ZKIZ Archives


跑馬應酬 左丁山

2009-02-28  AppleDaily





 

夜 馬馬場,最多生意應酬,不少老闆階級與董事級人物,到咗星期六、日,每去到東莞、中山打高爾夫,唔到馬場,但星期三夜馬就唔同,到跑馬地參加夜馬賽事,係 一個放工後應酬嘅上佳藉口,有啲外國來港嘅客戶幾喜歡晚上到快活谷一行,七點到十點,消磨三個鐘頭,飲食之餘可以小注怡情,一樂也。

左丁山 就參加咗一個如此這般馬場飯局,講政治講生意多過講馬,真係有助於馬會餐飲而無助於馬場投注額。一位知名人物講到行政會議新成員,甚有意見,諸多批評,原 來佢識齊五位新科議員,除咗劉遵義教授之外,對其他四位都唔服燒賣,話楊女士係純工業家;葉先生係世外高人,不食人間煙火;劉先生係長老,識得鄉下事;胡 女士係舊電池,即使係新電池嗰陣,都唔知佢有乜貢獻。嘩,句句有骨,驚死我哋聽唔明,仲要加多一句:「政治圈子當然用人唯親,唔通搵頂心杉同自己傾管治大 事咩,但用人唯親之時,都要搵啲叻o架、有用o架,對自己有助力o架嘛!」說得有理,奧巴馬也是如此,崇拜奧巴馬者不必批評香港政治圈用人唯親,最多只能 批評入選之「親」,並非能人。

知名人物點解唔批評劉遵義呢?佢話:「行政會議之中,校長最有intellectual power(智慧力),特別在經濟金融方面,最啱目前需要,華盛頓、北京、台北都會尊重佢!」咁又係,假設森瑪斯訪港講國際金融,相信只有劉校長能夠代表 特區政府接招,為香港留番幾分面子。

 

講到口沫橫飛,邊有專注力去揀馬吖,於是又試敗走快活谷,紡織F亦然,佢本應該贏馬 嘅,但因為聽知名人物講古聽到入神,趕唔切下注,走咗雞。問紡織F生意如何,佢話今年恐怕會有好多時間賭馬咯,因為海外訂單失蹤,佢嘅公司與工廠皆唔夠工 夫做,遲啲恐怕亦要緊縮,即係逼住裁員,紡織F話:「海嘯第二波就係工業崩圍,後果難以預料。」財務M帶埋大仔嚟見吓世叔伯,問佢喺邊度做事,佢話剛剛被 公司裁走,正在搵工。乜嘢公司裁人呀?就係本應是名牌嘅資產管理公司,裁員首先向新人開刀,正是last in, first out(入得遲,炒得早)!海嘯第二波會推高失業率,勢所必然。



PermaLink: https://articles.zkiz.com/?id=6196

Next Page

ZKIZ Archives @ 2019