智取大市：穩守突擊靠一招
1 :
GS(14)@2017-02-03 02:55:14上期講到，新春期間有兩個壞消息，但恒指周三先跌後幾乎收復失地，出乎意料地強，肖建華失蹤事件未對市況構成即時威脅，相信稍後都冇大問題，至於反對特朗普聲音越嚟越大，再有行政命令遭極力反抗係遲早的事，嚟緊會繼續衝擊美股，要港股直線上升？恐怕還要過呢一關，估計港股即使升，過程亦未必順暢。雞年開市為安全起見減持，惟有當執倉。汰弱留強之下，圖靚股票仍值得尊重，只要整體持倉唔多，可先買一隻，lead得住再買下一隻，有甜頭才加注，係可取方法。記住要保住不敗，然後才求勝。據日媒1月初報道，2020年之前，中國三大電訊商將會進行3,000億人民幣投資，建立5G通訊網。如果消息屬實，未來三年電訊商將要投入龐大資本開支，相關概念股中國通信服務（552）升到無雷公咁遠，其實京信通信（2342）都有睇頭。京信去年上半年賺1.13億元，按年升4%，每股賺5.06仙，全年估計一毫子，市盈率15倍，未來幾年有5G資本開支條水射住，可望回復增長。想當年京信喺2010年4G投資高峯期，股價升近6蚊，現時1.49元簡直濕濕碎，值博率夠高。晉佳
http://www.fb.com/advanceguy1
來源:
http://hk.apple.nextmedia.com/financeestate/art/20170202/19914837
智取大市：用絕望價去博翻身
1 :
GS(14)@2017-02-07 05:14:10近兩個月，個股每逢大陽燭突破，升勢往往持續，第一棍通常只是開始而非結束，睇嚟連日守住10蚊、噚日大陽燭嘅天虹紡織（2678），後市都唔錯。天虹之前發盈喜，話舊年10個月盈利超過10億人民幣，理由係銷量強勢加上毛利率增加，夠convincing，產品跟隨棉花價格提價，亦證明原材料價格升勢能夠轉嫁至下游，屬好兆頭，係通脹概念股佳選。上一期講到百麗（1880）未來一至兩年業績可以走出谷底，原因係運動、服飾毛利將會超越鞋類毛利，其實運動、服飾業務大部份收入來自代理Nike同adidas產品，手執兩個最食應潮流嘅運動鞋品牌，似乎第三季度同店銷售增長放慢到唔夠半成，只會係暫時性，相信稍後回復較快速增長唔難，呢一part盈利可測性亦高。長遠百麗有條件升幾多？潛力在於以自家品牌為主嘅鞋類業務，可以有幾大改進空間。短期內百麗會scale down鞋類業務，較大可能第一步係執咗虧損店舖，仲暗示過會裁員，相信鞋類業務盈利跌幅會逐步減慢。下一步，相信係如何改善品牌同自家產品質素，即使未反映到呢一步，都夠股價升。晉佳
http://fb.com/advanceguy1
來源:
http://hk.apple.nextmedia.com/financeestate/art/20170207/19919914
智取大市：點樣分辦大時代
1 :
GS(14)@2017-02-09 23:43:32噚日上晝內房股無啦啦畀人喪掃，下晝港交所（388）冇消息爆上半成，咩玩法？恒指剩係升153點，成交都有成892億元，但成交一旺，雞犬皆升，又隨時係見頂訊號，後市一係短線即時見頂，一係至少有一個「港股小時代」，點樣分？好簡單，噚日900億元成交，如果即時見頂，今日就會價量齊縮，當炒股亦會出現派發迹象，證明購買力已耗盡。如果今日炒風依然持續，成交keep到800、900億元，呢個成交、升勢甚至保持到周五，就確認後市勁勁勁，「大時代」唔係冇可能。你問我，主觀意願梗係想出現後者劇本，但往績通常係前者居多，大家要小心。即使係見頂劇本，亦唔代表全部板塊齊齊散晒嘅，上一期講到半冷門燃氣股都仲揸得過，因為貪佢非主流，兼有些少防守性特質，資金沽大路股，可能轉買呢啲。至於當炒股短線前途未卜，如果手上冇貨，呢一刻不建議窮追，睇多一兩日吧。晉佳
