智取大市：L型市搵食攻略
1 :
GS(14)@2016-05-21 13:09:16事到如今，「L型」經濟已不是最壞，但「L型」股市，就比較難搵食，想炒吓波幅都難。「L型」經濟下，中國將現持續低增長甚至衰退（非以GDP數據作準），但恒指喺20118點、H指喺8425點，市賬率分別係1.04倍及0.81倍，同近年日經平均指數市賬率低位0.9倍相當接近，如果喺經濟長期衰退而冇金融系統崩潰嘅劇本，呢個估值已屬合理或偏低，從現價去造淡，係去賭中國短期內爆煲，暫不值博。未來一年半載港股難大升，但每逢驚爆煲大跌就可入市。揀股要揀經濟衰退下仍有國際競爭力嘅股票，佢哋唔需要睇住中國經濟面色，其中拍住華為做生意嘅孖寶舜宇（2382）同通達（698）不欲多重覆，但只要股市略回穩，就有條件破頂，皆因僧多粥少，好股供應有限，但有大把港股基金為交數而追捧，需求一直存在；其次係擁有持續龐大正現金流但估值低迷嘅非金融股份，呢類股份可屹立於經濟低迷環境，但持有等回報要有耐性。短線可從上周五沽空比例較高嘅股份入手。要迴避嘅係內銀，新增貸款縮水，仲可能逐步硬食國企壞賬，長遠死唔去，但未衰夠。晉佳
http://www.facebook.com/advanceguy1
來源:
http://hk.apple.nextmedia.com/financeestate/art/20160518/19616474
智取大市：騰訊最後一口牛氣
1 :
GS(14)@2016-05-24 10:22:46如果有留意高登討論區，會發現巴打絲打們開得最多post討論嘅股票，就係騰訊（700）。騰訊升咗十幾年，近期終於成為民間股王，開始連散戶都落場買。噚日港股主板成交437.57億元，創今年新低，如果單計正股，成交289.66億元，剩係一隻騰訊，成交有19.56億元，即係每100蚊成交買港股，就有6.75元係買騰訊，相當誇張。越嚟越多人買騰訊、講騰訊，相反理論之下物極必反，係咪代表騰訊步滙控（005）同內銀股後塵，就快玩完？港股成交縮到今年低位，港股亦由急跌變成慢跌，但騰訊始終位處接近歷史高位水平，股價更加連日跑贏大市，話佢要由極受歡迎股份突然變成不受歡迎股份，業績增長對辦之下，似乎搵唔到有說服力嘅理由。如果話資金由高估值騰訊流至低估值中資股，同樣說不過去，皆因一般大型國企股嘅基本因素難見曙光，想吸走買騰訊嘅資金實在有難度。騰訊股價喺慢跌市之中保持強勢，較大機會係等一個升市來臨，令股價升得更瘋狂，之後就人人講騰訊、人人買騰訊，消耗盡所有購買力，然後散水，長遠將變成下一隻滙控、下一隻建行（939），呢一刻，應該睇到多一浸升勢。晉佳
http://www.facebook.com/advanceguy1
來源:
http://hk.apple.nextmedia.com/financeestate/art/20160524/19624478
智取大市：中航信增長冇難度
1 :
GS(14)@2016-05-24 10:41:15飛機租賃行業膨脹令航空公司越嚟越輕資產，降低行業門檻，令機票價格競爭加劇，明顯令全世界機票多咗，但每張機票嘅利錢少咗。中航信（696）成最大贏家之一，因佢作為內地航空公司嘅資訊供應商，收入同旅客數目掛鈎，而佢主要股東係南航（1055）、東航（670）、中航等，同時客仔亦係呢班股東，自己人，生意更易話為，中國模式你懂的，令中航信長做長有，收費穩定，唔怕畀競爭對手Amadeus同Abacus威脅。中航信主要係為旅行社、航空公司及機票分銷商提供航班、座位等數據，去年5個最大客戶嘅總銷售額佔中航信收入45%。中國飛機租賃行業早年落後於歐美，近年喺中國開始大行其道，內地航空公司近年少買飛機，改租飛機，加上國務院近期講到2020年前建成500座機場，兩個因素勢令內地航空旅客量膨脹，效應可以持續幾年，中航信盈利增長可測性相當高，觀乎去年純利增長15.8%，未來幾年以相若，甚至更高幅度增長應冇難度。
Amadeus歷史PE24倍，但中航信內地比重高，形勢更有利，PE反而仲低，得19倍，所以中航信股價持續跑贏前者，圖又靚現價已可買。晉佳
http://www.facebook.com/advanceguy1
來源:
http://hk.apple.nextmedia.com/financeestate/art/20160523/19623228
捱打消耗對手 智取科曼最經典
1 :
