|
||||||
陳大文，一個普通不過的名字，通 常是小學生作文時用上的人名，又或者是政府叫市民申請這樣，更換那樣的表格樣本的姓名代號。只是，某日路過北角新光戲院，在書局街抬頭一看，就發現了「陳 大文地產交易市場」。原來，陳大文是一位做了四十五年地產經紀的精靈長者，這個陳大文的故事，就由七十四歲的他來現身說法吧。 我就是陳大文，名字由在中山鄉下種番薯的阿媽所改。老豆在我還有三個月才呱呱落地前就死了，我這一輩以「大」字行頭，阿哥都叫大生、大昌，阿媽就將我叫大 文，易寫又易記。嗱，我身份證真的寫着「陳大文」，但睇得唔影得，點知你影咗用嚟做咩，唔得，唔得。「陳大文」這個名字從來無為我帶來任何問題，着數亦不 見得有，但一定早過政府用「陳大文」叫人換身份證。廿幾年前，我已經在電台賣廣告啦，「買樓呀，搵北角陳大文啦！」一日三次，每個星期一百蚊，好過登《星 島》，一段得廿四、廿五個字，仲細過我手指公，就要五蚊。電台廣告還要是許金峰錄的，你知道許金峰是誰嗎？他很有名的，唔知就自己查吓。（註：許金峰是 《鏗鏘集》的旁述，是前亞視主播之一。） 北角邊個唔識我 在北角我好出名的，老街坊都識我，走過報紙檔總有人同我打招呼，這個周生生鋪就是廿年前我幫手同業主傾的，賣珠寶好，賣幾件就夠交租，我初來香港都是賣珠寶的。 十幾歲，在鄉下讀完初中，就跟阿叔由中山去廣州打工，到郵局做分信，放假就在工廠打散工。幾年後，說是投靠在澳門的大哥，但沒使過他半塊錢，開糧油鋪的錢 都是在廣州辛苦儲回來的。六七年，澳門暴動過後，我隨身就帶着一百六十八元來港，有個朋友開珠寶店，說北角是繁華地區，我就在北角租下僑輝大廈的樓梯底鋪 做珠寶。 怎料做了半年，就被打劫，無本錢買貨，想了又想，俾我發現做地產經紀仲好，只要串連到一買一賣，就連本都唔使，唯一條件就是要多人識。我租的樓梯底鋪對正 英皇道，隔一個鋪位就是新光戲院，人流好多，夜晚啲戲迷趁九點中場休息，會到附近買吓小食，飲吓蔗水，我到十點散場後才關門，搏啲戲迷休息時來睇吓、傾吓 偈。 霍英東讚我勤力 好多老闆都是這樣認識到的，包括霍英東，他經常同太太（註：三太太林淑端）來看戲，有日走入我鋪頭問我，「?仔，咁夜仲唔返屋企？」我答：「返到屋企咪又 係對住四面牆，不如坐响公司睇吓有無生意好過啦！」他見我咁勤力，有次他與大昌行老闆梁銶琚來睇戲，中場飲過蔗水就將梁介紹給我，後來梁銶琚就介紹我給他 公司旗下負責樓宇發展的親戚梁家鴻，叫他多多關照我，「有咩貨頭貨尾就俾呢個?仔做啦。」老實講，以前做經紀無現時那麼多規管，做經紀的一係賺價一係賺 佣，當然賺價好過賺佣多多聲，有大孖沙照住，人哋要真金白銀攞錢買貨先有得賺價，我就唔使，北角堡壘街偉文大廈、建華街嘉文樓就做了不少，當時一個單位 四、五十萬「買入」，我賣出去賺幾多就全落袋。不過，其他大老闆的新盤就無咁着數，都是賺佣，美孚新邨、南豐新邨、太古城、杏花邨，佣金通通只得百分之 一。 陳大文夠搶眼 為令更多人識，我將樓梯鋪外牆都用嚟賣廣告，大大隻字寫住自己個名，間鋪望落大好多，好似好有規模、好信得過咁。到八十年代尾搬到自置的安寧大廈寫字樓， 我又同大業主租外牆，掛個廿七呎長的霓虹光管招牌，個招牌好搶眼o架！足足用了三十一條威吔拉住，掛了十七、八年，不知幾穩陣。早幾年，我見愈來愈少返北 角，先搵人拆咗佢，拆都用咗我一萬銀呀！近年我很少做二手買賣，新盤更加唔做，邊有氣力去同中原、美聯搶？唔通我又去馬路開人車門呀？傻嘅！後生的經紀都 好慘，規管多、成交少，炒樓賺錢要同政府分，邊個睬你？有時啲後生經紀見到我，我話明係行家，佢都照sell，你話幾陰功。 以前做買賣好簡單，大家都好老實。樓書薄一薄，薄過家陣樓書塊紙皮。家陣睇示範單位，不如睇圖好過，但個圖畫得愈清楚，就愈呃人喎，以前一千呎樓，你攞尺 度點都有九百呎度得到出嚟，但如今度到六百幾呎已經好開心。做了經紀幾十年，舊樓書、舊相、舊文件都放在上環辦公室，有人約傾生意才回來，現時主力落釘等 收購重建，經常四圍走，有幾個揸老人牌（即是地產經紀中的E牌，領有此牌者可自行開設地產代理鋪頭，普通經紀則領S牌）的經紀跟我搵食，拆佣五成，全部五 十五歲以上，一來唔使教，二來唔等錢使，新人都是即食麵（意即唔浸得，追求即食）點做。我個仔都是地產經紀，但不是在香港，在美國三藩市，他都有排捱呀！ 退休？退咗就真係休啦！哈哈！ |
||||||