抗逆 PARTIPRAL 派得好
http://partipral-hk.blogspot.com/2012/05/blog-post.html恆指5月份以來下跌得相當急勁之餘, 調整既幅度亦相當大, 今年以來既升幅基本上已於兩星期內被完全抹去. 我曾經認為今年仍然會係上落市格局,
但隨著今週指數正式跌穿2萬點, 呢個睇法已經再站不著腳. 必須尊重客觀事實, 我地正在面對自去年9月以來最差既投資環境.
市況逆轉, 必然會有大量壞消息充斥於市場上, 預設既支持位一個又一個被攻陷, 投資氣氛必然相當惡劣. 目前情況係人人要錢唔要貨,
正因為人人恐懼, 作為小投資者就更加應該保持客觀與理智既心境. 尤其係有過去年經驗,
大家應該有更大信心去應付今次呢輪跌市. 5月份僅餘8個交易日, 由於近期實在跌得太急, 根據往績, 月尾往往比較容易出現反彈.
加上既然已經跌到如斯田地, 再跟風追沽亦無甚意義, 水位亦不多. 目前要做既係先耐心等候反彈出現, 然後再決定是否應該減低持倉水平.
留意到個人組合自5月2號創新高後已經連續12日下跌, 高位回落6.4%, 以年回報計已跌至22%左右. 翻查往績,
原來目前情況同舊年8月相當接近. 去年8月份恆指下跌9.4%, 而個人組合只跌6%. 看似跑贏, 但由於個人大部份持股一向都係市值較細既冷門野,
此類股份對有心人來講無論要收集抑或散貨都唔係一件易事. 因為投資者相對上較為惜貨, 如果市況未轉得太壞,
一般而言都唔會輕易平賣, 所以跌市早期表現相對大市硬淨其實並不難理解. 同樣道理, 當此類股份真正出現下跌後, 投資者便需要一段時間恢復信心,
股價走勢先可以復原. 簡單講, 就係跌得慢, 升得亦慢.
基於此因素, 我認為無論最終大市是否跌完, 細市值股票亦應該會持續受壓一段時間先能夠再展升浪. 個人操作上會係等短期反彈出現後, 狠心地將部份持股沽出. 縱然我自己有一定坐貨能力, 無論如何都一定唔會100%現金, 但亦應該保留一定實力以作撈底之用.