http://fb.com/advanceguy1
來源:
http://hk.apple.nextmedia.com/financeestate/art/20170209/19922225
智取大市：似唞氣多過散水
1 :
GS(14)@2017-02-11 18:34:54港股噚日晨早出現大時代式狗衝，成交超過900億元，究竟見頂未？仔細分析吓小時圖成交，同埋上下半場股份表現，相信有定論。小時圖成交方面，上午10時至11時期間，主板成交多達245.6億元，仲呈現陰燭射擊之星形態，可以話係短期利淡訊號。過往喺中線升浪頂部遇上呢種情況，通常市況會即時逆轉，由升轉跌，大戶鬥快掟貨。至於昨日11時過後，強勢股除咗內房股仲繼續升之外，商品股江銅（358）高位回4%，中鋁（2600）高位殺落近7%，吉利（175）亦回6%，中線最強勢股的確腳軟軟，但資金仍樂此不疲搵股狗衝，升勢初起嘅百麗（1880）升半成，航運股升幅擴大，可見情緒並不悲觀，只係大家明白市場有健康整固必要，所以個別強股回吐。如果今日市場情緒保持樂觀，有股回，但又有股炒，相信過咗整固期，整體大市大漲小回趨勢難有改變，對於中線後市可以睇得更好。商品股、汽車股已非首選，2月吼兩會概念，除燃氣股外，呈圓底、兼近期沿住保歷加中軸支持慢慢上嘅信義光能（968），兩會3月初揭幕前，揸住3個星期應該唔錯。晉佳
http://www.fb.com/advanceguy1本欄逢周一、三、五刊出
來源:
http://hk.apple.nextmedia.com/financeestate/art/20170210/19923275
智取大市：唔棄糊就博龍頭
1 :
GS(14)@2017-03-03 00:58:15之前講過恒指觸及月線圖保歷加上軸，同時通道正在收窄中，未來幾個月後市難大升，中線形勢幾乎可以下定論。不過短線就難估了，恒指小時圖呈圓頂，唔靚仔，上星期個股逢突破即打返落嚟，明顯唔少低位買咗貨嘅大戶食緊糊。不過去到噚日中交建（1800）爆升8%率領基建股、鋁股向好，強股玖紙（2689）chok嚟chok去都仲喺10蚊邊，證明勇敢的投資者仍有膽落注，信心似未被打沉。短線會調整完，再升過？睇嚟要以下兩種情況求其一種成立。第一，股市跌到已獲利嘅大戶都覺得平，入場撈番貨，睇怕冇咁早，呢個情況暫時唔會出現；第二，市場買需強到足以消化獲利盤，然後再搶高，呢個反而有點可能。如果獲利盤真係消化晒，然後買上，分分鐘一批原本食完糊嘅人都恐慌性反手買入，股價搶高得更急。踏入3月份，保歷加上軸收窄到24465點，要短線轉勢破2月份高位24213點，觸及上軸甚至短期突破，向上的話有700點甚至更多的上望空間，博唔博悉隨尊便。情況有如打牌，一鋪牌打到末段，做緊鋪牌又唔算好靚，但其餘三家又唔見得大牌，輸你唔死，十五十六，棄糊又有點可惜。唔棄糊的話，買股之前就要有輸嘅心理準備，才是最穩陣。喺難操作嘅情況，就要做一鋪容易食得出嘅牌，所以要買就買番龍頭股，吉利（175）、舜宇（2382），make it simple。晉佳
http://fb.com/advanceguy1
來源:
http://hk.apple.nextmedia.com/financeestate/art/20170302/19944632
智取大市：邊破頂邊玩謝你
1 :
