📖 ZKIZ Archives

未知幾時先上到市（馬雲話唔重要喎）嘅阿里巴巴，曝光率及宣傳積極度，絕對拋離一眾上市公司。呢頭來香港攞完科大榮譽博士，馬雲嗰頭已飛返杭州總部，統籌愈來愈重頭嘅「光棍節」。佢先喺二百幾個中外記者前面扮「路過」，吊吓癮，第二日再企定定，發放金句，每晚仲安排記者喺半夜到交易大堂睇數據。

呢個交易廳，嘩！乜成個證券交易所咁嘅？成幅牆咁大嘅熒幕，最顯眼係中國地圖，仲有世界地圖（用來凸顯阿里幾咁國際化），前面幾十部電腦，即時將各大城市嘅交易數據，傳送上大熒幕。明明只係整合數據，但搞到好似打仗咁。每突破一個紀錄，就全場歡呼拍掌，小宗置身其中，仲以為喺美國太空總署，慶祝火箭升空添！做騷咁做，幸好網民俾足面，創下超過三百五十億元嘅交易額。當中，最好賣係小米手機，第二位係海爾電器，第三係賣野外服裝及用品嘅品牌駱駝（Camel）。原來，呢個咁有氣氛嘅交易大廳，係專門為今年光棍節打造嘅。馬雲為搞上市，多次來香港斡旋。唔知個靈感，又係咪來自港交所嘅交易大堂呢？

邊個「朵」響啲？

「Roadshow女」梁慧恩（Viann）日前開甜品鋪，被封為「榴槤女王」，背後傍住嘅，當然係佢富二代老公林忠澤。林忠澤嘅「朵」，一向係「林忠豪堂弟」，最近佢自己要求「轉朵」，並揭開另一身份為「楊耀松之外孫」喎。好嘞，秤一秤，咁究竟係「超級首富李嘉誠嘅老婆嘅姐妹嘅仔嘅堂弟」勁啲？定係「工廈大王楊耀松嘅長女嘅大仔」勁啲呢？論長，前者勝；論「有親」，就一定後者贏。正所謂人走茶涼，忽然轉「朵」，莫非因誠哥撤資，喺香港嘅影響力不及從前？小宗多口問楊耀松嘅大仔楊國佳，佢笑笑口咁話：「無咩嘅，伯爺保佑，近年『輕輕』將工廈個價推高幾倍之嘛！」哦，明晒啦！

揸住「689」

「689」，真係人見人憎，車牌有呢三隻字，要小心被人劃花架車囉。小宗查過運輸署，市面至少有「689」、「MR689」同「FU689」等車牌。前者持有人為正當人家，家住馬鞍山；「MR689」，即係「689先生」，車主竟然係前藝人陳秀雯！而「FU689」，車主原來係前新田鄉委會主席文富穩。「F」「U」？莫非意有所指？

Give me a break：試酒最多三款

飲紅酒嘅禮儀大家聽得多，女士飲酒之前印一印唇膏、斟酒只斟半滿、揸杯要揸酒杯底；呢啲，已成為常識。年尾仲有大堆品酒會、紅酒展，有更多禮儀要遵守。認證葡萄酒專家李健國教路，「酒客」最忌貪心樣樣試，「最多試三款，之後人嘅味覺就會開始麻木，要諗定來試。」他指，還要揀不同酒莊嘅出品，每樣試一款，已可比較優劣。而試酒次序應該由新至舊、苦至甜、及氣泡酒至紅酒來開始。現時「新世界」的紅酒興起，產自智利、澳洲及南非嘅，值得一試。李健國話，行酒展仲要有「態度」，唔好試完即刻走人，最好聽埋人哋講解，自己都要問一、兩個問題，同人交流吓，以顯示閣下並非純粹「貪飲」。唔識紅酒唔緊要，但千祈唔好扮好熟，「有內地人對住支酒係咁講『very nice、不錯』，我試飲吓啦，壞咗嘅。」李健國說。不過，小宗認為仲有一項十分重要，就係要量力而為，唔好飲到連直線都行唔到，跌到一仆一碌。

本週圖片：俾條路我行吖，局長！

講開車，將軍澳環保大道出九龍，左右兩條行車線，右邊有架工程車塞死，亮起燈號，叫人靠左行；左邊有架灑水車亮起燈號叫人靠右駛；成條路俾晒你都得啦！灑水車美其名清潔路面，實則製造污染。啲水同路面泥塵混合，條路變成泥漿；架車駛過，仲慘過玩泥漿摔角。黃錦星局長如果想體味一下點解將軍澳民憤咁大，唔該佢揸架車落嚟行一圈，唔好再亂咁閉門造車啦，OK？

金牙大狀講嘢

林煥光官癮未除常言有道，官字兩個口；林煥光成世人淨係識得做官，而佢兩個口講嘢之本事，更加係登峰造極，即使同樣成世做官之葉劉拍馬都追佢唔上。最初佢話基於保密制，行會成員唔可以隨便表達佢個人對發牌嘅意見。跟手就話已經盡咗最大努力，但冇辦法說服「一男子」唔好三揀二。咪以為到此佢已經冇嘢講噃，因為佢又即刻發表「茶餐廳論」，以驗證踢王維基出局，係行會經過深思熟慮嘅決定。不過咁唔等於佢就此收嗲噃，因為佢隨即又話「一男子」要為發牌事件「深切檢討」。及至《大公報》社論重炮轟佢啦，佢又再講嘢，話自己唔係針對「一男子」。佢究竟想點呢？係想劈炮抑或想攞彩呢？可能兩樣都唔係，只不過官癮未除，慣咗兩把口講嘢，大家幸勿表錯情也。