📖 ZKIZ Archives

派得好投資組合月結 (Oct 2011) PARTIPRAL - ROAD TO FINANCIAL FREEDOM

http://partipral-hk.blogspot.com/2011/10/oct-2011.html

以今日收市價計, 投資組合現時持股狀況:

包浩斯盈警 PARTIPRAL 派得好

http://partipral-hk.blogspot.com/2011/11/blog-post.html

包 浩 斯 國 際（控 股）有 限 公 司（「本 公 司」連 同 其 附 屬 公 司，「本 集 團」）根 據 香 港 聯 合 交 易 所 有 限 公 司 證 券 上 市 規 則（「上 市 規 則」）第13.09條 作 出 本 公 佈。

頗出乎意料之外既盈警竟然唔係出現響小型工業股而係出現響本地零售股包浩斯(483)身上. 自己一直都有留意開呢間公司, 雖然一直無持有, 但都曾經講過下自己睇法, 詳見舊文

0483.HK 包浩斯國際2011業績.

細閱呢則簡短通告, 管理層將盈利下跌歸咎於經營成本增加及大陸溢利貢獻大跌. 根據過去幾年表現, 包浩斯香港部份既盈利算係可以保持, 就算無增長, 都無乜理由會突然大跌. 所謂既"經營成本增加" 我估計係指租金, 但根據上幾份業績報告, 反而睇到租金上升對包浩斯影響非想像中大, 尤其係大部份租約都應該係一簽就幾年, 若然呢部份出事, 應該上一份業績可以睇到端倪, 所以實際上令今年份半年業績走樣既主因應該係"大陸溢利貢獻下跌".

包浩斯2010年上半年稅前賺3千2百幾萬, 當中大陸分部佔近3成約1千萬左右, 但下半年大陸盈利已跌至得番6百幾萬. 若然今個半年錄得大幅倒退, 即係有機會比上年下半年做得更差, 盈利可能跌到5百萬都無. 上一份業績所見, 包浩斯已開始慢慢減少大陸特許經營店而轉為自營, 開店速度無減慢, 但盈利能力不足既情況反而愈浮愈上面. 當然, 實際情況都要等業績公佈後先知, 唯一希望既係營業額唔會出現倒退. 始終零售業大部份成本都係固定, 只要營業額起碼保持, 他日能夠翻身既機會就大得多.

正如我8月份時所講 "不過較值得留意既係雖然公司講明致力開拓大陸市場, 但今期業績卻顯示大陸分部響營業額大增既同時溢利反而倒退18%, 主席報告書亦無交代為何倒退, 報喜不報憂乎? 成份業績我覺得關鍵會係響呢度.", 其實上一份業績已經可以睇到包浩斯大陸盈利出現問題, 只係佔既比重唔算太高, 估唔到要出盈警咁嚴重. 包浩斯香港一般下半年先係旺季, 只要今次香港分部盈利能夠力保不失, 實際情況應該未算太壞, 等業績公佈後再分析.

業績簡評 - 包浩斯國際 (0483.HK) PARTIPRAL 派得好

http://partipral-hk.blogspot.com/2011/11/0483hk.html

包浩斯今日收午市後公佈已有盈警打底既中期業績, 先睇損益表.

半年收入同比增長2成至4.7億; 毛利率竟然可以再擴闊多兩個百份點至71.7%, 證明BAUHAUS有能力專注走中高檔路線; 純利不協調地大跌35%至1千5百萬, 乃自上市以來最差之半年表現; 純利率減近半至3.2%, 派息維持2仙.

