辦公室的討厭事 人在中環
http://manincentral.blogspot.hk/2014/03/blog-post.html最近有個女性朋友同我講，話返工返得好唔開心。我問佢發生咩事，佢話新嚟咗個咸濕上司，成日借頭借路對佢毛手毛腳。
OK，我其實真係唔多理解得到，呢個世界點解會有咁多咁乞人憎既咸濕上司的。返工真係好得閒咩？抽到女同事些少水真係好爽咩？你睇中個女同事你咪光明正大溝佢返嚟囉！乜得要搞到鬼鬼鼠鼠借頭借路去揩人油，真係過癮啲咩？
朋友既故事，大概係典型既性騷擾辦公室個案吧。騷擾你果位，係個高級過你既上司。女同事敢怒不敢言。受害既女同事唔肯出嚟指正，犯案既男同事繼續得寸進尺，直到有一天，男同事大膽到唔需要再借頭借路打擦邊球抽你水，直頭明目張膽一野揸落心口，女同事才終於發爛反抗，然後事件驚動老闆。這種事情，老闆會做啲乜呢？捉晒兩個當事人入房，對質一番。由於老闆根本冇目睹事情發生，於是永遠係女有女鬧，男有男辯駁，永遠唔會得到結論。老闆在完全唔知情既情況底下，只可以用「只係一場誤會」之類既方法打完場，然後男女雙方繼續工作，不過往後既日子，每日都面阻阻，每日返工就尤如見到仇人一樣，辦公室既氣氛從此變得詭異無比。
這些事情，我也遇過。處理這些事情，問心，很困難的。作為老闆，當有女同事被咸濕男同事抽水，在當事人未有向你親自舉報之前，你基本上甚麼也不能做，儘管我總會隱隱feel到多少性騷擾的氣味在漫延。難聽一點說，你總不能代女同事回答，到底佢係自願被人抽水還是無奈屈服於咸濕男同事的淫威之下。我也層經遇過一個case，女同事被男同事抽水，心中很不憤，於是跟相熟的同事講了這件事。那個相熟的同事認為「事關重大」，於是私下跟我「報案」。我聽完，於是拿拿臨搵果位受害同事，問佢有冇嘢可以幫忙，例如陪佢去報警，又或者以老闆既身份，警告一下果位男同事。結果，同事又係要求我千祈「唔好搞大件事」。報警，當然係搞大咗件事，女同事堅決唔肯。警告佢？咁佢咪知道係我篤佢出嚟？以後返工仲要日見夜見，所以女同事又佢絕了。
「咁炒咗佢好唔好？」我問。
「炒佢…好丫。不過可唔可以唔好話係因為我呀？」女同事問。
我明白女同事既擔心，但當我聽到佢呢句說話既時候，我還是當堂暈了一暈。
炒一個同事，as long as補足錢，基本上有權乜都唔解釋的。如果一個同事長期令到辦公室裡面既一班女同事感到困擾既話，呢條友我無論如何還是要炒的。
受害女同事要求我絕對唔可以向咸濕男同事揭露佢被炒既真實原因，以免令佢跟人結怨。我答應了。於是我老作了一個似是而非既理由，將男同事辭退了。然而我其實幾肯定，咸濕男同事都唔係傻的，佢心裡明白，佢平日既工作，冇乜咩犯錯的。失驚無神被炒，理由只有一個，就係平日既咸濕行為被揭發了。
鬼鼠而咸濕既男人，都有一個共通點，就係小器同報復心重。當日我用咗一個老作既理由辭退佢，老實講，邊會呃到佢？離職之後，幾位被佢抽過水既女同事，還是被佢零零星星地電話騷擾。幾十歲人，仲搞啲咁既嘢，實在係好低能。但女同事以為，「唔揭露真相」就可以「唔洗結怨」，唉，也是太天真了。
男人咸濕，冇罪的。但世上有許多發洩方法，總犯不著要到你工作既地方搞亂檔灘。面對這種事情，受害既同事感到困擾同擔心，我也真心理解，然而同事們期望老闆能為這些事「主持公道」，但我地處理呢類事情既時候，一方面要妥善解決事情，另一方面又要保密，仲要顧及同事唔好「被結怨」或「被針對」，一次過要滿足晒幾個願望，問心，其實我堅係好頭痕的。
祝大家有個愉快嘅週末。