其實我一直都好鍾意去759阿信屋買野，其實有時覺得佢地小食款式都多過而家個兩大超市，間中都賣得幾平，又近屋企樓下。不過最近一個半月都冇乜點買，到左父親節，阿信屋做返「689折」，我先至買返啲。
早兩個星期就去左阿信屋買野，發覺產品組合又變左啲。如果你一直幫襯開阿信屋既話，你會發覺而家日本來貨既比例細左好多，取而代之就係臺灣貨同歐洲貨。大家喺臺灣睇到既臺啤，或者有排網上好hit既花雕酸菜牛肉杯麵或花雕雞麵，阿信屋都入左唔少貨。相比臺灣賣緊價錢，杯麵喺香港呢邊其實溢價唔少，即使做折，通常都只係會做8折或9折，先同臺灣賣緊既原價差唔多。但啤酒（水果啤）黎講，就平過臺灣20%左右。入臺灣貨，其實最重要係匯率差唔多，未必有好大既升跌幅。雖然一年內港幣對新臺幣由1:3.8跌到1:4.2左右，但相比日圓既波動程度，當然係好濕碎啦。
睇返阿信屋母公司CEC國際控股業績，營業額升10%，但除稅前溢利就跌成半。咁跌法，當然同租金上升同經營成本上升有關，經營成本最主要就來自匯率問題。做零售呢行，最怕就係買開既貨愈來愈貴，一來冇得加價，二來如果換走左啲貨，熟客就未必會再幫襯啦。上星期出盈警話上年度全年虧損，單係投資物業公平價值就蝕約973.2萬（即係舊年九成盈利）。加埋日圓匯率係咁升，毛利率持續探低，2015/16年度個半年業績毛利率得返0.64%，毛利率彈唔起，759想升都難。
不過咁，而家旺區舖頭租金開始減，再加埋貨品組合重組緊，759應該差極有個譜。759喺2013年12月新高做過$4.99，而家跌到得返9毫，插足八成，返到2013年2月水平。出埋業績，最多都只會再跌返去2012年尾，大概5毫、6毫水平。相近類型既零食物語（母公司四州控股），上個月都預告左業績會跌60%-70%，但股價都升到10%，由2014年1月高位5.84都只係跌左四成，CEC明顯跌得太盡。最近睇返阿信屋因為打折頭，門市見返人龍，我覺得759出埋業績後，應該可以睇下長線，博毛利率反彈。
文若