ZKIZ Archives


曾蔭權澳門江湖夜宴

2012-02-23  NM

正當唐、梁爭做下屆特首鬧得滿城風雨之際;現任特首曾蔭權,則悄悄為自己卸任鋪路。
上週末,曾蔭權就被傳媒拍到他帶著老婆,乘坐富豪遊艇過澳門,嘆紅酒嘗美食之餘,還出席了一場江湖夜宴。
據知,該江湖宴是新濠賭場賭廳「勵盈會」的春茗晚會,出席人物除了曾蔭權夫婦、幾名傍實左右的香港富豪外,其他人物,大部分都是濠江上雄霸各路賭廳的江湖揸fit人。
曾蔭權身為特首,不理身份不避嫌疑出席江湖夜宴,相信是傚法其親弟曾蔭培,一離開政府,立即靠攏富豪商家及有勢力人士,準備做好另一份工。


任職澳門賭廳廳主的阿成,上週六晚帶著三名門生,一身風褸牛仔褲打扮,去到澳門位於路氹的新濠天地度假村一個宴會廳,出席賭場旗下賭廳「勵盈會」的春茗晚宴。
「收到請柬,上面寫明著便服,咁樣當然為咗我哋班廳主著想,叫我哋著西裝打呔,起碼有一半人唔x出席。」阿成說。

「勵盈會」大陸VIP賭廳
阿 成說,同類型的賭廳晚會,一年最少四次,是次「勵盈會」舉辦春茗,各路人馬例必俾面出席。 「其他我唔知,不過呢個場係太子(賭王兒子何猷龍)自己睇,其他廳主大佬一定俾面出席。」阿成說。 澳門賭場營運賭廳慣例,都是私下把賭廳分配給各路廳主管理,但何猷龍○七年在賭場開設第一間直接由新濠管轄的賭廳「皇璽會」,○九年再下一城,開設了此賭 廳「勵盈會」。 勵盈會位於新濠天地娛樂場地下部分及二樓全層,是現時在澳門數一數二的高級賭廳。要入會成為會員,先付入會費現金三十萬。 「其實而家啲賭廳都係針對做大陸大粒佬生意,近年『華財』搞東方世紀同埋浙江會兩個賭廳搞到有聲有色,客路主要就係靠班內地高官。太子(何猷龍)開咗呢個 勵盈會,由佢自己賭場管,佢哋實力雄厚,所以推出好多回佣俾啲客,搶咗唔少大陸VIP,班廳主後面其實係咁呻。」阿成說,勵盈會給予賭客會員現金回贈比率 較其他賭廳高,例如二千萬入會的高級會員,便可享有1.1%的回贈,一般賭廳只有0.8至0.9%回贈。

江湖夜宴 俾面派對
阿成說,雖然各大賭廳廳主暗地抱怨,但還是俾面出席:「因為始終要響佢個場繼續搵食。」 他回憶當晚出席晚宴的都是江湖上粒粒巨星:「要數就有『洗米華』、『掙爆』、『黃強』、『林積』,全部都有來呢個party,譁!嗰晚悶到嘔,搵金剛同陳敏之做司儀,成晚猛講無線啲劇集,好多大哥食到第三道菜都已經離席。」 洗米華屬14K,以前跟澳門猛人崩牙駒搵食,現時掌管「太陽城」賭廳;而和合圖掙爆代表「海王會」賭廳,他近年夥拍
連超,二人在賭廳合作,互惠搵食。至於「大衞會」的黃強及「國際會」的林積與水房關係密切。 「我哋班人,初初聽到話見到曾蔭權有來,我仲以為吹水,因為連崔世安(澳門特首)都冇嚟,有乜理由曾蔭權嚟?點知原來係真,我哋立刻都吹水話好榮幸,好似升咗呢嘛!」阿成笑著說。 有傳媒拍攝到,當晚曾蔭權出席晚宴,同坐主家席上的,還有本地富豪「細劉」劉鑾鴻及何柱國,另外還有澳門賽馬會董事總經理、花名飛仔強的李志強。 「其實飛仔強本身就係我哋呢班廳主出身,近年泊咗四太碼頭,而家勁啦,同香港特首坐主家席,可能下次我都得。」阿成不忘暗踩曾有失身份,出席這種江湖人物派對。