大陸收入升26%但利潤跌到反肚, 管理層對此解釋為: "除 中 國 內 地 之 經 營 成 本 日 益 增 加 外，本 集 團 面 對 之 問 題 亦 包 括 欠 缺 足 夠 應 付 其 迅 速 發 展 之 有 效 銷 售 管 理 人 員 及 技 術 卓 越 之 工 作 團 隊。". 第一個原因都可以理解, 但第二個原因就有D令人摸不著頭腦, 如果銷售管理人員效率不足, 何解營業額可以追到店舖增長? 睇到員工成本大增3成至9千4百幾萬, 奇怪既係店舖多左18間, 但僱員就只係多左13人, 上年度下半年員工支出講緊都只係7千8百幾萬! 可以出現咁搞笑既情況即係話一係就全體員工半年以來加薪2成, 一係就新請果13個人係超人, 每人年薪2百幾萬, 一係就董事肚滿腸肥. 對股東黎講, 以上幾個原因都唔易接受. 唔計報告入面無提既不明部份, 其實最影響今期純利大跌既就係員工支出, 而且大部份都係來自大陸, 所以大陸分部純利大大走樣.

再講BALANCE SHEET, 最礙眼係存貨不尋常地大增, 擺明滯銷; 現金大跌到得番5千幾萬, 短債又突然多左8千幾萬, 就算計埋買倉, 現金都係少左好多, 損益表數字水份味濃. 唔係話借錢就十惡不赦, 只係相信物必先腐而後蟲生, BAUHAUS一向唔需要借錢經營, 何解依家又要呢? 咁既情況下去勉強維持派息, 又係唔係好事呢? 分分鐘下半年即減番.

早早於上一份業績已顯示大陸分部營運有問題, 但當時管理層完全無交代過, 所以先搞到今次反差咁大. 開頭仲估佢都賺到幾百萬, 點知原來差D要倒蝕. 明明擴張速度無特別加快, 好難明白點解近兩期大陸業績可以FREE FALL. 加上財政有轉弱跡象, 現價$2.02 P/E 15倍以上, 息率不詳. 不明朗因素太多, 就算再跌, 都無乜投資價值.

業績簡評 - 經濟日報 (0423.HK) PARTIPRAL 派得好

http://partipral-hk.blogspot.com/2011/11/0423hk.html

經濟日報剛公佈中期業績, 營業額4.87億, 比上年同期微升而同下半年持平. 毛利率大跌至43%, 純利得番5千萬鬆D, 同比倒退27%; 環比倒退4成. 晴報出爐, 白報紙價格及使用量急升的確係純利倒退主因, 喜幸佔營業額超過4成之員工成本微跌, 否則今期業績會更難睇.

出版業日常經營成本大部份都係固定開支, 今期經濟日報純利率已經跌到得番10%左右, 變左又打回原型去番前年既水平, 若然下半年廣告收益跌1成, 基本上已經足以令整個下半年無錢賺. 免費報紙市場競爭異常劇烈, 一日未有皇者出現, 個個都可能係鬥燒銀紙. 管理層好有決心亦好樂觀會打得贏呢場仗, 但作為股東就要認真諗下係咪同佢共患難.

現金水平保持, 但岩岩11月頭俾左2億買間印刷公司, 所以公司實際手頭現金唔會淨低太多. 今期派息率無特別減, 但要小心就算下半年盈利保持, 全年派息都未必可以有前兩年咁闊佬, 可能跌到4-50%都唔奇, 仲未計純利倒退因素.

晴報今年7月尾先出爐, 單單倚賴上一份業績其實好難估計到今期賺少咁多錢, 既然睇唔透前景, 目前10倍P/E以上既估值應該偏貴了.

派得好投資組合月結 (Dec 2011) / 半年結 PARTIPRAL 派得好

http://partipral-hk.blogspot.com/2011/12/dec-2011.html

其實聽日仲有市, 本來呢篇文應該聽日先寫, 但因為可能無時間, 所以趁今日得閒寫左先, 其他數據後補.

2011年轉眼又就快過, 呢個BLOG亦都已經岩岩好開左一年, 雖然文章產量唔多, 但最起碼係自己個組合依然仲健在, 已經算係一件頗值得安慰既事.

當初有打算建立一個投資組合, 當係儲錢又好, 當係乜都好啦, 開頭其實唔會覺得係一件太難既事. 扮勤力睇下年報, 計下數, 睇下P/E派息, 咁就OK. 但實踐落黎先發現其實要構建一個成功達到正回報既組合並非想像中容易.

