| ||||||
| 一向鍾意認叻的陳百祥，被指遭內地富豪騙去五千萬，在娛樂圈打滾幾十年，當年聯同譚詠麟及曾志偉將Star East（東方魅力）上市抽了唔少油水的他，竟然被騙，奇！ 被譏諷為「水魚叻」，阿叻罕有地認衰，話自己無眼光，更揚言將幾十年積蓄輸晒，下半生要靠秀姑（黃杏秀）養，講到明要食軟飯。 據知，湊慣老細的阿叻在事件中只是中間人，幕後出錢的還有幾位大老細，阿叻個人被騙的數目其實遠低於報導所指的五千萬，難怪報導出街當日，他還與旗下藝人輕鬆食「安慰宴」，仲同身邊人講：「好過買雷曼！」罕有扮死狗 上 週六（二月廿八日），有報導指阿叻捲入內地一宗騙案，涉案主謀是曾在《福布斯》排名中國富豪榜第九位的吳志劍。報導指，阿叻在○七及○八年間，被一度入獄 的吳志劍游說買下四千萬元「亞洲電信」股票，該公司其後停牌，阿叻的四千萬凍過水。其後，阿叻又再幫吳志劍的「中國神舟」在港買殼上市，更付出一千萬天價 佣金，最後共被騙五千萬。 老貓燒鬚，阿叻被問到騙案時，竟然扮死狗，話自己無眼光「舂」個頭落去，唯有當吸收經驗，又話所蝕的幾千萬是自己幾十年積蓄，以後要靠秀姑養。不過，報導出街當日，「水魚叻」還與秀姑、狄易達及范萱蔚等一班旗下藝人食「安慰宴」，完全無被騙財事件所困。 「其實件事已經成年前，不過佢（阿叻）真係無同身邊朋友講過，大家都係前兩日睇報紙先知，所有朋友都覺得好愕然，覺得以佢份人咁應該唔會咁易被人呃，二來佢呢一年來生活同以前無乜分別，完全睇唔出佢蝕咗咁多錢。」阿叻身邊好友說。 陳國強借殼 本週一（三月二日）下午三時，阿叻坐七人車回到又一邨寓所，其間一直講住電話，面帶笑容。據知，阿叻出事後仍處之泰然，全因他在事件中只是中間人，被騙的五千萬，背後其實是由多位老細所出，阿叻只投資了一小部分。未真正蝕入肉，阿叻照舊住大屋，揸靚車。 據 了解，阿叻幫吳志劍的「中國神舟」所借的殼公司，是由殼王陳國強所有，二人早年因為搞東方魅力而稔熟。九九年，陳國強一手包辦，將DC財務變身為東方魅力 （198），搵齊「福祿壽」曾志偉、譚詠麟及陳百祥做大股東，更以三人在娛樂圈的人脈而成功吸引梅艷芳、成龍等數十位天王巨星入股，生意愈搞愈大。 東 魅（198）上市後，「福祿壽」成功套現四千多萬，而公司市值亦由一千四百萬，升至高峰期的廿多億，三人從中再抽水。不過，東魅因經營不善生意一落千 丈，○○至○三年間共蝕了十二億，當年在陳國強及曾志偉拉攏下，由內地民營傳媒「星美集團」注資，最後「福祿壽」更因財失義，阿叻同志偉一度擘面。 幕後有老細 之後，阿叻繼續傍實陳國強搵食，近年更認識不少內地富豪，亦靠湊住班老細搵油水。今次六千多萬元騙案中，報導指阿叻一人便被騙五千萬，但實際上，他的個人損失只是冰山一角。 「阿叻喺殼王（陳國強）身上學到唔少財技，呢幾年湊住班老細，靠搵老細入股上市公司撈油水。今次嗰五千萬唔係佢一個人出晒，背後仲有幾個大老細科水（俾錢），佢邊會咁易拎幾千萬出嚟吖！不過，阿叻今次都真係老貓燒鬚，蝕唔少，不過佢仲同身邊朋友講話雖然今次俾人呃，但啲錢有機會追得番，總好過雷曼班苦主！」知情者說。 大起大落 綽 號「阿叻」的陳百祥，72年曾到中東做製衣生意，全盛時期有超過三千名工人，當年身家已有二、三千萬，但最後生意失敗欠債纍纍，75年要申請破產。阿叻在 79年加入無綫，曾主持《歡樂今宵》及演出各大小綜合節目，八十年代再進軍商界，與曾志偉、譚詠麟等集資一千萬，進軍中文傳呼機市場，賺到第一桶金。99 年，三人再聯同成龍及梅艷芳等巨星，將東方魅力上市，成功套現四千多萬。 有車有樓 加入娛樂圈三十年，除了是藝人身份，阿叻亦曾是上市公司東方魅力、星美國際集團及永安旅遊執行董事之一，他熱愛投資股票，當中買地產股斬獲不少，高峰期時亦購入不少物業及坐駕。 | ||||||