笑到最後：小時代咪亂追落後
1 :
GS(14)@2017-05-18 02:13:07港股重上兩萬五，港股大時代之聲再出現。事實上，今年初港股幾次錄得千億成交時，一樣有人高呼港股大時代。但高明懷疑，今次最多只係小時代，唔係大時代。大時代，以2015年光景嚟量度，係成交達兩千億元，兼且股份禾雀亂飛，藍籌唔在講，乜垃圾股都升，仲要越垃圾越升，而且每次港交所（388）都會嘜上一個新高；但今次暫時只係好局部，細價股有疲態，更加可以話，騰訊（700）上300蚊肯定先過港交所，而港交所2月、3月同埋最近5月三度突破都遇到當頭棒喝，實在叫人失望。至於小時代，就同現況一樣，集中炒幾個板塊，藍籌股都唔係隻隻有面畀，大部份有波幅冇升幅。成交則千億都不足，連大時代嘅一半都冇，又點稱為大時代？但個別股份升得太勁，叫做港股小時代都無可厚非。高明親身經歷，今年初騰訊破頂帶動港股，2月嘅時候港交所挾升至198蚊，傳統智慧大牛市必炒港交所，當然衝入場會一會，結果短暫試穿200蚊後急回，第一次博大時代未竟全功。第二次唔心息，3月底見中海油（883）大落後加「島形底」，有機會轉勢，大概8.9蚊梗係博一博，今次情況較好，最多反彈過9.5蚊樓上，如果係大時代，再破10蚊係絕對冇難度。可惜?家唔係，最後又回番落9蚊。兩次博落後，即使遇到反彈，最後都歸於平靜。唔止呢兩隻，其他年初係威係勢嘅資源股、內房股，當日高位冇衝，今日全部特價時段，真正大時代唔係咁。如果有時光機，回到過去追當時已經好貴嘅強勢科技股，未必賺好多，但繼續升唔使煩。兜一大個圈，唔係想陳述事實，而係想話今日環境同幾個月前分別唔大，重覆「落後股繼續落後、強勢股繼續強勢」機會較大，建議唔好立亂追落後。就算出現大時代，強勢股都肯定挾得喪過弱勢股，其他手痕博吓冇所謂，遇上港股小時代，真正火力，應集中幾隻強勢股。
高明
http://www.fb.com/bigricetea本欄逢周一刊出
來源:
http://hk.apple.nextmedia.com/financeestate/art/20170515/20021272