📖 ZKIZ Archives

業績簡評 - 稻香控股 (0573.HK) PARTIPRAL 派得好

http://partipral-hk.blogspot.com/2012/04/0573hk.html



稻香剛公佈2011年全年業績, 營業額同比上升近22%, 下半年環比亦升近1成. 毛利率15.64%比去年做得更好主因係上半年表現甚佳(16.7%), 反而下半年已跌至14.68%. 由於公司中期業績無公佈各類成本數字, 單憑全年業績推測, 食材成本上漲應該係影響下半年毛利率既主因; 租金佔營業額比重繼續保持近年平均水平; 員工成本佔營業額比重微降, 最低工資因素已被內地營業額增幅抵消, 所以最終實際對整體業績並無造成既好大影響.

業績重點繼續落在分部表現之上. 本地業務收入增長13%, 但溢利只能繼續徘徊於07年水平, 上市5年以來表現竟無寸進, 以目前條件而言實在好難想像管理層可以點樣為本地業務注入增長動力; 亮點繼續落響內地業務身上, 收入上升近6成, 溢利亦升近75%, 管理層專注拓展婚宴, 宴會市場會係增長關鍵所在. 不過值得留意既係如果以上下半年作比較, 大陸稻香下半年收入增幅比過去數期業績已大幅放慢, 而溢利環比更錄得倒退. 始終早年基數細, 增長效果自然相當明顯; 相對之下, 日後再出現爆升可能性會較低.

來年展望方面, 管理層希望12年底前將總分店數目擴至100間. 以目前86間計, 即來年會開多14間, 可能係8間大陸, 6間香港咁樣. 內地業務既擴張計劃跟去年業績報告所講既野相若, 今期加多左句話想打出廣東省, 將業務擴充至上海, 武漢, 瀋陽等地, 但呢個會已經係2013年既事. 稻香一向好有大志, 一路都講緊上市第2個5年之後 (即2017年) 會將分店壯大至200間, 值得長期記存以監察未來發展是否合付預期.

財政方面仍然保持理想, 只係一如中期業績所暗示(盈利增而派息持平), 全年派息率調低至50%, 即回復上市前所承諾既派息率. 以全年賺2.55億(每股賺$0.25)計, 現價$4.18即往績P/E 16.7倍, 息率不足3厘, 都係覺得偏貴左少少.

PermaLink: https://articles.zkiz.com/?id=32357
Next Page
ZKIZ Archives @ 2019