ZKIZ Archives


愈老愈可愛 左丁山


2009-02-17  AppleDaily


 

到 跑馬地董事廂房跑夜馬,主人家介紹識咗六位外籍人士,交談之下,先知道幾位都係老香港,居港十年八年至三四十年不等,Z女士啲廣東話十分純正,M女士更係 食家、葡萄酒鑑賞家。問M女士對邊間餐廳最有印象,佢反問:「邊一種菜?」咦,行家噃,於是話西餐,點知佢話:「我只對中菜有興趣,西餐麻麻哋啫!」於是 不假思索,提起香港之三星中菜廳,唉吔,呢幾位洋人個個搖頭,齊聲講:「除咗價錢夠高之外,無甚足觀!」

咁講法,米芝蓮之「評判食家」嘅口味可能同香港洋 人唔多一樣,當然與我哋本地人更加唔同。馬場應酬場合,講飲講食講電影多過講馬,但唔知邊位先生帶來一張貼士紙,係某大外商股票經紀行某經紀提供嘅,呢位 仁兄大概以電腦分析股票走勢之餘,還有時間分析賽馬,每次提供電腦貼士,今勻第一場就中咗「大喜訊」、「永利多」呢條Q,大家收錢,好不高興,但接下來就 唔掂嘞,可見電腦分析賽馬亦平常,未必勝於人腦。

在座女士講電影,講講吓講到男明星,有人鍾意李察基爾、畢彼特、湯告魯斯,皆標準英俊男士,資深經紀M就 話喜歡李馬榮與占士高賓,話呢兩位先至係男子漢喎。左丁山埋頭刨馬,本來冇乜意見,但失驚無神俾女主人問起:「你又鍾意邊位?」左丁山衝口而出:「辛康納 利!」女主人要埋理由,於是左丁山話:「辛康納利愈老愈有型,佢初期做占士邦,狡猾兼狠心,但冇乜演技,其後唔做占士邦,四十年來做過好多唔同角色,演技 有進冇退,光芒四射,即使做配角,都好睇過主角。」

L太話好同意,讚嘆呢位蘇格蘭男士有如陳年靚酒,愈老愈醇,直情係男士與女士嘅偶像。老明星如非有價 值,LV點會搵佢賣廣告吖,香港電影對老人家不重視,總係喜歡年青靚仔,不過香港已冇乜後進影帝,講嚟講去,仍然係周潤發、梁朝偉、周星馳,連梁家輝都好 似失蹤咗。呢幾位已經四十幾五十零歲嘞啩,發哥與偉仔大有資格成為香港辛康納利。(更正:上星期五講及淡馬錫新CEO Chip Goodyear係前BHP行政總裁,唔係前Rio Tinto總裁,佢係美國人,唔係澳洲人,多謝雪梨讀者來電郵提醒。)
愈老 老愈 可愛 左丁 丁山
PermaLink: https://articles.zkiz.com/?id=5915

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019