📖 ZKIZ Archives

靠賣日本零食起家的阿信屋（CEC國際，759），近日熱傳夥拍王維基搞網購，股價再被炒起。成立短短三年，分店已近二百間的阿信屋，即使連番遭百佳、惠康追擊，老闆林偉駿仍以攻為守，決定年底前再開十二間分店，繼續搶灘。

林偉駿如此自信，原來背後全靠有東京最大的零食供應商力撐。上週，本刊記者跟隨阿信屋港、日買手到日本，直擊採訪阿信屋在當地的零食供應商，發現真正扶起林偉駿的，竟然是一一年的日本「311大地震」。當年地震重挫經濟，林偉駿誤打誤撞摸上門，對日本零食商來說卻變成雪中送炭。過去三年，雙方建立起牢固關係，即使百佳、惠康等對手不停叩門，供應商都不為所動。對此，林偉駿感慨：「如果再從頭嚟過，冇咗311地震，阿信屋根本做唔掂！」

上週三下午，記者隨阿信屋兩名買手抵達東京成田機場，落機後即乘車到市內一間食品供應商的貨倉參觀。隨隊的林偉駿助手壹哥（張茗壹）表示，這間公司在東京有二十多個貨倉，是東京最大的食品供應商，講明要以現金找數及自行取貨。去到門口，老闆田先生（簡稱）已迎上來，他是家族第三代話事人，絲毫沒有架子，更主動幫記者及壹哥拿行李。田老闆帶著一行人參觀貨倉，不少貨品都熟口熟面，如各式Kit Kat朱古力及Riska粟米球，儼如走入放大版的阿信屋。壹哥解釋：「雖然我哋而家已經識到好多零食廠商，但都唔會直接去攞貨，因為當初都係佢哋（田先生）介紹，所以會繼續同佢哋入貨。做生意唔可以飛起人，同埋佢哋賺好少差價。」

供應商唔做超市生意

阿信屋沒有過橋抽板，田先生亦禮尚往來，他從衫袋拿出一張印有日本名的卡片交給壹哥看，說：「這個人前幾天找我入貨，後來我發現他是頂好（惠康的台灣公司）的人，便拒絕了。」身為商人竟然不想賺錢？田先生卻再三強調：「我只會和林先生做生意，因為我尊敬他。」阿信屋職員並不介意記者刊登田先生全名及公司名，但田先生卻以怕麻煩婉拒，他的助手解釋：「雖然行內人都知道我們和阿信屋的關係，但怕報導後會有更多人來找我們拿貨，會較煩。」之後四日行程，其中三日，田先生都親自帶隊，拜訪各大生產商，十分落力。林偉駿在香港接受訪問時坦言，他與田先生沒簽訂任何合約及協議，全憑互相信任：「日本人做生意係咁，如果簽約，佢哋反而會覺得你唔信佢，除咗惠康、百佳，一田都有搵佢哋攞貨，但都俾佢拒絕。」林指二人相識多年，最初是靠做線圈生意時認識的日立老前輩，輾轉介紹而結識，「地震前已經搵佢拎貨，地震後仲有多無少，咁先取得信任。咁講好衰，但如果冇地震，真係搞唔掂。」林偉駿透露，來自田先生公司的貨品，佔其日本貨來源約五成，另外兩個日本供應商則位於青森及秋田。

踩入魚市場米菓廠

行程第二日，一行人凌晨兩點便出發，先往東京著名的築地市場參觀，再往附近經營出口的大田市場。築地五大海鮮供應商之一的大都魚類株式會社，在大田市場擁獨家魚業經營權，其常務董事堅田照久坦言：「近年大田市場的出口一直下跌，為增加出口，我們覺得香港是很好的市場，很樂意和759合作。」他更即時向在場人員請教銷售策略，壹哥立刻推銷員上身，建議將大田市場寫入旅遊指南：「香港人淨係識築地，因為旅遊書淨係寫築地，你哋同阿信屋合作，我哋會喺貨品包裝貼上大田標誌。」壹哥指會向大都購入急凍水產及部分日本蔬果。下午，馬不停蹄來到埼玉縣、米餅品牌「鐵火燒」的廠房。該品牌的海膽燒餅，是阿信屋的熱賣產品。該廠現時每年銷售額約二十五億日圓（約二億港元），其社長譽田稔表示，當初田先生介紹阿信屋上門時，沒想過燒餅能在香港大賣，他透露：「本地市場漸漸下跌，我們除了想開拓香港市場，也想打入中國。」該廠生產約十五款米菓，但阿信屋只採購海老（蝦）及海膽口味，壹哥表示：「試賣過唔同口味，呢兩隻最好賣，其他口味唔啱香港人。」記者試食後，覺得海鮮味口感鬆化易入口，其他如燒醬味，質地偏硬，味道亦較單調。

