ZKIZ Archives


無線最終目的係唔播港臺節目 中環客

來源: http://hkcitizensmedia.com/2016/09/20/%e7%84%a1%e7%b7%9a%e6%9c%80%e7%b5%82%e7%9b%ae%e7%9a%84%e4%bf%82%e5%94%94%e6%92%ad%e6%b8%af%e5%8f%b0%e7%af%80%e7%9b%ae/

呢個禮拜日,無線唔播歷史以嚟都播嘅《城市論壇》,寧願重播其他節目,原有城市論壇前一個鐘,就播由梁粉牙醫陳健強,同埋做過嚇政務官嘅商臺主持黃永主持嘅《周日龍門陣》。

以收視,以陣容,以火花,以成本等計埋,無線唔播《城市論壇》完全無道理,因為《城市論壇》用公帑製作,集集都星級陣容打到七彩,而以歷史攸久,實有收視,無線呢個決定睇落好無厘頭。

但如果你計埋無線想唔播港臺黃金時段果筆,就唔係咁計。

根據現有免費電視牌照規定,牌照持有人一定要撥出黃金時段嚟播香港電臺節目,而當時有咁嘅牌照規定嘅理由,係因為港臺無自己嘅頻道,而一直以嚟,港臺電視部嘅節目唔少因為係幫政府做宣傳,所以被視為票房毒藥,拉低黃金時段收視,影響廣告收入。黃金時段係有《頭條新聞》呢啲過癮節目,但果啲政府部門同港臺合作製作嘅節目,大部分都悶到無人想睇,係近年港臺中人為咗整蠱警方,拍《警訊》 案件重演竟然用上MK活地雅倫之稱嘅葉念琛手法,竟然因為cult味濃而成為網民熱話,呢個係後話。

如今港臺有自己嘅頻譜,無論數碼定模擬,遲早都做到全港覆蓋,既然係咁,港臺係時候交番商營電視臺嘅黃金時段,依家無線咁做,唔係扭計,而係證明港臺節目就算唔交俾商營電視臺都有人睇嘅。如果咁計,星期日嘅收視同廣告,換番星期一至五黃金時段,除笨有精。

只不過,梁振英肯唔肯呢,我中環客都係木宰羊。或者《周日龍門陣》都係同梁振英講,我地會安排梁粉節目,仲聽話過香港電臺,可以放心俾番啲黃金時段。

中環客

PermaLink: https://articles.zkiz.com/?id=216418

【很想看吧】治癒系《魚樂無窮》進階版 漫。電視唔播魚播貓

1 : GS(14)@2017-05-13 02:04:52

高清香港塵世美,真係幾好睇。(港台電視節目截圖)



亞視非永恆,落幕終有時。要數番亞視經典節目,點少得最長壽節目Telefision《魚樂無窮》?實時影住缸魚,竟然變成元祖級治癒系節目,仲要家喻戶曉,都幾劃時代。記者早前發現港台電影32台有進階版《魚樂無窮》,名為「漫。電視」,不過就多元化得多,有砌模型、高空看香港、貓貓狗狗、各式海洋動物及雀鳥,傳統啲仲有篆刻同粵劇花旦小生化妝過程!



港台電視32台平時主要播新聞及立法會開會情況,間場或晚上就會播吓呢種近似實時的節目。當中有「小貓篇」,影住啲貓追波自娛,或者上演呢排大熱嘅武林格鬥技,可愛到犯規呀!坐定定眼定定咁睇,快活不知時日過。香港電台電視部節目部總監陳俊樂就強調拍漫。電視,概念並非源自《魚樂無窮》。「我哋唔希望似《魚樂無窮》咁,今日睇同聽日睇都一樣,我哋反而對歐洲流行嘅Slow TV(慢電視)更有印象。挪威有人睇火車頭可以睇得咁投入,而且仲係全城熱話,令我哋好記得。」陳俊樂口中所講的係挪威NRK國家電視台推出的節目,把鏡頭置在火車頭,拍攝從卑爾根到奧斯陸車程的沿途風光,長達七個鐘,係,七個鐘,喺睇七分鐘片都嫌長的年代,竟然有過百萬人睇,佔挪威總人口四分一,創出收視神話。



由於航拍困難,「高空看香港」系列必須剪輯,每個景色大約只有五至十秒,便會接上另一位置。(港台電視節目截圖)

拍攝動物題材,得到愛護動物協會、動植物公園及海洋公園幫忙。(港台電視節目截圖)

香港節奏快到喘氣,未必容得下呢種節目,所以港台32台就玩多元化,拍攝不同類型影片。資源有限,有些節目係員工公餘時間喺屋企拍攝。「例如播貓嗰個節目,同事覺得『太好了,我屋企啲貓唔錯!』嗰個同事有五隻貓,拍嗰陣出動阿媽前後夾攻,引啲貓去鏡頭前,好多趣事。」《魚樂無窮》實時感重,但見貓貓片有剪接位頗多。「原本我哋都好想自然啲,唔剪接片段,盡量希望直落。但有時畫面真係乜都無,兩三分鐘都無貓,佢喺度瞓覺我哋覺得ok,但出咗鏡就sorry啦,要剪走。」同樣要剪接嘅仲有航拍香港靚景。「高空嗰條片,有啲人會問點解唔係一shot落,觀眾唔明白架飛機去唔到咁遠,啲電都捱唔到咁耐。」佢就話呢個系列比較受觀眾歡迎,收到不少好評。「佢哋覺得啲景好靚,有人話自己坐喺度睇咗一個鐘。」



小貓嬉戲追逐,貓癡如我真係唔介意睇半個鐘。(港台電視節目截圖)

香港電台電視部節目部總監陳俊樂表示即使是低成本製作,都希望漫電視觀眾有更多選擇。

漫。電視硬係好似上咗年紀嘅人先啱睇咁,佢哋拍攝前都曾經擔心觀眾層面唔夠廣,於是特別詢問年輕同事意見,後來衍生咗砌模型系列。她笑謂:「同事用自己時間拍,砌嘅過程佢唔可以去廁所,係可以閂機再來,但佢希望一shot落。」佢提到會考慮向一些攝影發燒友的影片商借影片,擴大片源。「有公眾參與,層次又唔同。」嚟緊有更多題材推出,例如「爬山單車篇」、「相思雀篇」、「烏龜篇」等等,詳情考參考港台電影32台節目表。記者:葉青霞攝影:許先煜2017果籽繼續認真知味。識買惜用。行以求知。好事多為。重修舊好。緊貼果籽報道,即like:http://fb.me/AS.AppleDaily




來源: http://hk.apple.nextmedia.com/su ... t/20170511/20017206
PermaLink: https://articles.zkiz.com/?id=332760

Next Page

ZKIZ Archives @ 2019