【炒股駐顏？】周大姐今年76歲：六個仔女我養大晒
1 :
GS(14)@2016-05-08 14:41:29平時經常在蘋果財經版出現的星級散戶周大姐，睇個樣就知道係一個好福氣，原來她今年已經76歲，有6個仔女，十幾個孫，好多都已經讀緊大學，認真兒孫滿堂！周大姐話，從來都唔教仔女炒股，廢事教壞佢地咁話。而家個個仔女都唔煙唔賭，錫到佢地燶！班子子孫孫得閒仲會請周大姐飲茶，塞返一千幾百畀佢做零用錢，氹得佢老人家好歡喜！仔女唔炒股，咁又會唔會唔鍾意周大姐成日去股票行呢？周大姐就話，佢地反而鍾意她去坐下，證明佢行得走得，留係屋企仲令佢地擔心。「老人家炒股有咩所謂，總之佢唔連累你，唔攞你錢咪OK囉！」俗語有話，相見好同住難，雖然周大姐同仔女感情好好，但因生活習慣太不同，老人家要早起身，早食飯，夜晚7點幾就瞓教，7點幾佢地都未放工食飯，所以分開住相處仲好。至於母親節點樣慶祝，周大姐話有啲仔女已經俾咗錢佢買野，有啲就約咗佢星期日食母親節大餐。其實一講起仔女，周大姐就拎住個電話起勢同記者講，啲孫幾靚仔幾乖，個樣勁冧勁開心。所以話，仔女永遠都係媽媽心裏面一塊肉，你有幾錫佢，佢個幸福樣無得呃既！
來源:
http://hk.apple.nextmedia.com/financeestate/art/20160508/19602976