ZKIZ Archives


人人做信用卡達人!一個網頁格盡碌卡優惠

1 : GS(14)@2016-09-14 05:46:09

■劉尹琪表示,香港公司主力做市場推廣、營銷、業務發展;技術則由新加坡總部支援。 陳海威攝



【本報訊】香港人最鍾意賺盡信用卡優惠,更因此催生「信用卡達人」出現,教人點玩先玩得精明。來自新加坡的GoBear,睇準香港理財產品格價市場有得做,最新大舉進軍香港市場。「香港人用信用卡用到好出神入化,對佢哋來講,最重要係計飛行里數。」GoBear香港舵手劉尹琪,真人貌似大台力捧的新晉花旦李佳芯(Ali),她指平台主打信用卡獎賞計數機,格盡香港絕大部份信用卡,邊張儲里數最快一眼睇晒。
GoBear去年3月首先於新加坡推出,其後先後打入泰國、馬來西亞、菲律賓市場,至三個月前亦已於香港埋班,本月正式推出。事實上,本港坊間亦有其他格價平台,被問到GoBear有何過人之處,劉尹琪指,「我畀個例子,其他平台會話畀你聽,每張卡1蚊儲到幾多分,但我哋覺得可以更『個人化』,我哋個計數機,會問你使幾多錢喺海外消費、外出用饍等,因為唔同卡唔同消費類別,儲分都會有影響。」她表示,用戶毋須登記或提供資料,「一開個網頁就用得」,只需輸入消費預算,即可利用計數機,比較不同信用卡可獲的獎賞。外界不同類型的產品格價、評價平台,不時都會被質疑排名造假。劉尹琪強調,公司所有搜尋結果保證中立及客觀,資料來源亦為公開資訊,平台不會推薦個別供應商或計劃,「所有排位都係根據你自己設定,以信用卡為例,可以按獎賞、優惠等方式。」她解釋,公司不收回佣,收入來源基本與一般廣告無分別,如向產品供應商收取每點擊付費(Pay-per-click),「或者有用戶經我哋網站,連結去發卡行填咗張表,咁我哋都會有收入,但張卡批唔批就係銀行決定。」除信用卡市場外,GoBear亦於香港推出旅遊保險及私人貸款格價服務,目前平台覆蓋90張信用卡、70個旅遊保險計劃及20個私人貸款計劃。劉尹琪表示,公司目標成為理財產品界的Trip Advisor,網站亦予用戶為個別產品留低評價,「好似新加坡咁,買保險嘅用戶特別active,啲人就會留言話claim錢時有咩難處等。」她又表示,未來平台計劃於本港擴張,目標進一步推出按揭、定存息、外滙、車險、醫療保險比較服務。記者:倪敏慧




來源: http://hk.apple.nextmedia.com/financeestate/art/20160914/19769808
PermaLink: https://articles.zkiz.com/?id=308996

Next Page

ZKIZ Archives @ 2019