📖 ZKIZ Archives

水缸漏了水 左丁山

http://hk.apple.nextmedia.com/template/apple_sub/art_main.php?&iss_id=20110919&sec_id=12187389&art_id=15624106&cat_id=255&coln_id=22

史密夫教授話佢與同事經一番研究，諗出一個分配大學停車場時租車位嘅辦法。任何一間大學都有停車場車位不足嘅 問題，尤其是在美國。 Chapman University係一間私立大學，位於加州 Orange County，當地居民無車不歡，幾乎人人揸車，而且美國公共交通網絡好差，唔揸車就寸步難行，故此大學停車場每日一早就爆滿，大學又係講社會主義嘅地 方，個個把口都講公平，結果就一定係採用先到先得嘅方法。（經濟系學生可以討論，先到先得是否公平？）
史密夫教授嘅實驗係在網上預訂泊車位（時 租），電腦有時租價，由高至低，譬如由五十蚊一小時開始，分時段出租，冇人肯租，價錢就下降，一直下降到一個 market clearing price（即全部車位出租晒），此外又有一個「車位偏好」時租價（例如近住升降機、出口、自己辦公室），如要指定車位（相當於報紙廣告嘅指定版位），租 金可能又要貴啲（除非冇人同你爭），教授話實驗結果相當理想，停車場提高收入，全日出租率相當穩定。但係……好難真正實施噃，因為大學有大學政治問題，一 講到政治，經濟學理論就會被扭曲，最後乜都做唔到。

 

講番宏觀經濟又如何呀？史密夫教授認為兩個概念要分得好清楚，一個係 flow（流量），一個係 stock（庫存、資產），美國政府向市場注資三次（量化寬鬆二輪，政府刺激經濟方案一輪），不見產生效果，原因就係大家只係睇實 flow，經濟學家嘅模型全部以 flow為量度工具。簡單啲講，家居花園有一個水缸（香港就講大廈天台水缸），全滿嘅時候，淡水不斷流出，細水長流，戶主用水唔知幾開心，出外消費好闊 綽。但水缸漏水，唔見咗一半之後，雖然仍有水用，但大家不免小心翼翼，開始慳水。聯儲局泵水，政府注水，水缸繼續有水流出嚟，但水缸個大窿未曾堵塞噃，水 缸無法子全滿，即係有 flow唔夠 stock，用會計學講，家庭嘅資產負債表（因為間屋係負資產）與銀行嘅資產負債表（因為銀主盤呆壞賬太多）元氣未復，水缸頂多半滿，銀行唔肯放寬放水， 家庭不肯用多啲水，美國經濟點會真正復蘇呀。呢個道理似乎好簡單，但史密夫教授話佢講極都冇人肯聽。

PermaLink: https://articles.zkiz.com/?id=27941
Next Page
ZKIZ Archives @ 2019