| ||||||
由CEC控股（759）持有的759阿信屋，開到成行成市，不單零食、電器、化妝品，而家仲開埋急凍食品超市，而且價格保證全行最抵，又豈不令到顧客拍曬手掌而同行眼紅乎? 最近阿信屋老闆林偉駿就同小宗講，零食戰已轉趨激烈；佢最近收到匿名電郵，內容原來係百佳內部傳閱嘅機密文件。（由此相信，百佳係有內鬼嘅！）從文件中可以睇到，百佳用盡人力物力，搵咗好多阿信屋每日嘅銷貨數據、熱賣貨品及船期等資料，即係誠哥最愛嘅「big data」呢，想從中搵方法打低阿信屋。林偉駿見到資料咁豐富，眼都凸埋 ，話咁快改變策略：「既然佢哋咁神通廣大，我哋索性dup嗰app出來，將熱銷貨品、新抵港貨品等數據攤曬出來，公開埋俾顧客睇！」不過百佳將計就計，佢哋已喺大埔超級廣場、將軍澳新都城及青衣長發邨等超市門面，闢咗一個角落參考阿信屋在app上透露的二十多款熱賣貨品，精選出五十款食品，價錢平阿信屋一大截，明顯想整死阿信屋。今次林偉駿不敢輕舉妄動：「我可以減得再平過佢，但毛利更低。打消耗戰嘅話，我哋最終一樣死。佢可能就係想我哋咁，所以我靜觀其變。」今年只五十多歲嘅林偉駿，頭上有唔少白髮，佢話做邊行得罪邊行，故未敢叫個仔接班，「因為後生仔衝動、唔識忍，好似今次咁，年輕人一定反擊，咁就中咗計。等我呢啲行走江湖夠耐嘅人去處理啦！」屆時一場腥風血雨，在所難免！ 澄清「爆房味」 本刊上期講到郭氏三兄弟嘅堂兄弟郭炳燊，專幫新地落釘收地，無諗過佢活躍各區外，仲到處留情；既以$180爆房，又同老相好喺茶餐廳捽手仔。本書出街後，惹來好大迴響，尤其郭炳燊公司樓下之報攤，第一日更加只賣剩兩本書咁大把，街坊相當捧場。不過新地中人就詐曬型，認為郭炳燊不在新地工作，以「新地爛滾王」起名，有誤導之嫌。而內文caption提到郭炳燊在爆房前除衫，是怕留「爆房味」，亦難以理解！據小記解釋，「爆房味」其實想指煙味、女人香水味等，咁講確實含糊，抵打！下次再「撞到」郭生，小記承諾，用字會更加準確！ 保利熱爆揭書畫最好賺 內地拍賣行保利文化（3636）招股，憑著其央企背景，包裝上獨特概念，反應異常熱烈，證券商嘅孖展額在招股首日已經爆曬，未入到飛嘅投資者唯有說服自己：無咁易中嘅！有「中國蘇富比」之稱嘅保利，曾多次拍賣圓明園獸首等文物，可想而知有幾威。究竟邊類藝術品最好賺？揭開招股書一睇，原來保利有自己買藝術品再拍賣，其中中國書畫，平均有兩倍利潤。而最不好賺的，是油畫及雕塑，只得四成利潤，而且存貨年期最長，截至去年十月底，這類藝術品平均已持有四年零七個月！保利話自己有七十二名鑑賞專家，每件藝術品都會找兩至三個相關專家獨立鑑定同估值。只要有一個人反對，都唔會入貨或者終止委託。咁如果拍賣的是假貨點算？Oh，sorry。 根據中國法律，只要保利做過合理驗證，是不須承擔法律責任。咩叫做合理驗證？唔，保利講咩、咪咩囉！ 職場秘笈互相體諒 港大建築系畢業，由一個小小的項目經理，扶搖直上，升任至富豪國際（78）、百利保（617）及世紀城市（355）的董事。他每期分享不同的職場經驗及秘笈；要上位，無往不利。各位打工仔，今日我想代一眾老闆吐心聲，我想講講一般老闆（尤其是中小企），並不如打工仔想得那麼風光。我從一九八一年開始打工到現今已三十三年，其間經歷不少金融風暴，潮起潮落，親眼見證一些曾經叱咤風雲的大老細，由於一時三刻的現金流問題，以致整個事業王國倒閉，不能翻身。我們很多時背後批評老闆「孤寒刻薄，冇人情味」，其實對老闆並不是太公平。老闆打開門口做生意，無論賺蝕，月頭要交租，月底要出人工及水電煤費，街數、交際費、雜費、provident fund、年底出花紅，一毫一分都不能少，賺錢還好應付，蝕錢一樣要咬緊牙關，怎樣痛苦也不能哼一聲，以免影響軍心火燒連環船，後果更不可想像。還記得沙士一役，我肯定當時各老闆日日夜夜膽顫心驚，度日如年，當時我們集團經營的酒店猶如死城，十室十空，幾乎零收入，但支出卻沒有大減，現金流非常困難，幸好各員工願意減薪以致上下一心地捱過難關，但如果沙士持續多幾個月，恐怕很多香港的上市公司都要關門大吉。當然有一小部分無良老闆，用盡方法欺搾剝削員工，確實可恥，但他們也是慢性自殺，員工也不會落力（甚至故意倒米），結果到最後這些老闆也不能善終。做打工仔，除非在經濟非常差的時候，大部分時間心理負擔比老闆輕，因為準時收人工，隔籬屋出得人工好啲，可以即時拍拍屁股跳槽，剩下爛攤子就要靠老闆或其他員工搞掂。所以打工仔也要靜下來撫心自問，自己是否真的一日九小時交足功課？若果有，你才和老闆斤斤計較吧！以上的觀點是看到美聯董事長張錦成在WeChat的一些文章有感而發（並不是擦老闆鞋，因今年人工已經加定，沒得修改），希望各打工仔見諒！ | ||||||