邊班港女咁巴閉？卡娃兒指數鍊贏㗎妹
1 :
GS(14)@2016-08-09 07:33:04四個年齡平均17歲嘅女仔，係今年出道嘅組合Ariel Project。
之前討論區有個post「有個香港女仔贏咗日本偶像票選冠軍」，到底呢個女仔有咩來頭？《蘋果動搞作》就搵咗佢出嚟做訪問，睇下佢有憑咩錬贏一眾日本偶像！採訪：倩宜 攝影：Neo、吉吉佢叫Aoi，係今年先成立組合Ariel Project成員之一，佢哋係主打日系活動嘅女團路線，四個女仔平均年齡只有17歲。講到佢之前喺日本贏咗嗰個比賽嘅賽制，Aoi話：「有十幾隊偶像團隊參加，每隊派一個成員，公司就派咗我代表Ariel Project出賽。賽制係fans可以透過佢個app去投心心，而啲心心就每20分鐘會免費回復一個，或者可以用錢買心心，贏出嘅頭三位偶像，就可以喺澀谷Modi外面嘅大屏幕出現15秒，為期一星期。」哦！即係鬥多fans同鬥呃like啦！咁你有咩個人之處可以贏到？又有咩呃like招數呀？Aoi搞笑咁話：「我個人技係扮狗吠。其實要講有咩個人之處就唔敢，但可能fans睇到我嘅努力，所以就支持我。」其實除咗Aoi之外，另一個成員Hinako亦都喺日本贏咗個浴衣品牌比賽，之前亦都去咗日本拍廣告。由於熱愛日本文化，所以佢四個就以日系女團呢條路線出發，唱嘅都係日文歌為主，早前佢哋仲搵咗AKB48其中一位排老師，幫佢哋首新歌排舞。依家佢哋每個月都會有公演，仲已經儲咗班固定嘅fans。問到佢哋覺得香港同日本組合有咩唔同？佢哋話：「反而覺得最大分別唔係喺表演上，而係佢哋嘅fans應援嘅方式唔同，日本fans有自己一套應援嘅方式，叫call/ mix。」講到未來目標，佢四個都話短期內希望每次演出都會爆滿：「香港當然係想去紅館表演，日本嘅話，大家都係一致想去巨蛋。」
呃like招數就係靠自拍。
四個女仔自拍梗係要爭下位啦！
佢就係錬贏其他日本偶像，贏咗第一名嘅Aoi。
佢係娃娃音Seina。
佢係Nanami。
佢係Hinako。
Aoi登上澀谷Modi大屏幕嘅一刻。
Hinako之前都贏咗個日本浴衣比賽。
來源:
http://hk.apple.nextmedia.com/entertainment/art/20160809/19729208