| ||||||
抄人，反被人所抄。三年前，陳家豪（Terry）在網上尋找禮物送給太太作結婚禮物，找到台灣一間叫歐柏拉的公司，可替他在紅酒瓶上「雕」上獨一無二的圖案。太太收到禮物當然高興，他亦發現了這個「雕酒瓶」的商機，開設了Design Your Own Wine（DYOW）。但「壹盤生意」的故事，又豈會這樣平坦。 Terry找來在內地開廠的老友合作，一個接單、一個生產，卻原來「養虎為患」，老友偷橋令雙方拆夥收場。回港重設廠房，又發現原來當日幫襯的歐柏拉公司，已在香港設立分公司，並以平價攻勢吸客。但有競爭，反而激發他的鬥心。Terry決定改走高檔路線，轉攻貴價貨，引入閃粉和金箔香檳酒等過千元的特色酒類，並冒險接過萬元紅酒雕刻生意，反而扑中市場需要，何猷龍的澳門摩卡娛樂場、社交網站Linked in等大公司，都有找他「雕」酒瓶，現月賺十萬。 那支刻上了Terry和太太樣貌的紅酒，不但逗得佳人一笑，親友們還紛紛打來讚賞其心意，及打聽來源。還沉醉在幸福之中的Terry，已在想其搵銀大計：「當時我買一支約一千蚊港紙嘅酒，搵宅急便用掛號嘅形式送出，運費一千蚊。過程只能用電話、電郵同台灣嘅雕刻公司聯絡，改圖又無得當面傾，仲要等足兩星期先寄到嚟，我嗰時諗自己搞又得唔得？」當時在地產公司做市場推廣的他，在facebook開專頁，秘撈接單，他稱：「我買咗支百零蚊嘅電動雕刻筆，老婆設計畫圖，我負責雕刻，逐筆逐筆打磨，再用玻璃專用的金粉顏料上色。」Terry買來幾十元一支的紅酒，加工後可賣百多至三百多元。 生意後來愈做愈大，他說：「靠嗰支筆，雕一支酒要雕成個星期，晚晚趕工趕到凌晨三點幾，日頭又要返工！」那支電動雕刻筆非常吵耳，一開動便發出比電鑽還要刺耳的吱吱聲，「樓上樓下，真係多得我唔少！」打磨時，玻璃粉末四散房內，長期吸入，影響健康。有感不能長此下去，Terry於是找來一名在內地開啤工廠的朋友合作，他與太太及家姐投資四十萬元買幾台雕刻機，放置在朋友廠房，Terry接單、朋友負責生產，本來以為好橋，怎料暗藏危機。 養虎為患 「佢間廠本身有工人，可以幫手操作雕刻機。接到訂單就以拆賬形式做，每支酒對方抽佣一成。」有了後援，Terry開始接大單，每張單由幾支到百幾支都有，「以前驚做唔切，唔敢接太多。」本來月賺兩萬的手作仔，變成了月賺八萬的小生意。一直以為與大陸朋友合作愉快，其實早已養虎為患，Terry說：「我只係間中返去睇廠，平日嘅品質監控就由大陸嘅工人負責，有時質素唔係咁好，打俾佢哋改，奉旨唔肯。後來有好多次，接到急單，個客要求四日完成，佢哋次次都拒絕，話按規矩七日先起貨。」Terry表示，他們手頭上接到多少單，他心知肚明，並怒氣道：「明明嗰排唔忙，點解都唔幫手？」他更質疑對方：「佢話無用我啲機接私幫生意，你信唔信？我就唔信。」Terry有想過「踢竇」，但想到對方始終是認識多年的朋友，於是選擇和平分手。「好彩之前投資嗰四十萬機器錢已回本。」Terry決定在香港設廠，「仲可減少運輸成本添。」拆夥期間，雙方協議保持合作關係，直至Terry安頓好業務為止，而對方原來亦已意圖自己做「雕」瓶生意，他指：「佢同意我攞番部分機器。但就要等佢哋啲新機到埗先攞走。」說是合作，但長達四個月的交接期，對方不願趕工、不願接複雜的雕刻圖案，有時甚至連單也不願接，令生意額下跌最少兩成。分手後，雙方已再沒有聯絡。 