📖 ZKIZ Archives

「桃姐」育英才 左丁山

http://hk.apple.nextmedia.com/template/apple_sub/art_main.php?&iss_id=20110928&sec_id=12187389&art_id=15652485&cat_id=255&coln_id=22

少女 O去年考會考得六個 B，可在原校升讀預科，但佢想出外闖天下，唔想考最後一屆高考，問左丁山意見，於是叫佢去咗 Foothill，因申請得遲，十二月先至入學，眨眼間到了放暑假之期，佢在矽谷流連忘返，最近先至回港一行，上星期已經返咗去 Mountain View；留港期間，佢仲記得搵左丁山見吓面，講起近況，佢話最初住在 Google總部附近，後與香港同學合租另一「阿柏文」，近巴士站，上學還算方便。讀成點呀，佢話 GPA有 3.7，申請入（加州大學）應無問題，只怕柏克萊與 UCLA唔收佢。呢，兩間大學太多學生，入到未必係最好，左丁山叫佢試吓申請印第安納州聖母大學（ Notre Dame），雖然係私立大學，但加州大學莫財，州政府大削大學開支，有財困之嘆，學費雜費樣樣不斷加，裁員不斷，教職員與學生嘅士氣當受影響，明年不是入 讀加州大學之適當時機。
點解係聖母大學？鄭大班推薦吖嗎。佢在星期一（九月二十六日）在美國會所參加一個聖母大學推介會，聽講有唔少家長學生報名參加，佢叫埋左丁山出席，但因早已有約，冇去到。
原 來聖母大學商學院（ Mendoza College of Business）嘅院長吳幼仁教授（ Carolyn Woo）來港主持，吳教授生於一九五四年，幼居九龍塘，家中有個錢，但父親堅持女子無才便是德，兩個兒子要讀大學，三個女兒讀完中學就要出外做事，結果吳 教授在九龍塘著名女子書院（恰好與少女 O係校友）讀完書就要停學，點知自小睇住佢大，送佢上學嘅媽姐 FungYau竟然拿出一生積蓄，支持佢去美國讀大學一年！因為爸爸唔肯俾錢，吳教授拿住媽姐金錢去到印第安納州普渡大學（ Purdue），發憤讀書，人地第一個學期修十五學分，佢就修足二十一個學分，卒之勤力有回報，得到獎學金，用完媽姐錢之後，可以繼續留在美國，在普渡讀 完學士、碩士、博士，今日成為著名教授，做到全美本科生商學院排名第一嘅商學院院長，專門研究企業精神，創新科技……最近電影有桃姐故事，估唔到學術界就 有一個真實版本，左丁山睇完佢之 bio，十分感動。

PermaLink: https://articles.zkiz.com/?id=28124
Next Page
ZKIZ Archives @ 2019