每個人都有自己既選股喜好, 無分對錯我亦無能力作出批判, 純講我自己. 單睇表面證供, 新昌管理(2340.HK), 亞倫國際(0684.HK)同龍記(0255.HK)都應該係正當公司, 但偏偏自己今年輸得最甘既就係呢三隻. 有時候回報會說話, 無可能明明蝕到仆直仲大嗌市場唔理性.

嘗試檢討當中失敗既原因, 後兩者會比較明顯, 就係忽略公司周期性而心急入貨. 記得買入龍記既時候係今年2月, 大市正係響高位徘徊, 市場氣氛其實算頗正面, 而撞正龍記就快出全年業績, 有種執輸行頭慘過敗家既心態, 仆都仆到入左貨先講. 工業股10倍P/E可能唔算貴, 但一定唔叫平, 好驚唔買遲D升左無得買既心態, 同時亦忽略左宏觀經濟條件, 變相盲目將缺點美化. 呢個其實係一個好好既經驗, 尤其係對初涉股海既我黎講, 當時未經歷過後來見萬六點果種跳樓式斬倉, 根本唔會明白乜野叫平貨.

亞倫國際既情況亦類同, 唯一有少少分別既係當時亞倫公佈左一份唔太理想既業績後我先仆去入貨, 但講到尾其實都係心急累事. 排除極端情況, 一間公司由高峰滑落, 無乜可能好似跳樓機咁直插地面, 業務走下坡前多數會有轉角位露多少端倪. 而亞倫今年6月尾果份業績正正係業務轉角位, 以呢個位置手持去年業績而做買貨切入點可能會一個比較錯既選擇, 下次應該避免.

最後講新昌, 反而表面最唔知衰乜可能係呢隻. 業務穩定, 派息紀錄良好, 息率高呢D全部都係賣飛佛FACTORS. EVENTUALLY大敗而回, 原來係輸在唔捨得. 我記得我係舊年7月尾買新昌, 但同年8月尾已經公佈左一份頗難睇既業績, 而自己繼續持有既藉口係俾時間公司轉型. 到最後等足一年, 公司結果都係無起色, 一樣係要斬纜離場. 相對前兩者我會覺得投資新昌既失敗日後會比較難避免, 但有一個令損失減輕既做法仍然值得備忘, 就係減注. 見勢色唔對路, 先行縮注, 降低有可能受到既損傷程度, 都好過繼續一廂情願.

以上可能之前都有講過, 但怕自己唔記得, 所以都係寫多次, 希望新一年投資投巧可以再進一步. 2011年對投資者黎講可能係好難捱, 但請放心, 2012年可能會更加難捱.

有關個人對2012年既展望, 其實係傾向較悲觀同保守, 除左因為係世界末日年之外 (笑), 本身大家面對緊既問題亦似乎愈黎愈難解決, 歐債危機講到口臭, 但依舊沒完沒了; 大陸HARD LANDING, 十年一覺A股夢等等都係頗令人沮喪. 壞消息係好多, 所以我認為來年第一季整體股市表現會依舊一池死水, 不過就算下跌, 都好大可能係陰跌INSTEAD OF 8,9月果種不問價拋售. 因此, 就算對股市信心不大, 但唔代表需要完全絕望. 因為只要唔係恐慌式喪插, 好股票仍然有很大機會跑贏大市.

好鍾意 "嚦咕嚦咕新年財" 入面既一句非常有激勵性既對白: "越難打既牌就越要俾心機打". 依家既情況正正係咁. 雖然未知一個又一個既難題最終有咩解決方法, 但世事難料, 往往轉角位就係響最艱難既時候出現, 尤其係當普遍基金持倉水平都偏低既時候, 下望空間其實唔會太多. 故此, 一定要有雨後陽光既信心, 先會睇到機緣無限.

