Torres報小學要澄清？千嬅：怕得失學校
1 :
GS(14)@2015-10-19 07:48:20■千嬅否認為幫兒子搵學校跟老公嗌交，笑言拍真人騷時已經嗌完。
楊千嬅和林海峰（Jan）昨日到尖沙嘴出席新戲《哪一天我們會飛》啟航禮，有份演出的新人游學修、蘇麗珊和吳肇軒着校服唱主題曲。游學修在戲中扮演Jan的年輕版，記者要求兩人合照，由於游學修高過Jan半個頭，Jan要趷高雙腳，游學修就擘大腳相就，場面有趣。問拍這部戲有否回憶中學時光？千嬅自嘲：「自己讀女校，如果嗰時好多人追會改寫自己命運，我唔會考護士，唔會有今日，細個好醜樣頭髮鬈又箍牙又戴粗框粉紅色眼鏡，總之人生最核突三類嘢放晒自己身上，如果Jan見到一定追住我放YouTube，所以當時好難有姻緣。」Jan抵死答：「畀我見到以為撞鬼！」
■林海峰（左）比游學修矮半個頭，合照時要趷高腳「增高」。
■導演黃修平（左起）、監製陳心遙、千嬅和林海峰出席宣傳新戲，希望電影有好成績。
■千嬅（左一）和林海峰（左二）合作的新戲昨舉行啟航禮，在台上放飛機重拾童真。
否認同老公鬧交
此外，有周刊指千嬅和老公丁子高為幫囝囝（Torres）搵學校嗌交，千嬅否認：「唔會，最精采嗰啲喺真人騷鬧晒，我哋唔會為搵學校而鬧交，而且周刊提嘅學校我哋冇報過，我想澄清番呢件事，唔想得失報咗嘅學校，我理念係信條命，所以乜嘢都報晒，攪珠任佢攪。」Jan則笑說：「我相信周刊講佢哋兩公婆有鬧交，其實太太係會緊張，可能先生提出唔太好提議。」另外，《我的少女時代》在港首日開畫票房95萬，早前千嬅的《五個小孩的校長》開畫60萬結果越做越好，千嬅說：「我覺得好好，大家都好青葱，老公睇咗《我》覺得好有情懷，相信大家睇《哪一天我們會飛》會有感動，更加有共鳴。」至於有傳nowTV免費電視開台劇《瑪嘉烈與大衞》搵Jan聲演邵仲衡的心聲，Jan否認：「乜嘢都未聽過喎。」採訪：黃曉妍攝影：陳順禎
來源:
http://hk.apple.nextmedia.com/entertainment/art/20151019/19338397