ZKIZ Archives


結婚新意思?人情要畀入數紙

1 : GS(14)@2016-03-24 08:52:11

再有出位新人絕橋「搲人情」,遭網民圍攻。網上熱傳一張喜帖,除附上傳統邀請函外,更有一段新人留言,同時宣佈二人「雙喜臨門」,愛情結晶品將於12月出世,但指「為了讓得來不易的小天使能有更美好的未來」,要賓客將禮金匯入指定銀行戶口作為子女日後的「教育基金」,更要求婚宴當日「帶同收據交予迎賓處以作核實」,令收帖人甚為反感,反問「我幫你養埋個仔好冇?」自稱是新娘同事的收帖人在網上討論區貼公開該張出位請帖,稱大家原本並不相熟,「平時都只係hi、bye咁」,但新娘日前派帖卻寧濫毋缺,「仲要連part time(兼職)都畀埋,我心諗人哋學生嚟㗎咋,平時返工都係返得嗰一陣,好心就放過人!」當見到喜帖內居然分別印有中銀和滙豐兩個銀行戶口號碼,並要有入數紙作證,「真係爭啲『嘩』出嚟,我未見過啲人拎埋肚入面個B嚟拎人情」。收帖人稱,收到帖原本已預算要付人情,「但最嬲都係你要我拎埋入數紙去飲,點呀而家?驚人走你數?」直指新人「搲人情」做法甚為失禮,「請飲請到咁就不如唔好請,真係失禮人又失禮自己。」不少網民對該封喜帖都表示難以接受,有人直指「都知養個B好貴,但係咁樣嚟拎人情真係好O咀囉」,更有人質疑新人想擺一次酒收兩份人情,奉勸事前得失賓客只會令更多人「放飛機」,得不償失。但亦有網民欣賞新人開宗明義「夠率直」,「你自己小家,人哋只是想方便大家,直接過數人情,你就歪曲件事。」





來源: http://hk.apple.nextmedia.com/news/art/20160324/19542963
PermaLink: https://articles.zkiz.com/?id=298570

Next Page

ZKIZ Archives @ 2019