食腦時代 2014年05月22日
1 :
GS(14)@2014-05-28 15:37:04http://www.am730.com.hk/article-208245
長輩成日話做人要勤勤力力同安守本份，但嚟到二十一世紀，正所謂唔怕你奸，最怕你蠢，要做個成功嘅打工仔，一味得個做字已經生存唔到，唔帶腦返工，必定辣㷫老闆。喺你踏出食腦第一步之前，建議最好瞭解自己用開左腦定右腦，雖則兩者分別同發達與否未必有直接關係，但起碼知道自己邊瓣最強，點計都著數啲！
文：77合作社
測試你用左腦定右腦？
早前喺fb瘋傳一個合手方法，測試你係左腦人定右腦人，準唔準就見仁見智，但若果你覺得做一個test唔夠可靠，可以試嚇其他方法，check嚇你究竟用開乜嘢腦。
1. 合手測試
好似祈禱咁，將雙手十指緊扣，如果……
左手手指公壓住右手手指公→右腦人
右手手指公壓住左手手指公→左腦人
2. 問卷test
1.對於平日打扮嘅化妝同髮型，你會：
A.時時轉look B.得閒先試下新嘢
C.幾乎唔變
2.當你要決定一件事嗰陣：
A.憑直覺 B.小事當機立斷，大事認真思考
C.左諗右諗都決定唔到
3.plan旅行計劃嗰陣你會：
A.只要冒險，唔怕危險
B.唔會冒險囉！但會聽下人意見而改下個plan
C.有過可怕旅行經驗，次次都要慎重咁plan下
4.當你睇傳記文學嗰陣你會：
A.心諗：「唔係掛，真㗎？咪玩啦！」
B.情節誇張得滯都會質疑下
C.創作嘅嘢你識咩，梗要全情投入，信到十足
5.如果有人叫你小心某人，你會：
A.都未同佢講過嘢，傾下偈先判斷
B.點都會防一防
C.扮下嘢，但勁防佢
6.睇說明書嗰陣，你會：
A.只睇重要部分
B.逐頁睇，未必每行字睇曬
C.逐粒字睇
7.同朋友睇戲，你會：
A.坐右邊 B.坐左邊
8.學生年代，你擅長：
A.幾何 B.代數
9.當你睇展覽嗰陣：
A.睇咗鍾意嗰啲先 B.跟次序睇
10.玩到興起嗰陣，會唔會唔記得自己要工作？
A.會 B.唔會
1-6題，選A得5分、B得3分、C得1分；7-10題，選A得3分、選B得1分。如果你有30分以上就係右腦人；29分以下就係左腦人。
3. 動作測試
翹手嗰陣，你會……
左手搭右手→右腦人
右手搭左手→左腦人
特徵，普遍嚟講，有用腦嘅人會偏向重用其中一邊腦，而且會直接影響行為同性格。簡單而言，用開左腦嘅人係邏輯型，而用開右腦嘅人就係創意型，兩種人喺做人處事，甚至思考模式都好唔同㗎。
左腦人(邏輯型) - 呢種人嘅邏輯性同分析力會強啲，即係好少蕩失路，搞得掂微積分，而且有語言天份，思想直接，目標為本，識得將複雜嘅嘢簡單化。
鍾意睇真人真事嘅古仔
呢啲人睇完成套《阿凡達》都唔會有感覺，事關喺佢哋思想入面，藍色嗰隻嘢經已唔真實，俾套《鏗鏘集》佢睇先至啱口味。
鍾意睇說明書
各位要分清楚，鍾意睇同睇得明係兩回事，咁各位明白啲老竇點解會霸住本說明書睇，不過睇極都唔識用個電飯煲啦！
好理性
咩叫好理性，即係睇套慘情片，有人會喊苦喊忽，但理性嘅人會諗抵唔抵死，或者覺得件事好簡單，唔明點解搞成咁，呢啲就係理性嘅人。
鍾意狗
唔係因為狗仔可愛活潑，而係忠心，容易捉到路，俗語所講即係你擺下條尾都知你想點，事關佢哋面對「估唔到」嘅事會慌張兼手足無措。
樂評人、鍾意古典音樂
鍾意將唔規律嘅嘢規律化，音樂明明係隨心創作嘅嘢，佢哋就認為4拍4就係4拍4，4拍3就係錯，得把口但唔識創作嘅就係佢哋。
按計劃做事
做嘢有曬step，雖然好似悶啲，不過呢啲男人至係搶手貨，事關佢同你結婚之前已經會諗掂曬擺酒、買樓、生仔，有曬計劃，唔使你操心先啦！
坐到直睇書
我知，依家經已冇乜人睇書，或者轉個角度講，呢類人鍾意坐得四正，去打機、上網、睇片，咁講會唔會易明啲？
做乜都要有根有據