GS(14)@2016-06-06 03:17:28「牙擦拳王」阿里愛說自己「最偉大」，不是空口說白話，年輕時憑天賦取勝不出奇，但最鋒利的刀都有生鏽的一日，阿里仍能憑戰術部署力克強敵，才難能可貴。他職業生涯61場拳賽中的56勝，亦以贏科曼（George Foreman）最經典（圖）。阿里1964年以22歲之齡挑戰當時的重量級拳王利斯頓（Sonny Liston），外界原不看好，但阿里以「步如蝶舞，拳如蜂螫」靈活步法和快拳佔盡上風，擊倒對手首當拳王。阿里因拒服兵役禁賽後，1971年在「世紀之戰」挑戰當時拳王傅理沙（Joe Frazier）以點數飲恨，之後兩勝對方雪恥，但傅理沙的金腰帶早被科曼奪去。
阿里1974年在扎伊爾（現剛果民主共和國）的「森林大戰」已32歲，面對比他年輕七年、當時40戰全勝的科曼。阿里出拳力量不及對方，賽前經過嚴格肌肉訓練，在第二回合起退到繩邊，故意只守不攻雙手護頭捱打，讓對手在非洲酷熱中消耗體力，待科曼筋疲力盡反撲，終在第八回合擊倒對手，再次當拳王。到了1978年，阿里在拳王戰輕敵輸了給當時只是第八次打職業賽的史賓斯（Leon Spinks），七個月後阿里認真操練和部署後復仇成功，第三次當拳王。法新社/路透社
來源:
http://hk.apple.nextmedia.com/international/art/20160605/19641992
智取大市：政治進一步搞上你
1 :
GS(14)@2016-08-07 01:09:16今屆立法會選舉報名，龍門任擺，係香港一個重大嘅轉捩點。雖然2014年佔領運動代表部份市民公然挑戰法律。不過，佔領嘅人當時絕對認同自己行為唔合法，只不過冒住違法代價去做一樣佢哋認為道德上啱嘅事。就等於屋企人患急病，然後打劫搵醫藥費為家人醫病。如果去到一個點，立法過程太不合理，又如何？跟住會觸發部份市民不信任、不接受立法制度，以後對於新設立嘅法例、甚至既有法例視而不見，性質同上述佔領運動大為不同。所謂打壓港獨，其實係助長港獨去另一個山頭建立勢力，然後梁振英政府會點做，大家請想像。以上，可以話只係開場白。想講嘅係，本地概念股從此投資價值打個折扣，至少要承受更深層次嘅負面政治因素，正如小弟之前所講，本地地產股只宜短炒，不宜長揸。因為，你唔會知道政治喺邊一刻，去到你屋企門口找上你。晉佳
http://fb.com/advanceguy1
來源:
http://hk.apple.nextmedia.com/financeestate/art/20160804/19721611
智取大市：拋精靈球式入市
1 :
GS(14)@2016-08-09 07:31:13以星期一雞犬皆升嘅程度，短線即抽即獎，命中率分分鐘高過拋精靈球，其中，龍尾手機設備股同貴金屬股都有資金追捧。大市越接近倒數，就越雞犬皆升引你買，但短線命中率偏高嘅情況下，都可以分散注碼出擊。逢親啱concept、股價剛起動兼成交增加，配合圖表出現突破都可以考慮一博。策略上，買一隻，lead得住就可以追下一隻，重點是，能炒不能hold，跳車同樣要快。手機設備股龍頭龍尾都升晒，資金湧向貴金屬、水泥股，龍頭股的話，安徽海螺（914）啱啱升破保歷加通道中軸，新一輪爆邊，睇怕繼續去。龍尾貴金屬股，中信大錳（1091）走勢好轉，呢啲更加係終極落後股，爆起上嚟升一兩成。股份基本因素？炒得咁短就唔講咁多住，最緊要記住，呢兩日買嘢的話，能短炒但不能Hold。晉佳
http://fb.com/advanceguy1
來源:
http://hk.apple.nextmedia.com/financeestate/art/20160809/19728204
智取大市：誠哥沽樓有啟示
1 :
GS(14)@2016-08-16 04:53:32李澤鉅講到明，除咗長江中心之外，乜嘢物業都可以賣，呢個訊息，最直接可以演繹為誠哥睇淡物業市場。當然，樓價貴，咪係睇淡物業市場嘅理由囉！使鬼李嘉誠講。但諗深一層，誠哥貴為全香港做生意最叻嘅超人，做生意、投資，必然賺到有咁盡得咁盡，假如閣下相信誠哥係下下有能力賺到盡嘅超人，佢亦有可能叻到察覺物業市場見頂，仲要未來十萬火急，要清貨離場。信誠哥的話，樓價一年內見頂唔奇。首先睇番樓市大升浪嘅由來，先係2003年樓價過殘，同時剛需支持，配合低息，及後有埋量寬，令借貸者太易獲取資金，同時經濟放緩令資金苦無出路，因此磚頭連續十幾年獲得追捧。要扭轉資金氾濫局面，首先係物價開始失控。美國通脹壓力開始降臨，可見將來會加息，告別低息時代，投資者意識到物業價格過高，最後有機會從物業市場套現，炒商品追落後，就有條件引發新一輪通脹，到時可能會走上唔放水就出現金融危機、放水會惡性通脹嘅局面，二者取其一，樓價都有機會爆煲。上述劇本嘅其中一個枝節，就係商品價格追落後，呢個就係小弟中短期睇好商品股嘅原因。晉佳
