2011-4-27 AD
自從《3D肉蒲團》4月14日上畫後，製作呢套戲嘅中國3D數碼（8078）股價就開始跌，噚日最多跌近五成，公司出通告話「不悉變動原因」。隻股收市報兩仙七，跌43%。
華華即刻撥個輪搵中國3D數碼主席蕭定一，佢話股價跌冇乜特別，因為之前供股嘅股份咁啱出籠，供股成本一仙半，同噚日個價比，有成倍利潤，投資者出貨好正常。
關心套戲嘅票房，多過公司嘅股價。佢同華華講，最新香港票房係2650萬。據講，今次唔少同胞組團嚟香港睇《3D肉蒲團》，咁黃金周有冇特別安排？蕭公子話事前已經安排咗大陸團，但冇實際數字，要等戲院安排。
第一集收得，蕭公子已經諗住拍續集，咁會唔會親身上陣呢呵？佢笑笑口答：「第一集都有呀，有一個shot。」吓，唔覺嘅！
提到「電影上，股價跌」，華華諗起意馬國際（585），當日佢製作小飛俠電影《阿童木》，因為成本同票房問題，上畫之後試過單日急跌37%，之後要由梁伯韜出手相救，希望今次唔會歷史重演。