ZKIZ Archives


心水特首曾俊華

1 : GS(14)@2016-03-01 18:10:34

【本報訊】2017年香港選特首,政壇官場將風起雲湧。劉夢熊曾為梁振英助選,熟悉特首選舉潛規則,早前與《蘋果》大談下屆特首心水,大讚曾俊華為人包容及有原則,點名支持他做特首,有利紓緩中港關係,又自誇早於2013年已提點對方要有思想準備選特首,其次則會選曾鈺成,聲言:「CY連任機會係零!」



「CY連任機會係零」

劉夢熊批評梁振英梁無視一國兩制,只聽命於中央,與左中右派均不咬弦,指前年梁振英曾下令各司長局長不得出席自由黨20周年黨慶,又揶揄梁政改時做離岸特首,近日李波事件則做縮頭烏龜。劉夢熊聲言「CY連任機會係零」,形容他「一係唔出聲,一出聲就言不及義,講咩叫『李波自己提多啲資料』,佢俾人綁架咗吖嘛!點提供多啲資料?」劉對曾俊華看高一線,認為曾若得中央祝福便會參選。劉認為「香港仔」曾俊華當選有其獨特優勢,指:「有乜閃失,社會就會話係港人治港失誤,唔關阿爺事,唔入阿爺數。曾俊華擺明係香港仔啦,唔會係地下黨員啦,唔係根正苗紅啦,你哋自己唔爭氣咋喎,唔好賴阿爺!」至於第二位心水人選,劉夢熊則支持曾鈺成,但對方已明言不參選,他大讚曾「如果佢願意去馬,唔只做no.2,做no.1都有之」,讚賞曾鈺成近年「較多講人話」。劉亦指林鄭月娥本來呼聲甚高,但政改一役後已大失民心,政治資本一鋪清袋。劉夢熊又點評「黑馬」梁錦松,形容他背景紅,其妻是「國寶」伏明霞,笑言:「曾俊華係灰帽子,梁振英就係紅帽子,而梁錦松係粉紅帽子。」劉夢熊估計梁錦松本有意選特首,但自從去年習近平與曾俊華握手後便轉歸沉靜。劉夢熊另指馬時亨早年稱腦生瘤辭官,現時卻出任港鐵主席,真假莫辨,加上他與中央關係非密切,感覺「蝕底」。至於葉劉淑儀,劉夢熊直言她只屬陪跑,狠批她缺乏能力,過份機會主義,人云亦云,早前稱如果是公安捉走李波會「做得乾淨啲」,他嘲笑葉劉淑儀「成日講嘢唔經大腦」。



劉夢熊下屆特首心水



梁振英【不能連任】

予人感覺西環治港,思維狹隘,崇尚鬥爭哲學,與左中右派均不咬弦,令立法行政間矛盾加劇




曾俊華【最有機會當選】

感覺「香港仔」,若當選有利擔任中港間的防火牆,性格包容,較少捲入政治爭拗,左中右派均接受




曾鈺成【大機會當選】

開明建制派,左派老大哥,議事堂上表現理想,對佔中普選均持平客觀,政治論述水平高




梁錦松【中等】

背景較紅,曾出任財政司司長,但得知中央有意找曾俊華出任特首後便轉歸沉靜




林鄭月娥【中等】

素來好打得,但主管政改時明知中央底牌是一錘定音,卻說有商有量,違背良知欺騙港人,民望插水




馬時亨【中等】

於商界長袖善舞,但當年稱腦生瘤辭官現卻任港鐵主席,感覺當年或是跳船逃生,與中央關係亦非親密




葉劉淑儀【甚微】

理念、政綱、能力都不理想,機會主義,沒有獨立思想





來源: http://hk.apple.nextmedia.com/news/art/20160301/19511561
PermaLink: https://articles.zkiz.com/?id=296390

Next Page

ZKIZ Archives @ 2019