專搵弱勢中小企

林偉駿為降低入貨成本，經常向買手強調，要找當地的中小企攞貨，因為中小企在本地市場競爭困難，最希望拓展海外市場。行程第三日，來到同樣位於埼玉縣的山芳Yomayoshi薯片廠。該廠每日能生產六萬包薯片，三年前開始向阿信屋供貨，總經理梶原仁誠指廠方很久之前已想打入香港市場：「九十年代起，日本薯片市場已不斷萎縮，我們有三十多款薯片，但不知道香港人喜歡什麼口味。」當記者及阿信屋買手，提及港人喜歡芥辣味、芝士味及披薩味薯片時，梶原仁誠大感驚訝，指日本人喜歡的是鹽味及麵豉湯口味。林偉駿解釋，日本這種中小企最樂意供貨給他，「佢哋唔識點做海外市場，咁多年嚟都冇試過出口，所以我特登搵佢哋攞貨，互相幫助嚇。呢啲細廠商，百佳邊會睇得上眼吖！」至於日本的大品牌，例如以熊仔餅聞名的樂天，在香港各大超市及零食店均有貨品出售，就要靠供應商田先生出馬。同日下午，來到樂天埼玉縣廠房，由廠長宇都宮勉接待。大品牌要求明顯嚴謹，廠房內不准拍照，雙方對話亦更客氣禮貌。林偉駿表示：「大廠一定要供貨俾田先生，咁我就可以透過佢攞貨，所以壓力比以前細好多。」林偉駿表示，田先生供貨時，不會要求搭上豬頭骨，「我哋揀貨，只會揀住宅區超市最好賣嘅貨，因為價錢、口味都較民生。唔好賣嘅貨我會叫停，好似最近佢哋有隻巴西造嘅糖，諗住食住世界盃熱潮，但我覺得批貨唔掂，應該唔會入。」

不怕被起飛腳

日本人做生意重信用，但其他國家就不同。曾在阿信屋熱賣的韓國「不倒翁」牌芝士麵，早年由林偉駿帶到香港，迅即爆紅，但後來「不倒翁」卻減少向759供貨，同時進駐百佳等大型超市。雖然如此，林偉駿仍堅持不會簽獨家代理權，「無得驚o架，要變心嘅擋住佢都冇用，人哋搵到好人家，唔可以勉強。」他拿著另一韓國牌子的芝士麵道：「我咪搵呢隻代替，都賣到咁多（數量），遲啲佢紅咗又話要走，我哋咪再搵囉。」入貨的高靈活度，正是阿信屋成功的主因。行程最後一站，來到日本上野的零食街，同街的數間零食店，擺設都不一樣。林偉駿解釋：「因為日本冇收上架費，百佳有收上架費，所以擺位限死咗。阿信屋就係抄足日本，要將最好賣嘅貨擺當眼位，我冇收上架費，想點擺就點擺。」759出現後，坊間近年愈來愈多零食店，大多同樣標榜產地來自日本，面對超市及其他競爭者的追擊。林偉駿坦言，要不斷開拓新業務及貨源：「以前一個月入一次新貨，而家變咗兩星期一次，好賣嘅先加單。」在當地好賣的，引入香港亦會捉蟲：「日本前菜最唔賣得，即係嗰啲魚仔、鹹菜仔、海帶。」

玩埋759雲吞麵

話口未完，林偉駿又有新搞作。「BB同老人家產品一直試緊，覺得可以抽出嚟，好似Kawaiiland（化妝品店）咁，試開一兩間先。」兩間店已在籌備中，分別位於九龍灣及馬鞍山。「未來呢幾個月會有四、五間，採購已經完成，主要入曬日本貨。」至於與王維基合作的網購，他就指正準備前期工作，「人哋一吹雞就做嘢。」不過，近來最出位的搞作，莫過於用公司名義在深水埗東京街開雲吞麵鋪。林偉駿指上週五才收鋪，樓面只有十多張枱，兩個月後開業，「觀塘公司對面有間茶餐廳，啲牛腩麵好鬼好食，我食咗廿幾年，舊年間鋪執笠，我即刻請咗佢個師傅，開始搵鋪。」他指店名亦叫759，記者指客人或會覺得騎呢，林偉駿即哈哈笑道：「雲吞麵最多一兩間唔會大搞，乜都試嚇吖嘛。」

759阿信屋撈過界開完平平化妝品店，上星期六又開埋雲吞麵鋪。聽聞九月仲會開茶餐廳，可能以後有759大酒家、759酒店和759主題樂園。759雲吞麵上星期四突擊試業，報章港聞一出，身邊所有零食王朋友都話好想試。我試食王當然唔想慢人一步，上星期六開張當日即刻幫襯。

