《福布斯》噚日公佈新加坡富豪榜，已故信置（083）大股東黃廷方嘅家族再度「蟬聯」，資產淨值由舊年11億美金，上升至89億美金，大概690億港紙。 黃廷方舊年因為腦溢血中風喺新加坡逝世，享年82歲。佢私人持有遠東集團，喺香港有3間上市公司包括信置、信和酒店（1221）同最終控股公司尖沙嘴置業（247）。黃廷方同長子黃志祥，都係名副其實嘅樓市大好友，一家人作風低調。90年代，黃廷方已經將星、港兩地嘅生意，交畀黃志祥同次子黃志達管理。家陣第三代，即係黃志祥個乖仔黃永光都加入信置幫手。 富豪榜排第二係已故銀行家邱德拔嘅家族，資產淨值由舊年8億美金增至67億美金（約523億港元）。邱德拔曾經係渣打銀行最大股東，04年因為心臟病逝世。至於排第三位嘅係大華銀行主席黃祖耀，資產淨值42億美金（約328億港元）。
2011-7-29 AD