回顧2011年投資組合表現, 年頭既單位面值係63.06, 年尾係69.34, 升左差唔多10%, 無論以絕對表現計抑或相對表現其實都應該頗令自己滿意. 最大功臣看似係聯亞帶來既一倍升幅; 但以全個組合睇, 最大功臣其實係唔覺唔覺既股息收入, 佔左總回報超過5成. 邊個話股息無用?

2012 - 新一年 新希望 PARTIPRAL 派得好

http://partipral-hk.blogspot.com/2012/01/2012.html

尋日放埋鬼佬新年最後一日假, 又既然已經做完2011年回顧, 忽發奇想, 係咪應該開始為2012年定立一D目標呢? 去年股票投資組合升值10%, 若然此後每年都能打出相若水平, 縱然講唔上高手, 都算係比下有餘. 當然, 要做到每年複式增長10%肯定唔係一件易事, 所以依家都無謂講到太長遠, 就講2012, 先為自己訂下10%回報做目標先啦. 就算最終真係願景落空, 明年今日有機會重看此文, 相信都一定自會有另一番體會.

年回報10%黎講, 以月份量化, 即代表每月複式增長0.8%左右, 而除左回報外, 預期今年儲蓄亦應該起碼能夠保持去年水平 - 即保持全年投入資金$41,600, 平均每月約$3,500. 有呢兩個數字之後, 就可以嘗試下做個模型出黎:

個表應該唔係太難明, 簡單解釋下, 以1月為例, 起始BALANCE係$123,828.46 (即12月月結個數). 月回報0.8%, 即月尾有$124,819.09, 加上新增資金$3,500, 月尾可帶落2月既數就會係($124,819.09+$3,500) = $128,319.09. 其餘月份如此類推.

而表中最尾兩行數字就係平時我用黎計算回報率既單位面值 - 以此月均回報率運作至年底, 全年回報率就會係 (76.30-69.34)/69.34 = 10.04%, 而10%亦正正係目標所在.

再以一個更數字化既角度去理解, 若然以此模型計算, 明年今日投資組合總值就會係18萬左右, 減去新增資金 $42,000同年頭起始結餘 $123,828, 即實際賺取金額就會係 ($180,151 - $42,000 - $123,828) = $14,323.

而如果以去年CALENDAR YEAR計算, 單計股息收入其實都已經有 $6,535. 即表示若然今年有幸保持此股息收入水平不變, 則所追求既都只係 ($14,323-$6,535)/$123,828 = 6.3%左右既股價增長, 就能夠令整個組合年回報達到10%, 又似乎唔係太難喎?

數就係咁計, 目標就係咁訂, 而究竟最終成件事係車大炮定狂想成真, 就要留待時間驗證, 答案, 一年後開估.

0099.HK 王氏國際 PARTIPRAL 派得好

http://partipral-hk.blogspot.com/2012/01/0099hk.html

王氏國際又係另一隻家族式經營既小型工業股, 從事開發, 製造包括微型電腦, 傳訊設備, 寬頻通訊產品, 互聯網應用器材, 無線通訊或網絡設備及其他電子產品.

睇返過去4年業績, 王氏平均每年營業額約3.25億, 但普遍純利率竟然只係低得可憐既2%, 一般工業股既最大開支都係不在乎用諸原材料同僱員之上, 而呢兩項成本過去數年一直佔去王氏營業額達9成以上, 不問而知, 王氏既產品響市場上所面對既競爭係相當激烈.

純利率低既公司並非全無可取之處, 要知道再重既成本負擔, 都總有一部份係固定成本, 唔會完全跟隨營業額升跌. 若果話09年之前既王氏係處於賺蝕臨界點; 咁10年既王氏就肯定係處於爆發點之上. 嘯後拗腰, 破歷史紀錄年做39億生意, 僱員成本拉低2%; 其他經營支出減少0.7%, 中間既1億差額已經能夠令純利大幅飆升. 雖然10年賺大錢, 但仍有一個比較大問題係應收賬激增, 導致年出現淨現金流出, 最後唯有靠短債週轉, 財政方面比較緊拙.

