低調富豪楊建文 關慧玲
1 :
GS(14)@2015-09-19 20:38:49http://eastweek.my-magazine.me/index.php?aid=45814
城大獲得歷來最大一筆捐款，得到伯恩光學始創人楊建文豪捐二億。說城大行好運，因為成件事幾個月就水到渠成。
原來城大籌款委員會成員陳漢彬有次同校長講，有位低調富豪想了解城大發展，校長就連同幾位高層帶佢喺校園到處逛，解釋城大辦學理念，當然亦有介紹獸醫學院，楊建文聽完覺得甚好，下次見面時已帶了支票在身，大筆一揮，然後交給校長，校長一睇咁大數額，感激之餘卻又擔心太倉卒，請楊建文思量幾天再確定。
幾天過後，楊建文親自打來，說﹕「答應了捐錢，心事未了，不安哪。」就這樣成就了一件大事。有旁觀者便笑說，眼見校長不是第一時間收下支票，個心其實七上八落。
這是楊建文第一次向本地大學作出捐款，事後城大問陳漢彬，怎麼從前不見他提這位隱形富豪，他才道出二人並不熟稔，只是有機會見到貴人推銷下城大，怎知他很有興趣，他亦估不到會咁快成事。
筆者在捐款儀式上問過這位富豪，何解看上城大？誰知他竟一臉不好意思，掩面說自己做的不夠多，「人家畢菲特捐全副身家，我不過捐兩億咋。」他說欣賞城大有辦第一所獸醫學院的魄力，也覺得錢用到學生交流身上有好處。
城大捐贈儀式當晚係葉澍堃生日，但為了楊建文，他生日飯也不吃都要和小母牛一眾委員到賀。
楊建文喺內地廠房有超過十萬名員工，係全球最大的手機玻璃面板、觸控屏和供應瑞士著名手表用之藍寶石表面製造商，據說佢盤生意年賺五十億。
創辦內扡扶貧計劃小母牛嘅葉澍堃也在場，佢話兩三年前透過小母牛籌款委員會副主席王庭聰結識楊建文。王庭聰也是惠州廠商，在內地開設毛衫廠，同楊建文等成班惠州廠商十分熟稔。
葉澍堃話楊建文年年都有解囊捐助小母牛，剛過去六月份的籌款晚會他亦即場捐了百多萬，不過佢份人很低調，捐助咁多年都沒有出面，只係今次才露出水面。當晚其實係葉澍堃生日，不過既係楊建文大日子，佢唔食生日飯都要出席賀佢啦。