摸魚手札：欺壓後起的落難財演
1 :
GS(14)@2017-01-29 10:30:37新年流流講股票很無觀看價值，倒不如提前過赤口，搬弄一下是非，派派花生，講一些圈中八卦，好讓大家在拜年被親戚盤問人工、婚姻狀況之餘，多少少寄託。英雄出少年，兩星期前陸東炒殼搞到個個搶住講，實情係陸東賣了盤，上了神枱只做代言人和顧問工作，那個所謂基金的全權委託戶口是由我的好兄弟一手操盤，就是這麼簡單的一回事。後起之秀不只這位朋友，我另一位朋友也嶄露頭角，初初認識佢，已經覺得佢氣度不凡，認識佢那時我人也很自負，但佢散發那道氣同整體個人能力係的確令我要佩服，我不敢睇小佢。那時我已估計到佢的工作崗位一定留佢唔住，結果不出所料，半年後佢已經自立門戶，靠着一些極強人脈和幾件「架生」搵食。佢年紀跟我差不多，唔知佢野心有幾大，只怕不出五年就要叫佢做老闆，可能仲有一隻殼㖭。由於佢的能力和架生的關係，很多線上第一級的財演都找佢合作，不過一線財演都自負，佢哋覺得自己老練，係「幫緊」我位朋友，所以態度、口氣都係一般般。我知道此人非池中物，財演之外，應該要有更多元的合作對象，所以無條件介紹了一位作風正派的新殼主畀佢認識，佢哋有一些小合作，我無叨光，也無甚麼額外要求，反正都係賣一個小小人情而已，大家少年出道，惺惺相惜。其中有一位落難財演同佢的合作，令佢悶悶不樂了一陣子。落難財演未落難前都叫多粉絲、多人識，旁人都必恭必敬，不過人也算囂張，頭腦簡單，這是我見過一、兩次的結論，後來聞說因人事問題，也是因為得罪老闆的關係，所以落難，前途未知如何。嘿嘿，落難財演不愁沒有地方落腳，尤其是現在內地金融機構太多，個個搶住要代言人，所以他就「R撈」找上了一間內地證券行。朝廷不養廢人，做代言人之餘，仲希望佢接手負責一個項目，落難財演一口答應，仲答應會叫一堆人才幫手負責。所謂的一堆人才就是我那位朋友了。朋友悶悶不樂說：「其實我都想同佢合作，因為都想幫吓佢，但開過一次會，佢不停吹噓自己；會後又把我當成下屬看待，呼呼喝喝，但明明我哋只有合作關係，也冇收過佢錢。這個項目佢自己唔會參與落手落腳做，亦唔識做。最重要係，間行負責人我本身就識，佢只係約遲我見面咁解。」我很快就看出這件事的端倪，落難財演在「騎劫」我那位朋友的能力和才幹，不過佢哋都睇唔到個重點，重點在於那間金融機構的背景。我的朋友不算太熟證券線，我把那間行的一些簡單人脈講了出來，也講了幕後金主是誰，那位幕後金主也算「落難」，不過佢的落難，係遠遠高級過財演那隻「落難」幾百倍，台底下跟線上第一級的殼王殼后有緊密合作，所以我刻意提醒那位朋友機不可失，因為以落難財演的能力和深度，佢唔會知這個老闆有幾猛，可能只想藉機敲一筆項目費和人工就算。既然我朋友本身就識間行的負責人，那就應該打蛇隨棍上，反落難財演為主，一切靠自己，總好過給落難財演叨了光。年輕人出來跑山，總會遇上人渣，被人騎劫，被人老屈不計其數，因為金融世界的跑刁艇仔都係比較速食，人家見你好，佢不會想同你長期合作，反而想過橋抽板，一口氣把你的功勞搶來，順道把你幹掉，又成日哄你「後生蝕底少少唔怕啦」這類觀念。我以前也會有「後生蝕底少少唔怕啦」這類觀念，長遠人家就會當成奉旨。蝕底畀老闆我唔會計，不過有時係蝕底畀老闆的下線，再被人叨了光，搶credit，那就真係蝕得冤枉了。都係那句，少年人惺惺相惜，落難財演已經落難，無資格騎住我朋友上位，自古上位法則向來係有能者居之，這是我對朋友的告誡。拜年閒來無事，不妨估估落難財演主人翁是誰。祝大家有一個愉快的周末，身體健康。渾水
http://www.facebook.com/muddydirtywater
來源:
http://hk.apple.nextmedia.com/financeestate/art/20170129/19911849