富事通：幸福推銷員
1 :
GS(14)@2012-08-08 11:47:42http://www.sharpdaily.hk/article ... 8%E9%8A%B7%E5%93%A1
早兩日，介紹一位朋友加入我平日去開嗰間Gym做會員。該處「會籍顧問」見有客送到上門，自然非常之健談。講講吓，講咗去份工嗰度。
「下個月，我會去考保險、證券同健身教練。」雖然我睇唔出上述三樣，有何共通之處。不過，我睇得出呢位妹妹，都算係上進嗰種，覺得反正要跑數，就不如搵一門專業。
「其實，反正都係跑數，點解唔諗吓做地產呢？」我問。
老實講，如果要搵一行去跑數，我諗都唔諗，就會揀地產。香港人，十個有九個，都想買樓，問題係有錢定冇錢。所以，成功嘅地產經紀，最大本事，係搵出有錢人喺邊，同埋佢想買乜。
當然，講就易啦。不過，我發覺好多地產代理分行經理，成日叫班後生去街企，真係有用咩？唔通香港真係富貴到，隨街都可以捉到人，「大嗱嗱」攞幾千萬買個單位？
講番推銷。其實，前特首當年都自稱係寂寞的推銷員。香港人對呢一行，有少少誤解，覺得推銷員係下等工。其實，我好鍾意推銷，尤其當我覺得件產品好用，我更加落力去推。
推銷最怕遇着垃圾產品都要死推爛推。跑唔夠數事小，斷人脈代價更大。所以我認為最幸福嘅推銷員，係可以為自己塑造出來嘅產品跑。產品係乜？咪自己囉！
李兆富