http://www.facebook.com/advanceguy1本欄逢周一、三、五刊出
來源:
http://hk.apple.nextmedia.com/financeestate/art/20160815/19736096
智取大市：見頂徵兆出晒嚟
1 :
GS(14)@2016-08-16 06:24:30港股單日成交升到900億，反映多咗新資金入場接貨，係第一個見頂徵兆；升市之中，有之前強勢嘅本地地產股下跌，手機設備股當中仲要有信利（732）洗倉，強股率先腳軟，為第二個見頂徵兆。喺英國脫歐公投後呢個半月，恒指升超過3,000點，累積升幅已多，睇唔出有中短線繼續睇好嘅理由。「深港通」概念股國泰君安（1788）、耀才（1428）、英皇證券（717）等等升咗唔少，可考慮減持獲利。目前係業績期高峯，睇淡大市但暫時冇話會死人冧樓，所以總有好股因業績理想而上升，投資者要開始保持輕身嘅同時，仍有空間去持有績優股。舜宇（2382）今年上半年純利按年增長五成，每股盈利43.21分，就當全年每股盈利可以有1.2港元，市盈率都要成28倍，硬件股嚟講堅係貴。同樣啱啱公佈業績嘅通達（698），半年純利增長29.2%，每股盈利6.63仙，就當下半年度純利按半年持平，市盈率只係12.8倍，估值實在平得多，難怪星期一股價擺脫同業股份弱勢而升1.8%，唔覺唔覺破頂，同時通達亦有華為概念，係優質手機設備股，前景唔差，呢一刻揀通達仲好。晉佳
http://fb.com/advanceguy1
來源:
http://hk.apple.nextmedia.com/financeestate/art/20160816/19737484
智取大市：2016炒股最強神術
1 :
GS(14)@2016-08-18 06:01:13深港通一出，概念股就見光死。事前大家明知深港通對於證券股冇乜幫助，點解仲會炒得起？然後消息一出，再由高位撻番落嚟？要解釋一切看似多餘嘅市場動作，用投資心理學去研究，比基本因素更實際。炒股票要贏錢，就係要搵下一個接火捧嘅人。今次深港通，就等如一鋪牌有三家打開口牌，而呢三家又知道遲早有第四家衝入嚟做儍仔，唔坐定貨等儍仔入嚟就笨，所以消息公佈前，春江鴨為數眾多，有足夠購買力谷得起證券股連升幾日，但去到星期二收市一刻，深港通獲國務院通過，喺星期二先衝入去嘅人，只要稍為聰明，都猛然發覺自己成為尾二、甚至最尾接火捧嗰個儍仔，醒少少都會喺星期三一開市就掟，唔輸算偷笑；而之前幾日買落lead住而未沽貨嘅朋友，又同時鬥快食糊，於是累積咗龐大嘅沽盤，令股價跌得咁狠。以國泰君安（1788）為例，喺深港通消息翌日，股價可以單日跌接近一成。踏入2016年，投資心理學比起基本因素分析更重要，原因係恒指市盈率游走於10倍至12倍之間，只不過係非常平同普通平嘅分別，又有乜嘢理由好需要解釋？分別就係低位悲觀啲，高位樂觀啲，同基本因素可以完全無關。喺基本因素「冇所謂」之下，投資心理學更能成為眼前最利害嘅炒股神術。晉佳
http://fb.com/advanceguy1
來源:
http://hk.apple.nextmedia.com/financeestate/art/20160818/19740264
智取大市：越冇把握越贏錢
1 :
GS(14)@2016-09-06 04:39:39升市短炒贏錢嘅條件，可以好簡單，只要喺你入市之後，仲有人以更高價入市，你已經有潛在贏錢空間。不過，世事往往好矛盾，當你入市前左諗右諗，驚死接火棒時，之後通常仲有得升。當中道理並唔複雜，如果你半信半疑，天下間肯定有好多人同你一樣，對於股市半信半疑，所以購買力未消耗得盡。但升到某一刻，當你信心滿滿咁去買之時，全世界同時都會好多人同你有相若諗法，大家一齊信心滿滿，消耗所有買股票嘅錢，冇人有餘錢接貨，就去到升市盡頭。同長線投資比較，短炒的確係一門着重心理分析嘅學問。短炒高手，呢一刻唔少都睇淡長遠股市前景，但只要準確估到自己唔係接火棒的一員，都唔會放過機會，衝咗先算。有時，喺冇乜把握入市嘅情況下會贏錢，反而喺好有把握嘅情況下入市，就會輸錢，股市就是這樣。耀才（1428）曾經因為「深港通」憧憬而爆上，然後股價回落後又傳賣盤，再炒上又再回落。呢一刻冇事冇幹，又靜雞雞升番去接近兩段傳聞期間嘅高位，形成上升三角形，股價零零舍舍跑贏港交所（388）、國泰君安（1788），似有啲計，預計短時間內開turbo。晉佳
http://www.fb.com/advanceguy1本欄逢周一、三、五刊出
來源:
http://hk.apple.nextmedia.com/financeestate/art/20160905/19759958
Next Page