黃雀在後 Terry回歸香港，單是搵廠就花了三個月時間，「原來要有三相電壓（工業用電壓）的工廈先支持到啲機器，搵勻葵青區所有工廈工廠，有一半都不適合，最終先搵到荃灣一間廠落腳。」終於安頓好，竟殺出個程咬金，Terry說：「我以為我哋係香港首間兼獨家酒瓶雕刻公司，點知香港已經有人做。」這個對手，就是Terry結婚當年造酒送給太太的台灣歐柏拉酒瓶雕刻公司。當日Terry以為是搵銀良機，「原創者」又怎會想不到？Terry更發現對手賣得比他平，如一支紅酒連雕刻，他賣三百八十八元，對手每支平成五十大元！記者找到歐柏拉香港分公司，老闆娘是三十五歲的林小姐，她本是家庭主婦，丈夫是的士司機，她說：「我同老公上網見到台灣有，就訂咗支酒俾朋友。佢對呢種技術好有興趣，就聯絡咗台灣歐柏拉。我哋仲特登過去學師，對方讓我哋以承辦商形式經營，唔分我哋利潤。唯一要求就係要高水準，跟番佢哋牌子嘅機同顏料。」林小姐藉此可向客人「撻朵」，顯示自己有台灣總部支持，歐柏拉亦同樣「變相」攻入香港，雙方互惠互利。歐柏拉圖案偏向台式，走卡通路線，而且人像背景設計較簡單，林小姐表示他們的目標顧客，主要是年輕人，因此會主力引入一些只有百分之五酒精成分的果汁汽酒。扣除成本，每月淨賺三至四萬，她說：「我哋每次攞小量貨，成本比較高，好難賺得多。」 狗急跳牆 這盤生意朋友抄到，師奶都做，遲早通街都有，但已經辭職全程投入的Terry認為無路可退，唯有轉走高檔路線，做到最好，他說：「對手平價搶客，我都無謂硬碰硬。」第一步是「充派頭」，本來廠房可兼做辦公室的，但Terry選擇分租朋友位於荃灣的新式工廈ONE-MIDTOWN作辦公室，近廠房之餘：「有海景，見客好啲。」他亦加大投資，棄用內地機器，去美國買雕刻機，一部就要四十八萬，還到當地實習，他指：「美國機雕工比內地和台灣精細，幼細如一毫米的線條都刻到。」對手以夫妻檔、手作仔模式經營，他請來freelance設計師，為客戶由人像到背景都度身設計，而且酒樽三百六十度都有雕刻，並劃一收費，他說：「唔似對手只有單一背景咁悶，佢哋畫人像又要加錢。」 Terry採購外形高貴獨特的閃粉酒、金箔酒和大提琴樽形的白酒，一支酒連雕刻賣一千零二十八元：「閃粉酒來貨二百五十元一支，酒盒約一百。」起初他也擔心太貴會無客，怎料貴價酒訂單更多，佔生意額八成。Terry找來四至五個香港酒商合作，定期引入特別酒類，還標榜一星期內替客人找到所需年份的酒，他亦冒險接萬元紅酒雕刻。對手雖然也會接貴酒訂單，但講明「雕壞不賠償」，Terry說：「客人自己攞酒嚟，幾多錢嘅酒，我都係收四百八十八蚊手工費，唔係太貴嘅酒雕錯咗都會賠，曾蝕過千幾蚊。」他指走高檔路線，吸引不少公司客：「佢哋用嚟做公司周年禮物，一訂就幾十支！」最近，Terry踩入婚紗展及紅酒展，務求在下一個競爭對手出現前，盡快搶佔市場。 開業資料（7/13）^ 工場：$24,000#辦公室：$8,500機器：$480,000入貨：$50,000人工：$35,000雜費：$3,000總投資：$600,500^拆夥後計算#兩按一上 營業資料（12/13） 營業額：$200,000人工：$47,000^辦公室：$8,500工場：$8,000入貨：$20,000雕刻材料：$10,000水電：$5,000盈利：$101,500^一名全職、兩名兼職及設計師 | ||||||