【浪迹遊蹤】三萬尺高空 可以請空姐幫忙的7件事
1 :
GS(14)@2015-11-02 14:56:42我怕此post一出，從此被空姐仇視。人在三萬尺高空，困在狹窄的機艙和更狹窄的座位，其實幾無助。不過有些事，你還是可以放膽㩒着頭頂嗰盞召喚空姐的燈，禮貌周周地要求。1)醫療用品：一般客機上都有基本藥物及急救用具可以提供予有需要乘客，（部份航空公司更可能連紓緩宿醉的藥都有）。至於界親手呢啲小事，舉手吧。2)調位：前題是有合理原因，如覺得鄰座乘客騷擾或扯晒鼻鼾，禮貌地問問空姐可否調位，如有空位一般都可以安排。3)飛機餐、小食、飲品：航空公司一般會預備比乘客人數更多的飛機餐，如食完一個唔夠飽，有剩餘飛機餐的話一般都不會吝嗇俾埋你食。而搭長途機時，半夜夜欄人靜瞓唔着睇戲睇到肚餓，亦可嘗試問問有無杯麵一類的小食。不過，空姐其實幾怕人食杯麵，香氣飄滿機艙，唔知有幾多人舉手要麵。4)遺囑：呢項真係無諗過，例如當心臟病發想起自己仲未立遺囑好好分配銀行戶口剩低嗰＄28.4，機師有資格可作為遺囑見證人令你放心。5)參觀駕駛艙：講明，呢項並非每間航空公司都可以要求的，在起飛前或降落後可問問空姐是否可以進入駕駛艙參觀，一般降落後會比較方便。如英國航空其中一間有機會可參觀的航空公司。6)個人護理或衞生用品：濕紙巾、梳、潤膚液、牙刷、牙膏、耳塞、襪......有需要就問啦。7)兒童玩具及暫託：相信唔少人都最怕搭長途機遇着小朋友，十幾個鐘總是喊不停或叫不停，令人煩躁。部份航空公司會預備一些如布偶一類的小玩具可送給小朋友，希望哄到佢地係呢程機聽聽話話醒醒定定。如果隻身帶住隻化骨龍上路又人有三急，亦可以請空姐幫忙暫時照顧個細路。不過，如果你搭的是廉航，以上所講的，除咗某幾項，請當無講過。資料來源：英國每日郵報記者：曾冠輝
來源:
http://hk.apple.nextmedia.com/su ... t/20151102/19356313