ZKIZ Archives


又回到中港融合 人在中環

http://manincentral.blogspot.hk/2012/09/blog-post_25.html
我家離開新界東北地區頗遠,果度要發展,我感受相對唔係好強。呢件事唯一觸動我神經嘅,係當中有關邊境模糊化,加強「中港融合」嘅意圖。

我響國內有生意,過去幾年遊走響國內幾個大城市既時間亦多,算係對國內既情況有一丁點認識。然而「中港融合」從來都唔係我杯茶,唔係甚麼民族主義又或者歧視問題,但兩地既人響生活習慣以至價值觀方面,仍然存在極大既差距,你要夾硬將兩地融合起上黎,只會自己搵自己笨,自製矛盾同衝突。

九七之後,唔知點解香港地忽然多左批自以為好識時務既「俊傑」出黎,不停鼓吹中港必須融合,否則香港就會失去偉大既靠山,連生存都成問題。至於點樣先叫做「融合」呢?我以往既理解係,響做事既原則同方法上,儘量去「模仿」大陸果套,凡事都以「配會」大陸為大前題。總之大陸面前,選擇做個矮仔,然後期望得到恩賜。

呢種思維並唔難理解,不過我對呢種諗法有兩個疑問:第一,你要模仿大陸果套,但國內其他城市,玩呢套「大陸模式」玩左幾十年,玩得比你精,比你熟。香港人何得何能有本事響呢一個遊戲上面贏得到人?香港人始終存在公平、法治、凡事有規有矩等價值觀於心底裡面,你要模仿人地果套,你冇可能去得夠佢地咁盡,所以你永遠都唔會贏得到人。第二係,香港呢個城市既獨特性,本來就對中國有其價值,而且搵勻全中國都搵唔到。呢啲獨特既價值正好讓香港繼續生存同發展,不斷鼓吹中港要融合既香港人,不斷嘗試將本地既獨特性抹走,務求香港變得越黎越似大陸,咁香港點樣生存落去?

我每次到國內工幹,儘管見到國內既城市建設又新又豪又搶眼,但要香港似大陸?No way。

*****

剛從國內回來,有一件事讓我覺得有點怪怪的。

國內反日情緒高漲,我住既酒店離開日本領事館不遠,緊張既氣氛濃罩住整個區域。

國內既朋友問我:「CK,真係估唔到,呢次釣魚島既事件,香港人情緒居然都咁高漲?」

我聽完覺得奇怪。OK,早陣子倒是有香港人登上了釣魚島成為了頭條新聞,但在香港,反日和保釣情緒真的很高漲嗎?如果你問我,反「國民教育」運動,甚至最近有關新界東北既爭議,香港人既關注程度,都要比釣魚島既事件黎得高好多。

國內朋友話,佢響電視既畫面上,見到好多香港人對釣魚島既事情好狂熱。冇錯,資料來源係「電視畫面」。

另一個在國內既香港朋友問我:「譁,香港搞乜呀?香港人幾時變到咁肉緊釣魚台呀?」

「肉緊?冇喎其實…」我答:「咁多年黎都係差唔多啦。你又響邊個媒體睇到香港人情緒好高漲呀…」

我對這個問題唔敢妄下判斷,但幾個國內朋友不約而同地跟我講同一件事,我心裡面忽然響度諗,香港人既民族情緒,響呢件政治事件當中,大概在不自知既情況下「被融合」了。

PermaLink: https://articles.zkiz.com/?id=37821

Next Page

ZKIZ Archives @ 2019