相對10年既谷底反彈, 王氏11年上半年表現其實有稍為回落之感, 營業額同比雖然上升1成以上, 但面對僱員成本上升, 扣除其他收益後實際盈利其實同比倒退兩成以上. 展望下半年, 經營環境應該唔會比上半年好, 尤其係考慮到2011年4月打後深圳最低工資由1,100再調升至1,320 (今年2月開始又會再加多1成以上), 相信對設廠於當地既王氏會有負面影響. 再計及原材料上漲, 環球經濟收縮等因素, 現階段投資王氏, 似乎無乜機會達到10年果種突破打和點後盈利爆升既效果.

純論本業, 王氏暫時無乜吸引既地方, 但若然翻查早幾年既公司相關新聞, 則會發現原來有單交易幾值得留意. 根據08年10月一則聯交所通告, 王氏國際宣佈會同新鴻基(16)聯合發展位於觀塘既兩個地盤, 而其中一個前身正正係王氏工業中心. 根據09年年報資料, 兩個毗連地盤將會發展成商用寫字樓物業, 總建築面積達76萬平方呎. 透過整套交易, 王氏08年已率先可以套現超過2億現金, 加上仍然擁有整個發展項目既35.7%權益, 待建成後估計王氏會將剩下全數權益出售, 相信屆時獲利更鉅.

有別於其他工業股, 對待王氏國際, 我會比較傾向投機心態. 第一期既地基工作相信於去年底前已經完成, 而第二期工程待最遲今年初補地價落實後亦會開始動工, 理論上整個工程會於兩至三年內分別完竣.個人估計王氏黎緊3月份公佈既業績核心盈利同比將會錄得一定倒退, 屆時或許有機會繼續拖累股價尋底. 若然有足夠耐性等待一項為期約兩年既投機項目收成, 戰略上黎講, 相信今年係最佳時機分段收集王氏.

王氏另一特點係街貨奇少, 實際流通量只係得1億股唔夠, 佔總發行股數只係20%左右. 大股東家族持貨量偏高, 若然最終能夠錄得龐大特殊收益, 派特別息機會亦大大提高. 以現價$1.35計算, 假設買入後以每股NAV $2.69為分段獲利目標, 範圍+/-20%, 最低為$2.15, 對比現價上望只係得6成左右其實未算特別值搏. 當然, 基本注仍然值得先下, 但稍加耐性等幾個月後約$1左右水平再加注相信效果會更理想. 始終最大支股價催化劑最快都可能要等到2013年3月份公佈既業績, 所以暫時行動上可以唔駛過份心急.

0912.HK 信佳國際 PARTIPRAL 派得好

http://partipral-hk.blogspot.com/2012/02/0912hk.html

其實想研究信佳國際(912)好耐, 原因係自己作為一個本金有限, 而又刻意選擇聚焦於小型股作出擊目標既老散, 以信佳近年進步之大, 實在很難逃過放入重點觀察名單之列. 反正仲有幾個月先公佈2011/2012全年業績, 係時候趁機會探討一下呢隻市值得5億左右既小型工業股, 睇下究竟有多大既投資價值.

曾經寫亞倫既時候都提過, 信佳國際係比較罕有既工業股能夠於近5年內將營收翻近一翻: 07年全年做7億生意, 而到今年單係頭6個月既生意已經達到此數既9成. 信佳主要, 甚至可以稱得上為唯一既業務係電子產品銷售. 而所謂既電子產品銷售, 當中其實包括左好幾項不同種類既產品, 計有專業音響設備, 互動教學產品, 自動收費系統, 寵物培訓器材等等. 而5年前信佳原來講緊只係以寵物培訓品材作為主要收入來源, 後來同時分身發展幾項頗為風馬牛不相及既品種, 竟然成為推動集團錄得大躍進既主因, 相對於其他小型工廠專心專注做一款產品, 似乎信佳更樂於專注擴闊業務領域.

