乜乜大 人在中環
http://manincentral.blogspot.hk/2013/07/blog-post_11.html睇咗呢段
新聞，忍唔住又想抽幾句水。
來自港大既同事，我公司有丫。老實講，真係feel唔到有甚麼特別「驕縱」，又或者「貴族味濃」既感覺喎。當然我明白，我果間係地踎企業，有「貴族味」既人點會肯黎做。
至於中大理大既同事嘛…我公司都有遮。係咪特別刻苦耐勞聽教聽話？無意冒犯，但個人感覺其實都係跟來自其他院校既同事差不多。
我覺得成個調查係都係多鬼如的，當然，如果個調查係想做俾學校裡面既人睇，等佢地feel good/feel bad既話，我就冇說話講了。大學畢業生來自邊間好邊間唔好，我作為公司老闆，我真係一啲興趣都冇。去判斷一個人掂抑或唔掂，我只懂得靠自己對眼，而唔係靠佢拎住果張沙紙，個publisher係邊一個。我唔知呢啲survey對我呢亭老闆仔有咩價值可言，至於其他公司既HR部門，又係咪真係會認真對待呢亭survey既結果，響招聘篩選既過程當中，作為參考既指標？
當我仲讀緊書既時候，我都仲會幾關心，自己讀緊果間大學，最新既排名如何。然而出來社會做事之後，不消幾年就發覺，只要經過三兩年社會洗禮之後，畢業生響能力上就會有徹頭徹尾既改變。所就讀大學作為佢地能力同工作態度既指標作用，會變成完全唔relevant。大學排名？邊間大學最受僱主認同？唉，多餘啦。
呢亭survey，係要排出一個list，from the best to the worst，咁標籤不同院校既學生。潛台詞大概係，來自最好院校既學生，應該最受僱主歡迎。Get the best people成為咗好多人招聘時所追求既原則。我比較冇志氣，請人既時候，從來都冇辦法distinguish出邊個candidate係the best。我只係稍為有點把握去判斷，邊個candidate最適合我公司，最容易融入我公司既體系之內。而呢個判斷，同candidate來自邊間院校…我搵唔到一丁點既關係。
香港地，對年輕人既標籤已經夠多啦，我地呢啲老鬼們，唔好食飽飯冇事做再為佢地加多幾個啦。