GS(14)@2017-03-22 00:30:33過往恒指破頂，大多數好好炒，唔係雞犬皆升，都起碼升股多過跌股，搵食絕不艱難。不過，上星期四突如其來喪衝近500點，表面睇指數大好形勢，其實商品資源股之類嘅升市主力板塊動力大不如前，恒指大陽燭之後嘅星期五，再升多21點，但靠騰訊（700）、中移動（941）頂住指數，頭先講嘅商品股？中鋁（2600）打回原形，年頭係威係勢嘅汽車股殺個片甲不留。與此同時，美圖（1357）飛上外太空，再數爆升股，新秀麗（1910）、冠捷（903）業績好急升破頂，後面兩隻，散戶投資者一向少理。以近期熱門股計，近兩日冇幾多隻賺大錢。今次破頂係少有地難玩，所以更加要平常心看待，升唔太興奮、跌唔太恐慌，去留決定或許更冷靜。冠捷舊年第三季除稅前盈利3,190萬美金，已經顯示turnaround，第四季仲升到4,395萬美金，單計下半年每股盈利都11.8港仙。有別於舊年上半年毛利上升地蝕錢，舊年下半年喺毛利下跌情況下賺錢，繼續以縮規模去爭取盈利，需知道削成本係遠比開源容易做，冠捷未來keep住盈利表現，相信難度不大。績後單日爆升13.5%，證明投資者取態較幾個月前樂觀，中長線繼續係唔錯選擇。晉佳
http://www.fb.com/advanceguy1本欄逢周一、三、五刊出
來源:
http://hk.apple.nextmedia.com/financeestate/art/20170320/19963485
智取大市：有線背後之盤算
1 :
GS(14)@2017-03-23 06:23:56有線電視可能執笠，早前成為焦點，其實九倉（004）想將部份投資物業以實物分派形式分拆上市，都有一定啟示性。點解要實物分派形式介紹上市？唔要IPO，因為介紹上市審批程序較快，一個字，趕！公佈研究分拆前，九倉市值1,900億唔夠，如分拆埋時代廣場同海港城，物業估值點都有2,200億，可谷大九倉市值。雖然介紹上市冇得即時沽貨，但上市後禁售期通常只有6個月，審批進程相對IPO快，時間未必差好遠。若IPO上市而九倉減持舊股，就來得太張揚，會壓低估值。如果新公司介紹上市後半年，突如其來賣舊股，肯定沽個價更靚，食得更盡。大家要留意，九倉喺冇detail下都要公佈分派構思，純粹利用有線轉移視線，成功咗！吳光正吼位摸出投資物業，有乜implication？話說吳光正御用經紀哥連頓證券，早年炒新地（016）出神入化，經常低買高沽。九倉分別喺07年11月同11年2月宣佈供股，都成功喺股災前高位抽，次次高位靚沽，眼光極準繩。今次九倉變相減持投資物業，會唔會又一次應驗出現樓災？睇嚟未來一兩年上車買樓嘅人要小心。晉佳
http://www.fb.com/advanceguy1本欄逢周一、三、五刊出
來源:
http://hk.apple.nextmedia.com/financeestate/art/20170322/19965680
智取大市：趙薇機會在明天
1 :
GS(14)@2017-03-24 17:06:30啱啱過咗41歲生日嘅趙薇，當初由影星變影后，變埋股后，再陷入肖建華案，買A股冇錢找數大大鑊，大家買定花生等睇人仆街之際，佢或者會表演多次絕地翻身畀你睇。21歲憑住《還珠格格》走紅，固然係佢人生一大轉捩點，但能夠令昔日嘅趙薇蛻變成為今日嘅趙薇，可能係一樽屎。不能不提2001年嘅軍旗服事件，趙薇穿着以日本軍國主義旗幟設計連身裙嘅照片曝光，激嬲近13億人之餘，當年12月尾畀人衝上台當眾淋屎。對於靠面子搵食嘅藝人嚟講，如斯打擊可以提早收檔。趙薇其後幾年變得低調，封殺令持續幾年都未完，呢段日子，應該令趙薇作出好大嘅改變。鑄成呢一次大錯，絕地翻身分分鐘難過由零開始，就要有十倍奉還嘅決心。面對咁大嘅難關，正常已game over，但趙薇選擇等機會，然後一而再、再而三打出漂亮翻身戰。換轉當年佢抵受唔住打擊嘅話，退出幕前，或許到今時今日，大家一提起「趙薇」兩個字，就會記起啲屎屎尿尿。十幾年間，?家大家一提起趙薇呢個名，影后？富豪？奇女子？趙薇既然反擊過一次，第二次會點？希望傳奇故事仲未完。
晉佳