步出長沙灣A3出口，已經見到759雲吞麵門口企滿人，與友人見狀馬上衝去攞籌。麵檔為街鋪，環顧四周也不見其他有冷氣的地方，叫號碼的店員把聲又溫柔，行遠些少也聽不到，唯有焗住在高溫下流汗呆等。等了四十五分鐘終於有位，從未試過為了一碗雲吞麵要等超過十分鐘。店仔好細，人少少預了要搭枱，都幾逼狹。餐牌選擇不多，主要是雲吞、牛雜和粉麵的配搭。三個人點了招牌雲吞麵、五香鮮牛雜麵、燜豬手和牛筋雙拼，還有巴基斯坦咖喱牛腩飯。雲吞算大粒，牛雜都多料到看不見麵底，仲有大量牛筋。咖喱牛腩飯無論咖喱汁、牛腩和白飯都大份，男生都竟然不能清碟。份量令人興奮，食落呢？雲吞麵湯底無大地魚濃烈鮮甜，對於食開正宗雲吞麵的人來說，太淡。全蛋麵可能比較香，但也較膩，而且我還是喜歡鹼水麵的彈牙。雲吞皮很薄，蝦肉夠彈牙，應該不是雪藏貨，但就是不夠鮮香。牛雜湯底也很清，如果喜歡清湯腩的，還可接受。如偏好濃味腩汁的，會失望。牛雜不夠入味，牛筋像擦字膠。一間粉麵檔，辣椒油很重要，不過店中的辣椒油不夠辣也不夠香，幫助不大。巴基斯坦咖喱牛腩最好食，咖喱味道複雜香口，還有些果香，唯一要挑剔，又是不夠辣。食物不是難食，而是淡味，吃得出製作花過心思，起碼雲吞是即叫即包，而且比起不少街坊店足料抵食，環境乾淨服務也不錯。如果自己屋企樓下有間，都會間唔中幫襯。

評分

食物：★★1/2服務：★★★環境：★★★抵食：★★★★

759雲吞麵

地址：長沙灣邨服務設施大樓地下1號鋪電話：3669 6936

試食王

喜歡外出用膳，也喜歡誠實，不相信飲食網站的所謂評分，也怕了所謂食家獲得優待後的意見，情願隱姓埋名，真金白銀，測試飲食雜誌飲食網頁捕捉不到的真實一面。

究竟CEC國際（759）在過去幾年，開咗咩鋪？阿信屋零食店、麵包店、車仔麵、凍肉、化妝品、茶餐廳、女裝、家電、床上用品……咁究竟老闆林偉駿仲想點？佢話：「嚟緊有便利店、點心鋪、鰻魚飯、西餐廳……同埋政府話推美食車，我都會整一架，裝飾得好靚嘅！」狂開分店，別人笑他太瘋癲，林偉駿今次訪問終於承認，是捱得好辛苦。「我睇到，阿信屋喺零食方面已到咗極限。如果唔喺其他零售層面發展，公司就會停低。所以新五年計劃，要繼續擴張，冇得停低。」翻開CEC國際的中期業績，半年賺一千七百多萬，平均每間分店每月只賺一萬二千八百元，低過請一個文員！開得多、賺得少，林偉駿已耗費精力、四年無放過一日假。這次由他娓娓道出、好可能愈行愈危險的759生意模式。

阿信屋在這四年來，不斷踩界賣非零食產品，最新是在大年初一開寢具屋，專賣床單被鋪，生意比想像好，令林偉駿深感興奮：「初一做咗七萬幾蚊生意，都幾得人驚！最好賣係印有英國國旗嘅被單。（冚國旗？）哈哈，又係喎。」不斷而來的新鮮感，是阿信屋給香港人的印象。由零食到化妝品店、家電、雲吞麵等等。林偉駿坦言做到一開即賺，但他發現生意及人流已走下坡，「齋賣零食嘅鋪，雖然仲有錢賺，但人流少咗好多！啲客鍾意行有凍肉賣嘅鋪頭，如果間鋪有埋電器同家品賣，生意會好好多。」他一年前已發現客源流失的問題，於是萌生開便利店、甚至百貨公司的諗法，希望挽回人流。