可能會覺得呢類人好煩，不過諗真啲，如果呢類人入立法會就一流，起碼會幫小市民問政府攞納稅人錢做咩？點解要咁做？點解會超支？
右腦人(創意型) - 呢啲人通常缺乏組織能力，好似冇定向風咁，但又估佢唔到咁感性，鍾意睇漫畫多過睇小說，最叻同人溝通，上至特首、下至阿嬸都可以吹水吹足一晚。
浮躁
佢哋浮躁唔係精神有問題，只係佢哋有十萬樣嘢想試想玩，但又能力有限，唔知做邊樣先好，就係咁之嘛！
有創意和藝術感
啲人普遍以為designer就一定有創意同藝術感，咁諗就錯，世界上不知幾多designer抄橋又發咗達，今時今日真係好難定義。
情緒化
唔好以為女人至會咁，男人都一樣會，只係冇擺晌塊面咁明顯，其實反而更加恐怖，唔信？睇下你老闆咪知囉！
神經質
人哋一個動作，一個眼神，都會刺激到佢嘅神經，最鍾意陰謀論，搵呢類人做看更、G4就一流。
用直覺解決問題
右腦人解決問題嘅方法就係隨心，問佢點解佢會話「得㗎喇」，永遠答唔出個邏輯，好彩就搞得掂，唔好彩的話……建議唔好俾佢話事好啲。
鍾意貓
各位又誤會喇！佢哋唔係鍾意貓難以觸摸，而係鍾意隻貓唔使多打理，唔使帶落街行，打亂佢哋自由自在玩嘅時間啫。
唔鍾意睇說明書
佢哋要摸清一件產品嘅運作會比一般人耐，當佢哋搞清楚嘅時候，件產品應該俾佢哋搞壞咗，不過一但佢真係學識，又會比一般人瞭解得多。
鍾意聲音
唔理有節奏定係冇節奏嘅聲音，只要會發聲嘅佢哋都會鍾意，所以多數會做到音樂人。
打工仔食腦sell橋法
唔理好橋定屎橋，sell到老闆就係一條絕世好橋！老生常談，即使條橋幾咁出色、有曬數據back up，九成九幫到公司賺大錢，但你唔識點包裝同sell橋，下場只會得一個字：嘥晒！依家過兩招俾你，出嚟搵食，梗係食腦啦懵炳！好好袋穩喇，終生受用啊細路！
先試水溫
sell橋前，不妨「乍家依」向同事試試水溫，當套下料睇下佢哋預備成點又好，漏啲料佢聽下佢意見都好。咁當然要用下腦，唔係成個plan講佢知啦！點chok同事料？自己諗！
咪怕蝕底
預備工夫做得愈多愈好，千祈咪怕蝕底，所謂能者多勞，多嘢做即係你叻囉！同時都為被ban橋時作兩手準備，有時間做埋個簡潔後備plan，咁就萬無一失啦！
出擊前要望清
視乎老闆心情，笑容滿面陳四萬咁樣，正正係sell橋好時機；相反見佢塊面黑過鑊燶，就梗係避之則吉啦！
主動出擊
醒目嘅，就喺老闆追問前主動sell橋，費事到佢開到口問，就會覺得你辦事不力㗎喇！
Full package
條橋要Full package，集齊數據、好橋背後嘅例證、點幫公司賺錢等等，好老實，作為老闆嘅無非都係緊張盤數，你話俾佢知你為公司帶來幾多利潤，又點會唔buy你呢傻豬！
咪身先士卒
開會時咪做第一個，通常都係講先死先。大家都未warm up，你又可能緊張，老闆又可能未瞓醒，大家思路都未清晰，條橋幾好都未必有人留心聽，嘥晒！
做開心大使
無時無刻都保持笑容，聽嗰個心情都好啲啦！即使俾同事挑你機，都咪發火咁冇品，笑笑口一一解答，贏都贏得靚仔過人！
留意用詞同語氣
個心咁諗：老闆你嘅提議唔work㗎！但把口應該咁講：冇問題！我盡力試下(即使最後都係做唔到)。
睇老闆眉頭眼額
sell橋時睇下老闆眉頭眼額，一見唔對路就搞下gag緩和氣氛。講嘅時候又出啲力，繪影繪聲、投入啲，俾啲信心自己！
適當時擦鞋
老闆梗有啲虛榮感，係鍾意聽啲手下擦下鞋，做細嘅，咪得閒講兩句囉！「我都係邊做邊跟你學嘢咋」「睇下老闆有冇咩天才提議？話曬你食鹽多過我食米！」
被ban咪黑面
萬一被ban橋，切勿據理力爭，儘可能投其所好，如果老闆提出蠢意見，惟有喺佢要求的範圍內作微調，千祈咪一時意氣黑面。
拋浪頭
適當時候大下老闆，即所謂「拋浪頭」，咁當然不能廢拋啦！一陣大佢唔到，俾佢大番轉頭，真係瘀到核爆！