ZKIZ Archives


鍾意一日冚包散 嗜飲Dry Martini星爺想演八爪魚 俾小豬截糊

1 : GS(14)@2016-01-20 17:48:44

■星爺日前接受本報訪問,繼續發揮冇厘頭本色。攝影:陳志嵐



【《蘋果》專訪】周星馳的電影對白啜核,招數一大堆,「淫賤不能移」、「含笑半步釘」、「一日冚包散」,更有「Dry Martini」。日前星爺接受本報訪問,玩「人人問星爺」公開他最喜歡自己作品中的妙藥及飲料。今個賀歲檔,星爺新片《美人魚》延續爆笑風格,他透露今次原本想演八爪魚,可惜最終被羅志祥(小豬)搶走角色。撰文:何永寧


相隔3年,星爺周星馳再有新作,叫一班影迷非常期待,他的經典對白永不過時,本報讀者更透過「人人問星爺」來挑戰星爺,考考他爆笑對白來自哪一套戲!星爺多套戲內均會點Dry Martini,他承認:「其實我幾鍾意飲!」至於眾多作品中最愛哪種搞笑妙藥?他說:「《唐伯虎點秋香》嘅一日冚包散,最有意境!」



■大多星爺作品中都會出現一位「如花」,《美人魚》又豈會例外?劇照

■星女郎張雨綺拋胸上陣。


■星爺最想演的八爪魚,最終讓給小豬(圖)演。

「人破壞緊地球」

星爺自從08年自導自演電影《長江7號》後,就專注幕後,他日前在尖沙嘴一酒店接受本報訪問時表示,不排除再演出幕前,星爺說:「如果有啲角色我有興趣,當然有可能。第一自己本身幕後興趣大好多,又冇乜人搵我拍戲。唯一想做《美人魚》入面條八爪魚,又俾小豬做埋。因為佢唔使着衫,又唔使着褲,其實衫褲都唔使着,不過要花好多時間去化妝。我有好多嘢都未做過,好似八爪魚咁。坦白講吖,我問小豬『你做唔做先』,我諗住如果佢唔做就我就做,點知佢做,咁咪冇囉。」



星爺又大談拍《美人魚》用意,不過第一個問題前後不到10秒,他就打倒剛才的自己,他說:「今次《美人魚》同以往有啲唔同嘅,係一個童話故事,其實又真係冇乜唔一樣喎,最後都係愛情故事,但係今次擺喺現代環境,唔多唔少會加加減減,一個現實同超現實嘅結合。」拍《美人魚》緣起是星爺很喜歡童話,相信好人有好報:「我鍾意童話,其實我拍親都係童話,童話裏面一定有呢個世界係好美好嘅大原則,我信呢樣嘢,所以我拍嘅都有呢啲嘢喺度。」提到將童話故事題材改成電影上映,星爺目的是帶出一個環保訊息,他說:「同環保有啲關係,係一個地球嘅故事,點解要拍美人魚?基本上係一個愛情故事,但要再複雜啲,係一個異類物種交叉戀愛嘅故事。唔係人同人嘅戀愛,係人同一種未知物種,又唔係魚喎,佢(美人魚)係半人半魚。咁你假設真係有呢種生物嘅時候,係咪可以戀愛呢?當然你係歌頌戀愛偉大,你可以話呢個愛情,係超越所有界限,異類物種都可以發生嘅。係講戀愛之外,當人類破壞緊地球環境,想企喺唔係人類嗰邊去睇,從其他物種角度,去睇人類做緊啲乜嘢。」



【《唐伯虎點秋香》】■華夫人最強的毒藥為一日冚包散。

【《國產凌凌漆》】■凌凌漆(左)最愛飲Dry Martini。



又演又導嗌辛苦

星爺自言希望透過一個娛樂性的電影,帶出訊息等觀眾感受。雖然星爺很久沒有演出電影,但他想發揮的表達方式,會在不同演員上出現,就如上一套電影《西遊.降魔篇》中演孫悟空的黃渤,就是自己的化身:「又導又演兼顧到,不過好辛苦。雖然我冇演出,但我將好多我自己嘅諗法,擺咗喺其他演員上面,我覺得都好有趣。」場地:馬哥孛羅香港酒店





來源: http://hk.apple.nextmedia.com/entertainment/art/20160120/19458552
PermaLink: https://articles.zkiz.com/?id=294632

Next Page

ZKIZ Archives @ 2019