ZKIZ Archives


舊傢俬進駐豪宅 點木成金

2011-5-19  NM




四十三歲的廖志強(Dino), 出身「洗頭仔」,綽號「收買佬」,喜歡周遊列國收集舊傢具,早年開設雜架攤「摩登夜冷」賣心頭好,可惜「珍品」看上去不實用無人問津。他手執木頭雜貨決定 「玩大佢」,先用創意改裝,再用豪宅包裝,木頭即時升價十倍,收買佬成功翻身。去年底「摩登夜冷」擴充至四千呎觀塘廠廈,開業半年,上月已賺十三萬元,現 由收買佬親述如何點木成金!

我自小就係「收買佬」,以前每年去五、六次旅行,依家收斂了,每隔三個月飛一轉,由歐洲、泰國、印尼峇里、越南、蘇杭等不同地方,搜集「民間」得意傢具, 有時迷上古代鐘錶電話,有時鍾情舊式門窗,睇中就用船運返香港。唔好話我瘋狂,有人鍾意買車,只係我鍾意買傢俬。久而久之,我儲埋一箱箱心頭好,多到屋企 擺唔落,租貨倉寄存好似好浪費,決定公諸同好,開設「摩登夜冷」。

深入民間搜平貨

香港人最愛泰國等東南亞貨,亦有不少人查詢蘇杭風格傢具。我主要由東南亞、中國或歐洲各地採購,新舊貨通殺,中式貨佔了六成。我入貨無特定地點,因為好多 時同用家買貨,賣完就無。通常我會先逛跳蚤市場,或行入街邊大眾化傢俬鋪「踩場」,跟住會問當地人邊度有特色二手傢俬賣。試過去杭州,跟住兩個男人坐車駛 入爛泥山路,擔心「劏死牛」驚足成個鐘,直至到達一間古式二手傢俬店,我才安心,結果一下子入了二十萬元枱椅櫃,一個一千蚊來貨的木箱,我可以賣三千蚊。 入貨我通常憑感覺,不夠實用就拿回來DIY,有次執到一件爛木頭車轆,加咗四隻木腳,頂層再嵌多塊玻璃,變成一張茶几,又賣到三千蚊。去年底,「摩登夜 冷」搬到觀塘四千呎工廠大廈,月租二萬五千元,多咗地方存貨。附近一間舊式設計傢俬店執笠,問我有無興趣收集傢具,我俾咗萬幾蚊,接手逾千件新貨,結果去 貨太慢,我現在「大平賣」,以數百至數千元促銷,清走部分已經有賺。

豪宅襯托傢具

不過話說回來,淨係開古董傢俬鋪根本好難賺錢,因為原始木椅、梳妝枱,一堆堆放在鋪頭,一般客人睇中都唔知點配襯。我無讀過設計,亦唔識畫圖,但對大小傢 俬擺設敏感度特別高。為令古式傢俬有價有市,我覺得最好係用間屋去襯托,首先由自己間屋開始。我以三百五十萬元買入元朗八鄉二千呎村屋,將花園改造草披、 泳池,變成私家別墅,屋內大部分傢俬裝飾,就用上我最愛的古董傢具,實行室內設計包裝傢俬,傢俬包裝室內設計,雙軌發展。連藝人張栢芝、張家輝都嚟睇過。 屋企每個月開派對,最大型招呼過二百個朋友、髮型屋客人,參加派對亦係參觀示範單位,不到一年,有人睇中,成功連傢俬以八百萬元轉手。七、八年來,我曾搬 過元朗、上水、沙田九肚山、西貢西沙,都係用呢招,裝修後自住再放盤,不過大前提要有二千呎地方,有露台、花園空地俾我「搞花臣」。現自住的跑馬地單位連 平台,好有東南亞度假感覺,大廳成幅牆以舊木頭堆砌,初時裝修師傅見一嚿嚿木都話噁心,但經我砌完,佢哋遠遠睇,又幾靚喎。室內設計風格傳開去,不少客人 問價。最近在大埔沙欄小築,業主有個可租可賣的獨立屋樓盤搵我裝修,一單工程連安裝蘇州門窗、古代木門等,總計三百萬元。屋內枱椅擺設有時須度身訂造,會 以裝修費的百分之十定價出租至租約期滿。我收個業主唔算貴,佢○四年以五百八十萬買入單位,依家開價一千五百八十萬都有人傾,除了樓價升值,亦證明包裝成 功。自己的單位住了兩年,又係時候「金蟬脫殼」。搵自己間屋做招牌,不用交租好過開門市,但有時個人口味不同,放盤賣不出的傢俬,我就收番存倉。