零食到極限

林偉駿坦承，賣零食已到極限：「阿信屋已去到極限。賣零食嘅零售市場已無乜空間，咁公司仲有咩動力去推動呢？惟有將零售層面擴大去做，否則間公司就會停低，好危險。」另一個林偉駿要狂開分店的誘因，是維持入貨量。阿信屋零售價較其他對手平，全因大量從日本直接入貨；但問題是，入貨量大，平均來貨價才能壓到最低。既然零食店已飽和，林偉駿索性將來貨用來開麵包店、粉麵店等等。一來散貨、維持入貨量；二來開在屋邨鋪，貨價租金有得計，一開有賺。不過此生意模式，卻帶來不少危機。其一，是耗盡了林偉駿精力。今年暑假，將是阿信屋成立五周年。這四年半以來，林偉駿無放過假，即使新年仍依舊上班：「每一日都要睇住盤數，要經常諗新嘢去變。」他用從前開工廠作比喻，公司發展就像工廠的產能一樣，要不斷增加：「例如一個大牌子今年賣一百萬元貨，你只能做到呢個數目。但如果人哋要增長，想賣二百萬貨，咁咪要搵其他廠去做，但品質未必做到兩間廠一樣，咁人哋為咗減低風險，咪可能將啲貨拎去一間大啲嘅廠做，唔俾你做啦。開零售店一樣，你分店少，接唔晒人哋啲貨，咁人哋咪拎去超市或其他鋪賣，咁你咪冇貨賣囉！」去年林偉駿得一位地產公司高層提點，暫停擴充分店，幸運地避過租金高峰期，最近本港零售增長下降，租金回落不少，阿信屋便再大舉擴充，目標是要開夠三百間分店，並將部分轉為便利店：「好多員工都喺其他超市過嚟做，佢哋睇中阿信屋係增長緊，如果停落嚟，士氣低唔使講，供應商都唔會俾面你。」

逼住面對現實

此路並不易行，一年前，林偉駿也說過阿信屋要走超市百貨路線，鋪頭要數千呎以上，但現實是，在寸金尺土的香港，要找到大型鋪位殊不容易。除了百佳、惠康、Aeon、city'super之外，有「阿媽」新鴻基地產「照住」的一田，亦是另一個崛起中的巨人。林偉駿坦言要開阿信屋超市好難，「我一直都搵緊鋪位，但大嘅已經俾百佳霸住，佢哋寧願交貴租都要霸住個位，啲業主又鍾意劏細鋪位收多啲租，我哋要搵位，都係搵華潤做唔起嗰啲屋邨鋪位咋。」林偉駿只好變陣，轉攻面積較細的便利店：「五百呎就開到。六成做熟食，賣豬皮魚蛋、點心同鰻魚飯，全部自家製作。全間鋪二百樣貨，全部重點產品，有三成係本地貨，同而家嘅阿信屋係有分別的。」目前面積較細的阿信屋街鋪，會變成便利店，他更指出早前開設的茶餐廳及麵包店等，都是為便利店鋪路：「我要學識點整熟食，原材料控制同運輸，要自己搞過盤生意先至會識。」不過便利店市場更似打仗，OK、7-11及華潤Vango，全港總共已有一千四百多家店，幾乎隔幾個鋪就有。上週六OK便利店特別舉行造勢大會，與日本熊本知事合作。利亞（831）行政總裁楊主彬向本刊說，不擔心阿信屋挑機：「我哋舊年開設日本零食專區後，生意額升咗兩成，今年會開多廿間OK分店。」據林偉駿所知，「七仔」上週一也舉行內部會議，迎戰阿信屋。

大超市留難

要擴張版圖，人工是另一隱憂。阿信屋人工成本不輕，為留人才，不惜較市價高一成底薪請店員，一般底薪約一萬二千元。另有營業額的銷售佣金，林偉駿說：「好多鋪都想入多啲熱賣產品，因為多佣金。銷情好嘅鋪，人工可以達萬六元。」除了租金，薪金成本亦佔了阿信屋收入一成四。另外，阿信屋曾因拒絕加價賣可樂，而遭太古等本地供應商封殺，但今次開便利店，卻要有三成貨品由本地供應，林偉駿要在價錢及貨源上與本地供應商角力，頭痛不已。「同維他奶傾，佢哋只肯供應大包裝375毫升飲品，細包裝嘅只喺超市賣，如百佳、惠康。因為大超市有佢哋嘅要求。大佬呀，女士們點飲咁大包喎！」貨源要妥協，售價亦要妥協，不能像阿信屋般賣平貨，他無奈指出：「供應商話啲嘢，唔可以平過七仔，咁我唯有標個價錢跟市價一樣。但我一樣會做九折，個客照俾全數後，折完嘅一成錢會係現金積分，留番嚟可去阿信屋零食店用。咁樣走灰色地帶，供應商可以向七仔交代。」林偉駿說不斷變通是逼出來的；表面風光，內裡陰乾，記者識了他幾年，他幾乎都是著同一件衫，因無時間買衫襯衫。日瞓四小時，樣子也很疲累，不過他說：「焗住要行，唔行公司就會死。但見咁多人跟我，我都有我嘅滿足感！」