鄭嘉穎一視同仁09年買30萬新車載佘詩曼
1 :
GS(14)@2017-01-21 03:36:48鄭嘉穎日前被拍到揸新車載女友陳凱琳，其實呢條「香車美人」橋已經唔係第一次用，喺09年，當時鄭嘉穎被傳同「緋聞女王」佘詩曼搭上，雖然兩人死口唔認戀情，阿佘仲話自己「冇坐過佢（鄭嘉穎）車」，但天網恢恢，佢哋被拍到同車，鄭嘉穎揸住架時值約30萬嘅新車Golf GTI喺西貢出現，當時坐喺佢隔籬嘅就係阿佘。咁啱得咁橋，用車嚟「媾」阿佘嘅，仲有曾經獲大台力捧嘅小生吳卓羲，喺07年初，有周刊影到阿佘現身吳卓羲所住嘅清水灣半島，更坐上男方架Audi新媾女戰車，直駛到上環港澳碼頭。愛用「媾女戰車」呢招嘅又何止鄭嘉穎同吳卓羲？最出名嘅當然係天王郭富城，佢一向愛收藏跑車，前年落地嗰部林寶堅尼Huracan LP610-4辣跑，仲用嚟接載女友方媛（Moka），帶佢出席老友沈嘉偉飯局。而佢另擁有意大利名跑Pagani Zonda F、全球限量生產25部的幽靈之子、法拉利FXX K等名跑。另外，Shine嘅黃又南亦曾被拍到揸架紅色Audi車喺青衣邨接載一個貌似梁靖琪（Toby）嘅女仔，之後更見佢一個人揸車落銅鑼灣加路連山道車房幫愛車洗白白，可見佢都好錫呢個「老婆」。
來源:
http://hk.apple.nextmedia.com/entertainment/art/20170120/19903266