ZKIZ Archives


大橋費用高 左丁山

2012-02-09  AD

發展局局長林鄭月娥果然係硬將一名,把口好打得,聲言以後啲官地招標時,一定不賤價賣地,賣唔出(即流標)嘅 話,情願考慮將啲地用來起公屋或居屋,都唔益地產發展商。其實冇話益唔益嘅啫,發展商睇淡嘅話,標價自然低,無志在必得嘅決心,即係話投到有得諗,投唔到 都冇所謂,既然如此,政府用嚟起居屋或公屋,好呀,好到極,足以證明特區政府決心維持高地價政策,具托市作用。不過娥姐係唔係講得出做得到呀?如有九肚山 或歌賦山豪宅地投標賣唔去嘅話,娥姐肯轉作公屋用地嘅話,好多人願意選佢做特首,佢最好在 2017年參選。
娥姐之硬淨作風,不少人領教過,例如 最近港珠澳大橋連接人工島一段工程,招標流標,建造業界就被召到政府談話,聲言佢地嘅投標價太高,政府不能接受,要重新嚟過,務請減價咁話。政府賣地,價 錢要高,入標價低,情願唔賣;政府工程招標,價錢要低,入標價高得滯就推倒重來,重新招標。官員訓話之後,仲立即向相屬傳媒放風,話價錢高係盧婆婆申請司 法覆核之後遺症,與政府規劃程序無關,傳媒又搵唔到投標者問個究竟,事實上即使搵到,有份投標嘅承建商又點敢講說話呢?故此報章上只刊載官員放風之言。

 

做咁大工程,香港本地建築公司在財力上與技術上皆有所不逮,根本唔敢落標。上星期在馬場遇 到一位建造界人士,佢話現時最大嘅基建工程只有法資、澳資、英資與國企膽敢落標,本地建造商情願做吓馬路維修、屋宇維修就算咯,因此可以落標嘅公司只有三 幾間,大家嘅落標價錢不會相差太遠,好難有一間突然平幾十億元嘅,因為大家都知道香港缺乏工人,工資高,建築材料價格係公開嘅,同行個個識計數,百幾億工 程費用,幾個投標者嘅落標價格差距在十億元以內。目前香港有所謂十大基建上馬,扯得工人與材料好緊,娥姐手下個個緊張到極,驚住啲工程會 delay及 cost overrun。難得娥姐仲要去為一個 99.9%香港人未見過嘅何東花園講保育,可能涉及數以十億元計嘅賠償!一邊 㩒住建造商為工程費用慳番十幾二十億啫,另一邊就講緊可能賠幾十億元俾人(但業主話咗唔想要政府錢,只想有發展重建權利),建造商真係想喊幾聲。

PermaLink: https://articles.zkiz.com/?id=31185

Next Page

ZKIZ Archives @ 2019