Dino搵錢五大法

1 點石成金:親身搜集各地舊物,以低成本,甚至零成本入貨,花心思進行改裝,高價出售。2 雙軌推銷:室內設計凸顯舊式傢俬擺設,傢俬配襯設計風格,相輔相成。3 屋企做showroom:挑選獨立屋、村屋擺放大型木製古傢俬,自住兼作陳列室,吸引客人參觀,設計裝修連傢俬出售,金蟬脫殼。4 靈活變通:擴大店鋪面積,吸納不同貨源,店內傢俬可租借、可交換、可寄賣、可訂造,擴闊客路。5 勇於嘗試:廣涉剪髮、賣傢俬、室內設計不同範疇,不受傳統經營模式限制,靈活地互相補足。

拓仿製品市場

古舊傢俬一直有市場,但傢俬原件大小未必合用,所以我亦開拓仿製品市場。將設計交由中山合作夥伴的工廠按訂單起貨,原貨則留番鋪頭當陳列。雖然仿製品價錢 不及古董二手貨,但毛利亦可達五成至一倍,上月訂造傢俬生意額達十五萬元。當中最好賣是泰式樹頭茶几,由泰國入樹頭加工,按大小售四千五百元至六千元,每 月賣超過十件。自從觀塘新店開業,打正旗號提供訂造傢俬,公司零售的盈利近月由三萬元激增至十三萬元。此外,店內的傢俬可以租借、寄賣、交換,開拓貨源, 亦擴闊客路。現時公司寄賣舊貨逾百件,主要是一些工藝品,賣出與賣家五五拆賬,如果兩個月內都賣唔出,我會叫佢搬走,所以碰上有買家「壓價」,我會建議賣 家賣平啲,確保貨如輪轉。租借服務就最吸引影樓用作影相,租用前要繳原價作按金,首日收費是售價的百分之十,之後每日減一半,亦是另一穩定收入來源。

十五歲做洗頭

能夠將木頭變成高級傢具,除了加工得宜,亦因為放在豪宅令格調提升。其實我利用雙軌促銷這條橋,已非第一次。九九年在尖沙咀開第一間「摩登夜冷」時,一千 五百呎店鋪放滿煙盒、熨斗、公仔等新奇貨品,一度吸引大批人流,連街坊都讚:「未見過山林道有鋪頭咁旺。」但半年後,新鮮感減退,無人幫襯。我心情梗係唔 好,但窮則變,便將鋪頭後面間開五百呎做回老本行,幫人剪頭髮。逢客人入嚟睇精品,我便派卡片叫佢下次剪髮,個場一下子又「爆棚」,人流旺番,熟客見我啲 夜冷貨夠格調,搬屋裝修買傢俬都叫我俾意見,我心諗,不如自己做埋室內設計啦。「夜冷剪髮店」概念持續五年,○四年我搬去西貢,同時成立埋設計工程公司 Natural High,「室內設計+古董傢具」的財路便由當時開始。我細個讀唔成書,十五歲開始在粉嶺髮廊幫人洗頭賺錢,放工後陪班髮型師飲酒,乘機偷師學剪髮,不出 兩年,由「洗頭仔」升做師傅,客人排晒隊搵我。不過,年輕人愛冒險。一年後,我辭工揸住把鉸剪一個人到西班牙闖蕩,返港後開髮型屋,鋪頭至今仍存在,但我 已轉移主力打理舊傢俬生意。我同太太有一對兩歲孖仔,仲有個細仔剛好九個月。多年來,家人跟住我不停搬屋。最近跑馬地放盤,我亦睇啱大埔一間面積多二千呎 的單幢式住宅頂樓連天台單位,夠我玩,又夠家人住。但我唔諗住長住五、六年,如果住到咁耐,即係搵唔到食啦!

開 業 資 料

(11/2010)租金*$75,000裝修$280,000入貨$350,000雜費$80,000總投資$785,000*兩個月按金,一個月上期

營 業 資 料

(04/2011)總營業額$273,320入貨$90,500租金$25,000宣傳$15,000人工#$16,000雜費$1,955盈利$124,865#一名全職員工


PermaLink: https://articles.zkiz.com/?id=25190

Next Page

ZKIZ Archives @ 2019