高官現賭廳 推動國內投資
不過這班賭廳廳主表示,其實曾蔭權出席賭廳春茗,「意味深長」。 「澳門執法部門冇香港咁有效率,所以大陸高官到澳門賭場玩及洗黑錢,已經係半公開秘密。呢次賭廳春茗有政要人物出席,可能有人想借佢過橋,等班大陸客誤以 為賭廳後面有政府高官照住,等班大陸客睇見,可以安心億億聲咁抬錢過來賭廳洗。」阿成說,內地人非常接受這一套「關係」:「總之如果有高官到訪過,或者係 咁意提過隻字咁,就會令啲大陸客覺得呢度穩陣,因為同高官有關係,甚至穿鑿附會話高官就係幕後老細,有人撐腰,我哋班廳主覺得呢招夠絕呀!」他說,「勵盈 會」近年積極擴張,致力吸納更多大陸商家及高官成為會員。 「你睇佢開啲廳,全部名唔係西湖廳,就杭州廳、全部大陸名,晚晚賭枱都係大陸大粒佬,枱面啲全部大碼就知啦……」阿成越說越激動。 本刊就是次事件,向特首辦公室查詢,特首辦回覆指曾蔭權與太太上週末到澳門,純為休假及掃墓,屬私人活動,其間並沒涉足賭場。 回覆指,上週六晚曾蔭權與太太出席賭廳晚宴,目的是觀看當晚歌星費玉清表演,入座後因為有記者拍攝,為免影響觀眾,所以才提早離場。

攀附富豪 攞盡著數
傳媒披露,曾蔭權一行是次過澳門,是乘搭三艘共四億元的超級豪華遊艇往返香港澳門,有指兩艘分別屬於「細劉」及何柱國。 曾不避嫌與富豪出出入入,令政、商界人士為之側目。一名曾與曾蔭權同船的舊下屬就向本刊透露,曾蔭權一向愛與城中富豪打交道,為人貪小便宜。 特首辦回覆,指是次特首伉儷往返澳門,是由曾特首自付船費,但該名下屬立即踢爆:「呢種豪華遊艇來回香港澳門一轉,齋油錢都過十萬,佢俾番幾多錢船費?」 他續稱,曾蔭權已多次乘坐富豪遊艇:「其實呢幾隻船差不多每逢週末都出海,曾蔭權自己經常坐,連佢細妹細佬都上過遊艇出海玩。佢一上到船,可能輕鬆啦,完全唔似特首,最鍾意腳印印……」 他透露,曾蔭權除了喜歡坐遊艇,每逢外訪或到外國遊玩,都會在外地住進城中富豪的海外別墅。
「有一次佢去加拿大,咪住咗本地超級富豪的豪華大宅,佢貪小便宜,官場內外無人不知。」

傚法親弟鋪路入商界
是次去澳門出席江湖夜宴,全程傍住曾蔭權是細劉劉鑾鴻,令外界質疑曾蔭權與商界關係。 其實曾○七年競選連任特首時,大劉劉鑾雄及細劉劉鑾鴻便合共捐出十五萬元給曾作為競選經費,而今次曾夫婦又與細劉夫婦同遊澳門,顯見他們之間交情非淺。 曾愛群富豪出入,不外乎為他半年後退任特首的日子打算。他的親弟,前警隊一哥曾蔭培,於○三年十二月退休後,領取了過千萬元退休金及享受逾一年假期後,一滿六個月的就業禁制期,即走馬上任鄭裕彤旗下的新創建集團任執行董事,年薪三百萬,另加董事袍金。 當時,社會輿論譁然,今次曾蔭權傚法親弟,急不及待鋪路,準備替富豪「做好另一份工」。 ####

PermaLink: https://articles.zkiz.com/?id=31427

Next Page

ZKIZ Archives @ 2019