早年信佳既業務係好難賺錢, 純利率不足3%, 顯示主業吃力不討好. 真正突破爆發點, 反而要數到09年, 自動收費系統, 專業音響設備及互動教學產品各自錄得大幅增長, 本來屬風高浪急既危險時期, 反而為信佳帶來盈利倍增. 專業音響設備業務持續擴張亦為信佳贏得新客戶, 帶動10業績再倍增創新高, 兩年間脫胎換骨既表現, 足以令人對信佳既管理層刮目相看. 09, 10年純利飆升, 營業額上升固然係重大因素, 但與此同時, 信佳成本控制能力亦功不可沒. 員工成本同其他開支增幅比營業額慢得多, 當中差額足以影響5成純利. 另外值得注意既係信佳業務運作似乎唔需要過多既員工, 自動化佔整體生產過程頗大比重.

損益表顯示信佳07-10四年間共賺1.92億, 當中1億左右用作股息分派; 5千幾萬用作投資廠房; 4千幾萬變左存貨, 但響總債項只增加約1千6百萬既情況下, 手頭現金反而仲可以多左近1億, 假設數字係真確既話, 信佳呢幾年實際賺既錢可能比損益表所顯示既更多. 雖然一直屬負債經營, 不過比重不高, 近年淨現金水平亦不斷提升, 加上派息連年遞增, 實在沒太大值得可疑之處.

普遍小型工業股11年上半年都係做得相當差, 主要原因係原材料急升同勞動成本增加, 但兩者對信佳反而影響不大, 能於上半年繼續錄得增長, 實屬異數. 信佳現價$1.92, P/E約5.5倍, 息率近8厘, 以小型工業股而言估值算平, 市值太細可能係風險所在, 但基數少將來盈利彈升效果反而可以相當明顯. 就整體基本條件黎講, 信佳實在無太大可挑剔之處, 畢竟近年進步太大, 基於估值不貴既前提下, 仍然值得搏將來繼續會更進一步.

0573.HK 稻香控股 PARTIPRAL 派得好

http://partipral-hk.blogspot.com/2012/02/0573hk.html

稻香07年年中上市, 以$3.18掛牌集資約4億元. 無深究過招股書資料, 但既然已上市至今已超過4年半, 單用上市後報表作研究相信應該足夠.

營業額由07到10年4年之間增長4成至年做超過29億生意, 即平均每年複式增長不足1成. 香港分部一直係集團主要收入來源, 雖然比重已由上市前佔總收入99%大幅下降, 但至10年底為止仍佔比重超過8成. 本地食肆數目每年皆有增加, 但店均營業額, 溢利皆已有向下勢頭. 面對既阻力有來自食材價格上升, 有來自最低工資, 有來自翻新舊店及開置新店既裝修 (折舊) 支出, 同快餐店比較唔同既地方係酒樓菜式廣泛, 加上早午市純利率應該會比晚市低, 經營上會難度會較高. 加上本地市場早已飽和, 管理層雖然好努力去提升經營效益, 當中包括成立物流中心以降低採購成本, 但如果撇除併購因素, 本地市場將來可以發展既空間實在唔多, 不宜過份寄望. 

形成好大對比既會係內地分部, 溢利近年三級跳, 睇到呢個數字唔知點解令我想起CAFE DE CAROL主席講話香港品牌對大陸人黎講可以係一種LIFE STYLE. 香港人有時會好難明白既係何解一個我地自己都唔太睇得上眼既品牌, 大陸人可以有完全唔同睇法. 需知道某部份內地人既文化除左隨地便溺而面不改容之外, 就係對自家品牌信心不足, 尤其係關乎到飲飲食食, 一關之隔, 打正香港製造旗號反而能令內地人趨之若鶩, 所以諗深一層, 稻香向北發展反而愈做愈強其實不無道理. 內地分部店均營業額近年呈現倒退, 但店均溢利反而飆升超過1倍, 溢利率增加代表經營效率提升, 雖然基數較細, 但要留意既係稻香於內地既食肆數目講緊只係得14家, 對比本地業務, 想像空間相對地大得多. 

