財經CAREFREE - 順叔 中信之本(上) (2012年08月27日)
1 :
GS(14)@2012-08-27 11:41:42http://www.am730.com.hk/article.php?article=118729&d=1829
今期繼續悶，開中信證券(6030)。
早幾年大型國企排隊嚟香港上市，背後搞風搞雨的「造雨人」(Rainmakers)，絕大部分係外資大行，中國土炮投資銀行，好似中金咁，最多掹車邊分嚇蛋糕仔。公司上市最根本目的就係集資，市儈啲講，投行賓架最重要任務，就係揀啱良辰吉日，在市場對某個行業最有興趣的時候，幫公司上市，所以大型國企嚟香港上市，多數都係一堆堆咁嚟，2005年金融改革開快車，國企銀行排隊落嚟，早幾年鐵路投資大熱，中鐵建(1186)同中鐵(390)等又係一堆堆咁上。
咁即係話，投行賓架應好識得選擇上市時機，為客戶帶來最大利益，某行業國企排隊上市，亦往往出現在國家政策最配合發展時機。好喇！輪到大型國控投資銀行自己要上市，理論上，阿公應該有好多政策支持股市發展，股市更應該係最旺最易搵錢的時間，不過啱啱相反，中信證券及海通證券(6837)舊年第三、四季以H股上市，先後撞正大跌市而撻Q，夾硬上市下，集資額大幅縮水，唔知道國產投行特別黑仔，定係班紅色賓架唔係好識判斷市場脈搏？通常一間公司上市，開頭一、兩年點都打腫塊面充肥仔，不過，中信證券都算幾失禮，舊年10月H股上市，2010年賺113億元(人民幣，下同)，2011年叫做增長一成，賺到126億元，不過業績快報指，今年頭半年，純利跌超過兩成，純利22個億左右，A股到今日都水靜鵝飛，中信證券下半年點谷，怕且都要業績倒退。
美國及歐洲的外資投行，賓架出名人工好花紅高，不過有今生冇來世，市旺做到盡食得就食，淡市冇刁，炒人發大信封又唔會手軟，呢個投資銀行的正常生態，在中信證券身上亦睇唔到。
近兩年A股唔識郁，投行證券行得閒到數完手指數腳指，不過作為最大投行最大證券行，中信證券唔單止冇炒人，員工總數仲由2010年底的10,905人，增加到舊年底的13,260人，近七成員工其實係證券經紀，只係做出出入入買買賣賣的粗重功夫，理論上，「投資銀行」部門的賓架，先係為公司搵大錢的「生財之本」，亦係最高人工一班，中信證券H股招股書，冇披露投行賓架數目，但去年年報就講你聽，呢班「生財之本」的「人才」，仍然有743人，佔員工數目超過半成。
2010年，新股上市、批股同埋可換股債券發行，中信證券仲做到41單刁，去年跌到15單，涉及金額，即係承銷佣金收入，由1,374億元，縮水到450億元，投行部門收入由33億元，跌到唔夠20個億。
中信證券去年的「職工費用」，雖然按年大減兩成，到49億元，但如果剔除出售中信建投的影響，降幅僅約一成，估計當中好大部分因證券經紀交易佣金縮水，投行部門仲超高人工養住743個賓架。
中信證券企業融資(Corporate Finance)部，成年只係幫公司做到15單刁，賺唔到20個億，即係743名「高級賓架」，拉均之後，每人一年只係幫公司搵到260萬元，如果在歐、美投行，好可能超過一半要執包袱。
不過呢，呢班高級賓架，絕對唔係一個大信封加個實Q就可以請得走，甚至唔炒得。中信證券同你講，萬三個員工當中，以「專業結構」分析，投行及資產管理兩個「生財之本」大部門，都有七百幾人，做分析員的，亦有233人；以「學歷結構」計，有187個博士，近9,000個有大學學位；以「年齡結構」計，超過9,000人在34歲樓下，好多董事級的高層，都係四十未到的年輕「金融才俊」。
不過，種種結構，都解釋唔到，無論個市幾淡，業績幾差，中信證券都唔可以立亂炒高級賓架現象，因真正的原因，涉及中信證券核心員工的「政治結構」，亦係該公司真正的「生財之本」，下回再續。