http://www.fb.com/advanceguy1本欄逢周一、三、五刊出
來源:
http://hk.apple.nextmedia.com/financeestate/art/20170324/19967965
智取大市：金隅勝在有清明
1 :
GS(14)@2017-04-06 07:40:29雄安新區被官媒唱好為「千年大計，國家大事」，雖然長線規劃未殺到埋身，但短線更重要嘅係，大陸資金炒唔炒。金隅（2009）貴為龍頭股，喺佢2015年年報Ctrl F去search吓容城、安新同雄縣，係0個結果；而金隅位處河北市項目，同雄安新區距離仲遠過北京同天津市，事前連龍頭股都唔發展呢一區。金隅最大受惠嘅因素係持有旗下河北水泥龍頭冀東水泥約50%股權，既然冀東水泥獨注受惠雄安新區，又喺A股上市，大媽又何需要買金隅呢？雄安新區消息上周六見光，結果金隅賺咗星期二清明節假期前A股同港股通休市一日，資金逼住鬥快反映消息，喺香港狂掃金隅。噚日A股復市，概念股供應大增，金隅於是先急升後回，皆因佢股價表現，或許已反映A股冀東水泥連續幾日升停板。長遠而言，金隅呢個政策概念，仲要畀控股公司折讓。或許拜得神多、自有神庇佑，金隅股價得以連升兩日，但呢一刻市賬率依然1倍唔夠，就反映市場事前根本睇唔起呢隻股，或許本來經營能力遜於其他水泥股，所以估值一直低殘。上述幾個因素七除八扣之下，吸引力已經欠奉，之後會點？單日超過30億成交，相信今後已經「美圖化」，chok到阿媽都唔認得。晉佳
http://fb.com/advanceguy1
來源:
http://hk.apple.nextmedia.com/financeestate/art/20170406/19981290
智取大市：呢轉成交少唔係壞事
1 :
GS(14)@2017-04-12 22:40:08噚日基本上係濠賭股獨贏，再加個別細價股爆上，其餘板塊普遍偏軟，升股比例連續3日低過跌股比例，主板成交跌到651億元，唔少個股進入調整，但成交下降，沽壓亦減輕，唔係壞事。個股普遍睇住20天線，往往係一個指標。近期唔少股份調整但成交逐步減少，然後低成交地守住20天線，反映沽壓減輕，企得穩20天線，後市睇升多過睇跌。其實唔少濠賭股，例如銀娛（027）、新濠（200）等等，之前都係沿住20線慢慢上，最後升幅才擴大。早幾個月講過，喺港股之中，以市值對營業額比例計，冠捷（903）幾乎平絕港股，而股價由1.5元左右，受業績支持而升到最高2.27元，噚日收市回吐到2.01元，亦差唔多去到20天線。話得係長線之選，股價由起步位升三、四成，相信仍未止步。喺港股當中，冠捷市值對營業額比率由舊年首次推介時嘅第三，跌到落第五，比率之中作為分子嘅股價/市值上升同時，作為分母嘅營業額亦下跌，令到比率由0.04倍，升到去0.06倍，但仍然係超平嘅水平。更重要嘅係，冠捷連續兩個季度嘅業績顯示，公司營業額下跌、業務規模縮減，削成本效應明顯，皆因盈利一路回升，舊年第三季除稅前盈利3,190萬美金，第四季仲升到4,395萬美金。股價亦大漲小回，一切都向着預想劇本進發。冠捷年報提到，舊年公司重組歐洲創新同發展中心，將其部份產品開發職能轉移至台北同廈門嘅創新及發展中心，慳成本之餘，公司嘅工程師可以更快解決生產問題。另外，冠捷兩個巴西廠房二合為一，一樣可以慳成本同提高效益，重組費用已經入賬，自從2017年起，每年可慳3,000萬美元費用。今年業績最大變數係面板價格，只要面板價保持穩定，冠捷今年業績增長冇難度，近期股價調整到20天線附近，值得一撈。晉佳
http://fb.com/advanceguy1
來源:
http://hk.apple.nextmedia.com/financeestate/art/20170411/19986491
Next Page