80’s~90’s經典零食 2015年02月26日
1 :
GS(14)@2015-03-01 10:05:35http://www.am730.com.hk/article-252367
近日發現市面多咗好多復刻版兒時零食，雖然始終同記憶有啲出入，但都勾起77仝人唔少回憶，真係要數一數細路仔嗰時食咩大，估唔到一開口個個爭住講，無奈篇幅有限，就揀咗部分代表，其實認真要數，又點止得十件咁少？！唔知大家最掛住嘅兒時零食係咩呢？
文：77合作社
餅乾朱古力杯
喺「欣欣杯」出現之前好多年，已經有隻類似嘅餅乾朱古力杯，記得當時啲餅乾條長啲、粗啲，就連朱古力都多啲，食晒餅乾，仲有朱古力剩，所以通常會用最後一條餅乾條，撩晒啲朱古力出嚟食，咁就一滴朱古力都無嘥。
串燒
呢隻串燒上面嗰啲沙嗲唔似沙嗲醬料，辣辣哋真係好鬼惹味，試過一買十串，揸住喺手慢慢歎，食晒真係飽到唔使食飯。睇住佢由1毫子賣到5毫子一串，估唔到咁多年後又見番，除咗少咗又貴咗，就係支竹籤無再黐漉漉，衞生咗囉！
可樂罐糖
呢隻迷你可樂罐糖，啲糖當然係可樂味啦！仲整咗個膠蓋掩，拉開嗰陣時，真係好似開可樂咁，啲糖細細粒入口咬幾咬就溶，非常過癮，依家有埋橙汁味，連超市都有得賣。
戒指糖
坦白講，戒指糖嘅設計非常好，唔使成粒含住喺口之外，仲可以戴喺手指度慢慢食，不過本人細個好怕食佢，因為粒糖實在真係好好好大粒，通常食到膩，啲口水流到落隻手度都未食完，所以印象中只有一次成功食晒成粒。
香口珠
小朋友通常唔鍾意薄荷味嘅嘢，所以呢隻果汁味香口珠就啱晒心水，除咗有果汁味，仲有梳打同可樂味，細細粒非常容易入口，試過將20粒倒落口，真係甜到漏！
巨星雪條
雪條簡直就係小朋友喺夏天嘅救星，冰條、孖條係較平價嘅選擇，零用錢多啲可以買穿梭機雪條、西瓜雪條、檸檬茶雪條，但點都唔及得嘉頓嘅巨星雪條令人回味，一支雪條有三種層次，啱晒貪心嘅小朋友，嘉頓不如出復刻版啦！
三粒糖
紅、黃、綠三粒糖，每種顏色一種味道，一咬即碎成粉狀，一排6粒，喺八十年代初賣5毫一排，仲搵咗當年童星唐寧拍廣告，傳聞話四洲都係靠三粒糖起家，當年類似嘅糖仲有吹BB糖，賣相差唔多，不過中間有個窿，可以吹哨子，好食又好玩。
眼鏡朱古力
講起朱古力豆，依家嘅小朋友可能淨係識得「M&M’s」，再早多十年前嘅小朋友可能會知道有「Smarties」(聰明豆)，至於「眼鏡朱古力」，就起碼要三十歲以上嘅人先至會識，最大特色係只要加兩條橡筋，就可以當眼鏡戴。
皮禮士糖
八十年代出世嘅小朋友，邊個唔識皮禮士糖？但絕對唔係因為好味道，而係因為好玩，只要將啲糖入落去個長頸公仔，每次打開個公仔頭，就會有粒糖凸出嚟，不過個可能我粗魯得滯，粒糖成日都卡住，最終係成排糖倒入口食。
吹波糖
呢款吹波糖口感非常之軟，食完個咀唇奉旨黐滿晒粉，不過仲有一款差唔多樣嘅吹波糖更加經典，就係附送印水紙嘅吹波糖，只要將印水紙濕水再貼喺皮膚，就會有個紋身圖案，試過猜皇帝輸咗，要印落塊面度，洗咗好耐先至甩色。