財經CAREFREE - 順叔 誰來買A股(上) (2012年08月23日)
1 :
GS(14)@2012-08-23 12:16:19http://www.am730.com.hk/article.php?article=118142&d=1827
每逢乾溏，好似呢期咁，最好解決方法，就係開大市，內地A股唔識郁，H股都冇運行，講嚇阿公振極唔起的內地股市，順便講嚇啲A股ABC。
話說早排恆生銀行(011)入咗股的興業銀行，建議用50億元(人民幣，下同)，在上海陸家嘴買物業做辦公室，消息傳出冇耐，有個私募基金經理，叫崔軍，發起小股東「維權」活動，寄咗封公開信俾大小傳媒，通知股東，否決呢單磚頭交易，因為興業銀行市值，已經跌破資產淨值，內地股市術語叫做「破淨」，認為興業銀行用50個億，回購公司股票，更有價值咁話。
呢位崔生，行為叫做比較出位，對上一次維權行動，包括在舊年反對招商銀行(3968)的供股大計，仲建議招行，向啱啱入咗股美國銀行的巴郡主席巴菲特出售新股，佢仲特登將入股招行又平又靚的建議書，掟咗俾股神。
至於包括興業銀行在內的內地商業銀行，早一兩年，先排隊完成一個二個的供股批股等行動，啱啱先所謂「擴股增資」，中國銀監會又話，要收緊資本限制，如果興業銀行轉個頭，以真金白銀回購自己股票，可能又俾人唱佢玩泥沙。
不過，對於崔軍的建議，大家又不妨諗嚇，國控企業，又真係好少聽到有回購股份，其他要動用阿公荷包、在淡市中常見的資本市場活動，包括私有化(講緊大股東買返曬啲街貨)、大股東增持等等，亦都相當少見。
中國證監會主席郭樹清，既然日日高呼A股抵買，但殘市中，最自然的購買力，在國企大股東身上唔係咁見到。
阿公下面班國企大股東唔出手，不過又四圍咁撲水搵新水喉射住A股，增加市場購買力新來源的工作，年頭做到依家都未停過。
近排A股最多人注意的開水喉新搞作，叫做「轉融通」，可以簡單理解為做孖展沽空(內地叫做「融資融券」)的中介融資活動。
阿公舊年搞咗間「中國證券金融公司」，證券行要大做孖展沽空生意，要向「中國證券金融公司」借錢，再借俾客仔，故叫做「轉融通」，其實變相由一個壟斷性的國控中介機構，做獨市生意之餘，又做埋監管機構，睇住孖展沽空呢類高危活動。
以阿公睇場的風格，沽空唔會放得太快，孖展可能放手多啲，聽講「中國證券金融公司」就快發債集資，開展「轉融通」業務，從初步集資額，可以約略估計到有幾多新錢，放數俾證券行做孖展生意，既係一條A股新水喉，又可以幫證券公司開多盤新生意。
至於另外一條水喉，打緊打工仔的主意，中國驚國企老總一手都係公司認股權，變得太資本主義、太追逐短期增長，唔係咁多國企央企的高層引入所謂的「股權激勵計劃」。
中證監最近就諮詢緊市場意見，容許上市公司的員工，選擇收股票，以代替部分薪金，上限係三成，交由託管金融機構，在公開市場，買入自己間公司的股票，作為長期持有。
講到可以為股市，帶嚟過千億銀的新購買力，不過，順叔唔係咁明白，中證監有冇諗過，打工仔真係對自己間公司啲股票咁有信心？
點解唔出咗糧之後，自己去掃貨，雖然都係冇折頭，但係最少冇禁售期限制，有少少頭，可能新例出咗之後，有公司冇錢出糧，可以大條道理以股代薪，焗班伙記收公仔紙。
中國仲有一條大水喉，叫做儲蓄，包括以萬億銀計的各種社會保險資金(唔同由阿公管理，到依家都冇講過未來會點用的「全國社保基金」)，幾年前，上海社保案之後，幾乎全部放曬落銀行做定期存款收息，近排有跡象顯示，阿公會放部分出嚟投資在證券市場。
例如廣東省約有一千億元的社保養老金，已經試點式委託全國社保基金管理，最近國家審計局，就全國各地的社保資金，做咗個大起底，呢劑史無前例的大查數，可能係逐步放行的先兆。
下回再續。