📖 ZKIZ Archives

公立大學莫財 左丁山

2012-01-04  AD

教授 L假期傳來電郵，回應左丁山電子書未必啱用，左丁山講嘅係電子教科書，與一般電子書唔同，當前時興下載電子書到 iPad、 Kindle，左丁山就仍然喜歡拎住本印刷文字本嚟讀。上星期知道牛津大學出版社為董橋社長慶祝七十歲生辰，特別出版一本《董橋七十》，淨係睇書本封面設 計之古雅，已經令人讚嘆，如此書本，係要用手把玩欣賞至啱嘅，下載落 iPad，已經失去一份優質情懷。
牛津大學出版社出書夠多，質料夠好，每年 為牛津大學帶來大量額外收益，雖則話財政獨立，但牛津大學與劍橋大學等等英國公立大學飽受政府財困，連年削資之苦，要諗盡辦法捐錢，搵富豪捐款，搵校友回 饋，牛津大學出版社既是能生蛋的金鵝，牛津大學本部豈會放過，故此要出版社上繳，冇得走雞。做出版社賺錢不易，牛津做得耐，算係經驗好豐富，究其原因當與 質量好這塊金漆招牌有關。某日碰到一位消息人士，佢話全世界任何國家都歡迎，甚至送埋錢去請牛津到當地出版教科書，只有一個城市唔高興，邊個呢？咪係我地 香港囉，特區政府教育局將啲教科書出版商當係壟斷商人，要亂棍打死。在偉大教育局官員心目中，包括牛津在內嘅書商都係唔應該賺錢嘅！

 

牛津大學呻窮，美國公立大學亦然。教授 L再傳嚟一篇報導，講美國最 top之州立大學（柏克萊、 UCLA、北卡羅連納、密芝根、維珍尼亞）備受公共財赤折磨，柏克萊校園現在只有一個除草工人，建築物天花漏水，教授唔夠枱頭電話用，字紙籮一個星期清一 次，電郵系統隨時「灣」，每班學生人數不斷增加，一啲受歡迎科目嘅候補學生人數與上課人數一樣咁多，搞到學生唔能夠修齊必需學分如期畢業。原因係乜？加州 政府嘅資助佔柏克萊營運預算嘅比例由 1991年嘅 47%下降至去年嘅 11%！州政府冇錢俾，柏克萊係惟有裁員加學費，搵私人募捐，增收國際學生，與非加州美國學生（學費貴三倍），但教授削減薪水，逐漸難與史丹頓哈佛競爭。 長此落去怎麼辦？高質素公共大學教育逐漸消失囉！香港有議員指責本地大學賺錢，唔該佢哋眼光睇遠啲。

PermaLink: https://articles.zkiz.com/?id=30447
Next Page
ZKIZ Archives @ 2019