成本方面稻香算係控制得唔錯, 純利率除左07年因為特殊收益關係特高之外, 其餘年度皆保持相若水平. 現金流頗強, 只係大量折舊費用可能係確實既裝修開支, 所以盈利會少一大截. 目前手頭淨現金3.3億, 財政尚算穩健但若然今年要加快開店速度, 很大機會要增大銀貸. 派息率方面雖然一直都維持到平均每年6成左右, 但11年上半年多賺2成派息都只係持平, 將來派息率有機會降至5成, 即回覆上市前所承諾既派息率. 

稻香立心進軍內地並唔係呢一兩年既事, 只係早幾年一直未敢/未肯全力進攻. 上市後連續 3年都無大肆開店, 係等到10年半年報告先肯講由11年開始會以一年增加4,5間既速度加快開店步伐, 並期望今年年底將內地分店增至25家. 滿腔鴻圖大業可能過份流於空談, 始終將來既事大家都係靠估, 但當表面條件充分既時候就值得多加留意, 等待管理層逐步引證擴展理念. 

稻香今年股價走勢甚勁, 踏入2012年短短6星期已急升超過3成, 基金早已進註, 現時再唱好或者有多少趨炎附勢. 客觀而言, 現價$4.15即市值約42億, 假設大陸盈利下半年環比再升 2成; 本地業務持平, 以全年賺2.4億計, 市盈率仍然達17.5倍. 派息率50%, 股息率可能得番3%. 市值對股東權益13億溢價3倍以上, 品牌做得好, 含金量高亦無可厚非, 只係就算單以盈利而言, 現價似乎都係偏貴多少. 就算真係相信稻香既中國夢, 實際經營上亦無可能一步登天. 稻香可能係另一家值得播種既公司, 持續, 分段進場, 策略上應該會較立刻一注獨贏可取.

個股觀察名單 [1] PARTIPRAL 派得好

http://partipral-hk.blogspot.com/2012/03/1.html

同往年一 樣, 三月份打算整理一下自己份WATCHLIST. 呢個世界從來沒有買入後就可以置之不理呢回事, 所謂 WATCHLIST 即是我自己長期會跟進既股份, 同舊年唔同既係今年製作此清單時所包括既公司最起碼都要係自己已經作過基本報表研究, 所以此清單亦可算係為自己寫過, 而又有興趣既股份作個簡單總結, 清楚列出持有原因及潛在風險, 方便日後萬一遇上特殊情況, 都能快速作出買賣決定:

1. 聯亞集團 (0458.HK)

現時股價: $4.90
現時市值: 13.2億
估值: P/E 7.4倍, 息率6.1%

目前持倉比重: 約40%

持有原因:
基於過往主力做成衣貿易, 盈利波動性較高, 導致估值長期偏低. 不過最近數期業績已一再證實內地零售業務已經開始萌牙. 雖然目前估值上較以前貴, 但因為盈利質素已大大改善, 不應同日而語, 現價極有可能仍被低估, 故此重倉買入, 一可搏公司獲得市場重估, 二可搏零售分部將來繼續做大.

潛在風險:
年報中對零售業務披露稍嫌不足, 連公司所代理既係咩品牌都唔易搵得到. 加上交投較疏落, 一旦業績大失市場所望, 持股數量過多的話或有機會出現難以逃生既情況.

賣出時機:
若然零售業務動力轉弱, 便要重新評估公司價值, 否則繼續持有, 不設目標價.

