ZKIZ Archives


怕打劫 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130126/18146423

大明星希拉莉史雲克(Hilary Swank)在巴黎市郊坐的士,遇上塞車,遭三名賊人打劫,強搶佢嘅手袋。呢類打劫案,據一啲熟悉巴黎嘅朋友講,直情係無日無之,之不過史雲克係奧斯卡影后,先至成為國際新聞啫。其實到歐洲大城市旅行,要有心理準備,女士買入名牌貨品,行街招搖嘅話,幾易成為歐洲匪徒下手對象,從馬德里到巴塞隆拿到米蘭到巴黎,莫不如此,甚至乎在世界「最宜居城市」日內瓦,火車站內亦有壞人在遊客背後噴番茄醬之類,跟住受害人入廁所打劫之。
沙田陳太有朋友P與丈夫久居台北,聞道一位台灣老友移民南非之後發達開舖,於是前兩個星期去南非旅行兼探老友,回程返台北前,在香港住兩日,與沙田陳太到沙田凱悅飲下午茶,講吓近況。朋友P話:「我對南非印象甚差,除開普敦之外,其他一無足觀,嘢又難食,最慘係晚上唔敢出街,與老公坐在酒店房間內睇電視,台北夠有大把電視好睇啦。我地位台灣朋友揸車嚟搵我地玩咗一日,趁陽光未落就送我地返酒店,叫我地千祈唔好出夜街,佢亦要趕返屋企,因為佢架車係Benz,晚上遇到塞車或停在紅燈前,隨時會俾人打劫。你話啦,住在呢啲地方,有乜樂趣。台北安樂得多咯!」
南非盜賊如毛,人盡皆知,近年不少中國商人被睇中,中國駐當地官員亦無倖免,總之「強國人」似係有錢人辦,係各國大隻佬劫匪嘅最佳下手對象。
沙田陳太另一位太太團成員為此度咗一條好橋,到巴黎旅行特登帶咗兩個港式紅白藍袋,行街時穿着古老,入到名店掃貨之後,冚唪冷擺入紅白藍袋先至走出店外,以免名貴物品走光露眼。佢話呢招似乎有用噃,禾稈冚珍珠,古有明訓,故意揚威,盜賊自招。點解香港治安咁好,在交通擠塞時打劫嘅案件,香港未聽過,反而歐洲大城市就係經常發生?相信係與經濟不景、失業率高企有關。一啲國家空口講標準工時、最低工資、退休福利,實際上只係保護有工做嘅工人利益,完全忽視失業人士搵工做嘅困難,久而久之,失業人士之打劫好過打工嘅心態就會出現嘅嘞。

PermaLink: https://articles.zkiz.com/?id=43795

Next Page

ZKIZ Archives @ 2019