悶局 PARTIPRAL 派得好
http://partipral-hk.blogspot.com/2012/04/blog-post_19.html港股最近異常沉悶, 有多少近似3月份既市況, 維持響一千點左右既範圍波動, 唔上唔落. 當然目前成交低迷會係比較大既問題,
看似氣勢澎湃既急升急跌, 但實際講緊既成交額都只係500億左右, 感覺上大家都無心戀戰, 短打為上. 當然,
大市由16,000點起步升左足足5千點有多, 需要有段時間回氣, 稍作調整都屬正常動作. 不過有留意到既情況係港股個股戰線近排收得好窄,
能夠創新高既版塊日益減少, 同以往大市呆滯, 細股接力輪流炒作既情況好似有D唔同. 恆安, 維達, 合生元, 騰訊, 數碼通, 澳門股,
餐飲業呢幾類股份算係眾多類別之中強中之強, 大家既共通點都係業務簡單直接, 屬於盈利相對地較穩定既公司.
個人感覺此現象係反映緊市場風險胃納在不斷下降中, 雖然唔能夠肯定會否突然出現向下突破, 但肯定目前唔係值得全力進攻既好時機.
當然, 大市如何發展基本上唔會對我日常操作有好大影響. 個人操作股票除選股以外, 最大既宗旨都係儘量減低交易次數.
交易費用當然係其中一個原因之一, 其次係買股票係實實在在買緊一間公司既股權, 個情況係無論邊間公司既老闆, 都無可能話: "咦,
我地隻野今日無左半成喎, 不如聽日休息一日抖抖先". 既然公司生意必然照做, 我認為操作時亦無必要將時間線收得太短, 盲目跟隨市場起伏,
又沽又買.
自己目前既操作概念仍然係傾向繼續為組合提升現金比重, 希望儘量保持到3成或以上. 縱觀整個組合, 大快活近期不斷創下歷史新高, 而聯亞, 永旺,
利亞零售目前亦非常貼近歷史高位, 純以P/E, 息率作簡單估值, 個人認為四股仍值得持有. 既然唔賣股, 要增加現金就唯有儲多個錢,
等月底出糧後就會做. 若果有特別睇中新目標, 可能會係換馬而非動用手頭現金.
海通證券(6837)下星期五會掛牌上市, 我認為會係短期悶市中既小亮點. 95%國際配售+5%公開發售,
今日睇新聞話目前公開發售部份5間證券行加埋只係得3千幾萬孖展額, 公眾反應冷淡有機會令原本已經分得多既國際配售部份最終透過重新分配,
可能會獲得更多股份, 貨源歸邊, 有利上市初期表現; 加上今日收市後市傳海通傾向以每股$10.6近下限定價,
而如果用今日海通証券A股(600837)收市價RMB 10.09作比較, 折讓達15%, 對比同類中信証券A+H幾近0%差價,
今次海通H股以近下限定價, 似乎係有意為投資者預留較多水位.
供求效應以及AH折讓, 會係自己今次投機認購海通H股既原因. 當然, 海通H下星期五先上市會係其中一個風險, 呢段時間A股表現如何無從估計,
所以注碼唔應該下得太大. 孖展基本上係唔需要考慮, 原因係目前公開發售距離足額認購似乎仍有大段距離, 若然聽日截飛前仍無大變,
散戶中籤率應該相當高. 用孖展最大目的係搶股, 但依家情況係要幾多有幾多, 為免中到一屋都係導致風險失控, 我認為無必要動用孖展入飛.
海通証券H股我自己就入左飛抽兩千股, 預期都係擺一至兩個星期左右. 由於對海通基本面無甚好感, 若然上市後比招股價跌10-15%,
就會止蝕離場; 而根據AH折讓推算, 上望亦應該係10-15%附近. 風險回報, 算係五五波之比. 若計牌面 (供求失衡),
上市後股價向上發展機會應該較高, 所以相對上亦算值搏.