舊文: 業績簡評 - 聯亞集團 (0458.HK) - 08/2011 
舊文: 聯亞盈喜 
舊文: 聯亞十年
舊文: 業績簡評 - 聯亞集團 (0458.HK) - 03/2011




2. 大快活 (0052.HK)

現時股價: $12.00
現時市值: 15億
估值: P/E 13倍, 息率5.4%

目前持倉比重: 約30%

持有原因:
本地業務表現穩定而最近兩期業績已證明成本持續上漲問題非想像中難處理; 同時過往數年一直在播種既內地業務最近亦開始出現突破, 管理層同時亦有表示會繼續擴張內地食店網絡, 香港品牌對內地人亦算係一種保證, 成功率應該頗高. 業務穩定, 派息亦算豐厚, 稱得上可攻可守, 故此值得重倉持有, 搏將來內地業務出現重大突破.

潛在風險:
食物質素出現嚴重問題的話有機會將品牌摧毀.

賣出時機:
若然品牌出現危機, 便要重新評估公司價值, 否則繼續持有, 不設目標價. 由於帶多少防守性, 性質比現金稍好, 故此持倉比重可以視乎有否換馬目標而再作調整.


舊文: 業績簡評 - 大快活集團 (0052.HK) - 11/2011 
舊文: 業績簡評 - 大快活集團 (0052.HK) - 06/2011 
舊文: 大快活與最低工資




3. 永旺 (0984.HK)

現時股價: $19.80
現時市值: 51.5億
估值: P/E 15.5倍, 息率3.2%

目前持倉比重: 約13%

持有原因:
公司旗下品牌吉之島於香港發展得相當成功, 而過往盈利亦穩步上揚. 近期業績更顯示內地業務一扭早年弱勢, 持續向上突破. 由於以往曾經於內地市場迷失好一段時間, 往日既失敗正好為公司帶來重要經驗, 今日能夠重新上路, 深信未來繼續擴展比掉頭向下既機會高得多. 交到業績既話估值亦可望提升至與同業看齊, 亦算係推動股價向上既動力之一.

潛在風險: 
超過8成為實物股票, 街貨只得2成而且應該已被少數投資者牢扣, 不單買賣差價超闊, 交投亦非常疏落, 一旦業績大失市場所望, 持股數量過多的話或有機會出現難以逃生既情況.

賣出時機: 
內地業務能否繼續推進會係未來發展重大關鍵, 業績報告著眼點亦應在此, 如果增長動力放緩, 就要開始留神.


舊文: 業績簡評 - 永旺 (0984.HK) - 08/2011 
舊文: 0984.HK 永旺




4. 龍記 (0255.HK)

現時股價: $4.00
現時市值: 25.3億
估值: P/E 9倍, 息率6.6%

目前持倉比重: 約5%

持有原因: 
作為世界四大模架生產商之一, 行業地位不容置疑. 經歷過金融海嘯反而經營效率提升不少, 財政轉佳. 新廠今年下半年亦會開始投產, 估值不貴之下值得小注持有搏繼續做大.

潛在風險:
中小型工業股盈利一向會較為波動, 故此持倉水平不宜過高.

賣出時機:
由於業績可測性比想像中低, 估值便不能太進取. 歷史平均市盈率最高約11倍, 最低約最低5倍, 可以以此作為股價波動區間參考.


舊文: 業績簡評 - 龍記集團 (0255.HK) - 08/2011 
舊文: 業績簡評 - 龍記集團 (0255.HK) - 03/2011
舊文: 0255.HK 龍記集團




5. 王氏國際 (0099.HK)

現時股價: $1.54
現時市值: 7.3億
估值: P/E 5.3倍, 息率4%

目前持倉比重: 0%

看好原因: 
前身為王氏工業中心既工廈已經落實將會發展成總建築面積達76萬平方呎既商用寫字樓, 而王氏則擁有整個項目既35.7%權益. 發展項目將會於2013, 2014年分階段落成, 屆時所錄得之龐大特殊收益有機會以特別股息形式分派, 故此值得於年內收集. 以目前NAV $2.69作參考, 以$1-$1.3作買入範圍應該有足夠值搏率.

潛在風險:
若然最終不以特殊收益作特別股息分派, 股價炒上誘因應該大減, 屆時有可能出現悶足兩年而最後得個吉. 整個動作投機味道較濃, 故此注碼亦不應下得太大.