過井噴，呢啲消息亦加強咗通脹概念股翻生嘅證據。但好消息之下，領頭羊中鋁（2600）大成交高位陽燭縮短，似乎攰攰哋，加上商品股初起，唔代表可以直線急升一去無回頭，途中總有唞氣時間。港股新年前成交不多，資金只限於輪流炒作，睇吓會唔會翻炒同樣有通脹概念嘅食品股。整體大市喺新年長假期前後，都仲值得樂觀，港股通南下淨買入增加，似有所圖，而長假期間可以博美股破頂後冇阻力連日快放，到時一次過反映幾日美股走勢，期望新年後直至美國議息前後時段挾得高，但去到指數股齊齊升嗰一刻，反而資金由強股流入「唔關通脹事股」，先係尾水訊號，容許且戰且走。股份方面，除商品股強勢外，通脹概念嘅中糧控股（606）、盈警都冇大跌嘅東方電氣（1072），以至軍工股王者中船防務（317），都係候低吸對象。晉佳
http://fb.com/advanceguy1
來源:
http://hk.apple.nextmedia.com/financeestate/art/20170126/19908640
Next Page