| ||||||
阿里巴巴創辦人馬雲的六四論不單激起四方批評，連訪問他的《南華早報》亦因此上演了一場河蟹羅生門。撰寫專訪的劉怡擅自刪除網站上部分敏感內容，被公司責難後請辭，還向馬雲「鄭重道歉」。 這場軒然大波源於馬雲談到阿里巴巴前年捲入涉嫌欺詐危機時，拿鄧小平作喻：「好像鄧小平在『六四』當中，他作為國家最高的決策者，他要穩定，他必須要做這些殘酷的決定。這不是一個完美的決定，但這是一個最正確的決定……」《南早》英文報紙在七月十三日刊出訪問，中文網以全文對答的形式刊出專訪的詳細版本，但在當晚，馬雲有關「六四」言論的約一百字竟然從網站消失，直至四天後《蘋果日報》以頭版報導馬雲遭到六四受難者和流亡民運人士的批評後，有關內容才在《南早》網站「重光」。「劉怡把專訪內容寫成了兩個版本，一個是只供存檔不公開發表的完整版，另一個則是刪除了『六四』內容，提交給總編輯陳衞中的版本。但陳認為專訪應該全文實錄，決定發放完整版。劉怡一直不同意，認為那段與主題無關，對受訪者不好。」消息人士稱，劉怡私自「閹割」專訪內容，未得到上司的批准。這位令到《南早》又再被人與《China Daily》睇齊的國產記者，在九十年代初取得南京大學法學士，畢業後投身傳媒，曾任職《上海青年報》及《21世紀經濟報道》。她曾長期報導資訊科技新聞，因此結識馬雲，後來又辦過設計雜誌和製作紀錄片。約四年前她獲陽光衞視老闆陳平賞識，通過內地專才計劃來港工作，任職紀錄片編導。二○一○年底她轉職至《南華早報》，出任中文網副總編輯。阿里巴巴指《南華早報》存在「不正當的引述」，致使公司和馬雲「遭遇一場遠離採訪主題的論爭風波」，更為劉怡請辭感到遺憾。唔知，馬雲會否因此請劉怡轉行做公關呢？ 汪洋女婿大起底 上週《南華早報》爆料，指啱啱上任做國務院副總理嘅汪洋嘅女婿張辛亮Nicholas，今年二月喺香港成立辛夷資本管理。張年約二十九歲，曾任職於高盛、瑞銀、索羅斯基金等機構，今回同一班芬佬自立門戶闖天下。不過報導只係提咗一句張辛亮嘅嬌妻（即係汪洋個女），話張太都喺香港一間大型歐洲投行度做，並無提及姓名。本刊翻查張辛亮報住位於西環縉城峰嘅地址，發現業主係一位叫汪溪沙嘅女士。Bingo！「大海」個女，仲唔係「溪沙」？根據網上資料，汪溪沙九十年代就讀於安徽省合肥市第一中學，咁啱汪洋做緊安徽副省長。到二千年，文科生汪溪沙考入北京大學讀商科，計起嚟應該同張辛亮差唔多年紀。到一○年十二月，中國和平統一促進會香港總會等紅色組織獲湖北省領導人邀請，由田北辰、劉夢熊、施祥鵬等帶隊北上考察。其中一名團員正係汪溪沙，當時佢喺德意志銀行香港分行做投融資部高級經理。本週二，德銀拒絕回應汪是否其員工。亦都喺呢一年暑假，汪溪沙以逾一千五百六十萬元，扑槌買入西環縉城峰一個約八百八十呎嘅中層單位。另外，今年四月，張辛亮無懼雙辣招，斥資近四千萬港元，買入上水天巒一間逾二千呎嘅獨立屋。 阿爺係副總理 而張辛亮又豈止汪洋女婿咁簡單。據本刊翻查資料發現，張辛亮嘅爺爺，好大機會就係喺八十年代曾任國務院副總理嘅張愛萍。睇番公司註冊記錄，張辛亮曾經報住一個位於北京什剎海白米北巷七號嘅地址，原來正係張愛萍嘅四合院宅邸。而張辛亮喺一○年做過香港公司新紀元諮詢服務（已於上月解散）嘅董事同埋股東，呢間公司嘅創辦人之一張小艾，正係張愛萍個女，即係張辛亮嘅姑姐。張愛萍一九一○年生於四川，十六歲加入共青團，同毛澤東一齊打江山，四九年建政後獲授予上將軍銜。到咗文革期間，張愛萍一家六口無一例外被批鬥，三上三落，直到文革過後先至復出。張愛萍八○年任副總理，八二年轉任國防部長，直到八七年退休。據大陸文史雜誌《炎黃春秋》社長杜導正寫嘅《趙紫陽還說過甚麼》，八九年五月戒嚴令一出，張愛萍等老紅軍上書鄧小平，請求軍隊唔好入城。後來左王李先念搵張愛萍傾偈，話國家已到生死關頭，唔開槍唔得。張愛萍一句駁回：「我沒感到什麼生死關頭。」張愛萍於○三年病逝，其妻李又蘭則於舊年去世。三個仔張翔、張勝、張品均曾長年喺解放軍服役，並獲少將以及大校軍銜，不過都喺九十年代下海經商。女兒張小艾則於九十年代初留學美國讀博士，回國後創辦NGO北京人類生態學會。 | ||||||